ଆଇପିଏଲ୍‌-୨୦୨୧ : ଆର୍‌ସିବି ଆଗରେ ୧୬୦ ରନ୍‌ର ଟାର୍ଗେଟ୍

ଚେନ୍ନାଇ : ମହାମାରୀ କରୋନାର ଦ୍ୱିତୀୟ ଲହରୀ ସଂକ୍ରମଣ ଭିତରେ ଶୁକ୍ରବାର ଠାରୁ ଆଇପିଏଲ୍‌ର ୧୪ତମ ସଂସ୍କରଣ ପାଇଁ ବିଧିବଦ୍ଧ ଭାବେ ବିଗୁଲ ବାଜିଛି । ଚେନ୍ନାଇରେ ଖେଳାଯାଉଥିବା ପ୍ରଥମ ମ୍ୟାଚ୍‌ରେ ମୂହାଁମୁହିଁ ହେଉଛନ୍ତି ଡିଫେଣ୍ଡିଂ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ଓ ବିରାଟ କୋହଲିଙ୍କ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର । ବିନା ଦର୍ଶକରେ ଆୟୋଜିତ ଚଳିତ ଆଇପିଏଲ୍‌ର ପ୍ରଥମ ମ୍ୟାଚ୍‌ରେ ଟସ୍ ଜିତି ବିରାଟ ପ୍ରଥମେ ବୋଲିଂ କରିବାକୁ ନିଷ୍ପତି ନେଇଛନ୍ତି । ଏହାର ଅର୍ଥ ରୋହିତ ଶର୍ମାଙ୍କ ମୂମ୍ବେଇ ପ୍ରଥମେ ବ୍ୟାଟିଂ କରିଛି । ମୁମ୍ବାଇ ପାଇଁ ପ୍ରଥମେ ମ୍ୟାଚ୍ ଖେଳୁଥିବା କ୍ରିସ୍ ଲୀନ୍‌ଙ୍କ ସହ ଅଧିନାୟକ ରୋହିତ ଶର୍ମା ଇନିଂସ ଆରମ୍ଭ କରିଥିଲେ । ରୋହିତ ଭଲ ଆରମ୍ଭ କରିଥିଲେ ହେଁ ୧୫ ବଲ୍‌ରେ ୧୯ ରନ୍ କରି ଆଉଟ୍ ହୋଇଯାଇଥିଲେ । ଏହାପରେ ଲୀନ୍ ବଡ଼ବଡ଼ ଶଟ୍ ଖେଳି ଦଳୀୟ ସ୍କୋରକୁ ଆଗକୁ ନେଇଥିଲେ । ତାଙ୍କୁ ଇନଫର୍ମ ସୂର୍ଯ୍ୟକୁମାର ଯାଦବ ଭରପୁର ସହଯୋଗ କରିଥିଲେ । ଉଭୟ ଦ୍ୱିତୀୟ ଉଇକେଟ୍ ପାଇଁ ୭୦ ରନ୍ ମଧ୍ୟ ଯୋଡ଼ିଥିଲେ । କିନ୍ତୁ ଏହି ସମୟରେ କାୟଲ ଜାମିସନ ୩୧ କରିଥିବା ସୂର୍ଯ୍ୟକୁମାରଙ୍କୁ ଆଉଟ୍ କରିଦେଇଥିଲେ । ଲୀନ୍ ମଧ୍ୟ ୪୯ ରନ୍ କରି ୱାଶିଂଟନ୍ ସୁନ୍ଦରଙ୍କ ଶିକାର ହୋଇଥିଲେ । ଈଶାନ କିଶନ (୨୮) ଓ ହାର୍ଦ୍ଦିକ ପାଣ୍ଡ୍ୟା (୧୩) ହର୍ଷ ପଟେଲଙ୍କ ବଲରେ ଆଉଟ୍ ହେବାକୁ ଦଳୀୟ ସ୍କୋର ସାମାନ୍ୟ ଧିମା ହୋଇଯାଇଥିଲା । ଏକଦା ୨ଶହରୁ ଅଧିକ ରନ୍ ସ୍କୋରକୁ ଲକ୍ଷ୍ୟ ରଖିଥିବା ମୁମ୍ବାଇ ୧୬୦ ରନ୍ ଅତିକ୍ରମ କରିବାକୁ ସଂଘର୍ଷ କରିଥିଲା । କୃନାଲ ପାଣ୍ଡ୍ୟା (୭) ବଡ଼ଶଟ୍ ଖେଳି ଓଭରରେ ପ୍ରଥମ ବଲ୍‌ରେ ହର୍ଷଲ ପଟେଲଙ୍କ ତୃତୀୟ ଶୀକାର ବନିଥିଲେ । ଏହାର ପରବର୍ତୀ ବଲ୍‌ରେ ସେ ବିସ୍ଫୋରକ କାଏରନ୍ ପୋଲାର୍ଡ଼ (୭)ଙ୍କ ଉଇକେଟ୍ ନେଇ ମୁମ୍ବାଇକୁ ସମ୍ପୂର୍ଣ୍ଣ ବ୍ୟାକଫୁଟ୍‌କୁ ଠେଲି ଦେଇଥିଲେ । ସେହି ଓଭରରେ ୪ର୍ଥ ବଲ୍‌ରେ ସେ ଡେବ୍ୟୁଟାଂଟ ମାର୍କୋ ଜାନ୍‌ସେନ୍‌ଭ୍‌କୁ କ୍ଲିନବୋଲ୍ଡ କରି ପ୍ରଥମଥର ପାଇଁ ଆଇପିଏଲ୍‌ରେ ୫ ଉଇକେଟ୍ ଦଖଲ କରିବାର ଗୌରବ ହାସଲ କରିଥିଲେ । ଶେଷ ବଲ୍‌ରେ ଯଶପ୍ରୀତ ବୁମ୍ରା ୧ ରନ୍ କରିବାକୁ ମୁମ୍ବାଇ ୯ ଉଇକେଟ୍ ହରାଇ ୧୬୯ ରନ୍ କରିଥିଲା ।