ଆସନ୍ତୁ ଜାଣିବା କରୋନାରେ ସଂକ୍ରମିତ ଥିଲେ କଣ ଖାଇବା ଆବଶ୍ୟକ ?
ମହାମାରୀ କରୋନା କବଳରେ ସାରା ବିଶ୍ୱ । ଦୈନିକ ସଂକ୍ରମଣ ହୁ ହୁ ହୋଇ ବୃଦ୍ଧି ପାଉଛି । ଏହି ସମୟରେ ନିଜର ସ୍ୱାସ୍ଥ୍ୟ ଉପରେ ଧ୍ୟାନ ଦେବା ଆବଶ୍ୟକ । ଯଦି ଆପଣ କରୋନାରେ ସଂକ୍ରମିତ ହୋଇଛନ୍ତି, ତେବେ ଖାଆନ୍ତୁ ଏହି ଖାଦ୍ୟ ।
କୋଭିଡର ଥକ୍କାପଣରୁ ବଂଚିବା ପାଇଁ ଭିଜାଯାଇଥିବା ବାଦାମ ଓ କିସମିସ ଖାଇ ଦିନ ଆରମ୍ଭ କରନ୍ତୁ । ବାଦାମରେ ପର୍ଯ୍ୟାପ୍ତ ପରିମାଣରେ ପ୍ରୋଟିନ୍ ଥାଏ ଏବଂ କିସମିସ ଶରୀରକୁ ଆଇରନ୍ ଯୋଗାଇଥାଏ । ତେଣୁ ଭିଜା ଯାଇଥିବା ବାଦମ ଖାଇବା ଲାଭଦାୟକ ଅଟେ ।
ମଧ୍ୟାହ୍ନ ଭୋଜନ ସମୟରେ କିମ୍ବା ପରେ ଗୁଡ ଏବଂ ଘିଅ ଖାଇବା ଅତ୍ୟନ୍ତ ଲାଭଦାୟକ ଅଟେ । ଆପଣ ରୁଟି ସହିତ ଏହି ପୁଷ୍ଟିକର ମିଶ୍ରଣକୁ ଖାଇପାରିବେ । ଏହା ଶରୀରରେ ହଜିଯାଇଥିବା ଶକ୍ତି ଫେରାଇ ଆଣିବ । ଉଭୟ ଗୁଡ ଓ ଘିଅ ଶରୀରକୁ ଉଷ୍ମ ଏବଂ ଶକ୍ତିଶାଳୀ ରଖିବାରେ ସାହାଯ୍ୟ କରେ । ଯାହା ପ୍ରଚୁର ରୋଗ ପ୍ରତିରୋଧକ ଶକ୍ତି ବଢାଇଥାଏ ।
କୋଭିଡରୁ ସୁସ୍ଥ ହେବା ପରେ ରାତ୍ରି ଭୋଜନ ଅଧିକ ଖାଇବା ଉଚିତ୍ ନୁହେଁ । ରାତ୍ରି ଭୋଜନରେ ଖେଚେଡି ଖାଇବା ଏକ ଭଲ ବିକଳ୍ପ । ଖେଚେଡିରେ ସମସ୍ତ ପ୍ରକାରର ଅତ୍ୟାବଶ୍ୟକ ପୋଷକ ତତ୍ତ୍ୱ ରହିଛି ଯାହା ପେଟ ପାଇଁ ହାଲୁକା ହୋଇଥାଏ । ଏହା ଖାଇବା ଦ୍ୱାରା ଶରୀରକୁ ଅନେକ ଲାଭ ମିଳିବା ସହିତ ଭଲ ନିଦ ହୋଇଥାଏ ।
ଶରୀରକୁ ସଠିକ୍ ଭାବରେ ହାଇଡ୍ରେଟ୍ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ତେଣୁ ପ୍ରଚୁର ପରିମାଣରେ ପାଣି ପିଅନ୍ତୁ । ପାଣି ପିଇବା ଦ୍ୱାରା ଶରୀରରେ ଅକ୍ସିଜେନ ଲେବେଲ ଠିକ୍ ରହିଥାଏ । ବିଶେଷଜ୍ଞଙ୍କ ମତରେ ଷ୍ଟ୍ରବେରି, ଜାମୁ କୋଳି, ଅଁଳା ଇତ୍ୟାଦିରେ ପର୍ଯ୍ୟାପ୍ତ ପରିମାଣରେ ଆଣ୍ଟିଅକ୍ସିଡାଣ୍ଟ ଏବଂ ଭିଟାମିନ ସି ରହିଥାଏ । ଏହା ନିୟମିତ ଖାଇବା ଦ୍ୱାରା ଶରୀର ସୁସ୍ଥ ରହିଥାଏ ।
ଥକ୍କାପଣରୁ ମୁକ୍ତି ପାଇବା ପାଇଁ ରାଗି ଦୋସା କିମ୍ବା ଗୋଟିଏ କପ୍ ଦଲିଆ ଖାଇବା ନିହାତି ଆବଶ୍ୟକ । ସକାଳ ପାଇଁ ଏହା ଏକ ଭଲ ଖାଦ୍ୟ । ଏହା ଶରୀରକୁ ଶକ୍ତି ଯୋଗାଇବା ସହିତ କ୍ଳାନ୍ତ ଅନୁଭବ କରିବାକୁ ଦିଏନାହିଁ ।
