ସ୍ୱେରେଜ୍ କାମ ବେଳେ ଅଘଟଣ : ୨ ମୃତ, ଜଣେ ଗୁରୁତର
କଟକ : କଟକ ସିଡିଏ ସେକ୍ଟର ୧୦ରେ ସ୍ୱେରେଜ କାମ କରୁଥିବା ବେଳେ ଅଣନିଃଶ୍ୱାସୀ ହୋଇ ୨ ଜଣ ଶ୍ରମିକଙ୍କ ମୃତ୍ୟୁ ଘଟିଥିବା ବେଳେ ଜଣେ ଶ୍ରମିକ ଗୁରୁତର ଆହତ ହୋଇଛନ୍ତି । ତେବେ ଠିକା ସଂସ୍ଥାର ଖାମଖିଆଲି ଯୋଗଁ ଏଭଳି ଅଭାବନୀୟ ଘଟଣା ଘଟିଥିବା ଆଲୋଚିତ ହେଉଛି । ପ୍ରକାଶ ଯେ, ଆଜି ସିଡିଏ ସେକ୍ଟର-୧୦ରେ ସ୍ୱେରେଜ୍ କାମ ଚାଲିଥିଲା । ଏହି କାର୍ଯ୍ୟରେ ୩ ଜଣ ଶ୍ରମିକ ନିୟୋଜିତ ହୋଇଥିଲେ । ପ୍ରଥମେ ଜଣେ ଶ୍ରମିକ କାମ କରିବା ପାଇଁ ଭିତରକୁ ଯାଇ ଫସି ଯାଇଥିଲେ । ତାଙ୍କୁ ଉଦ୍ଧାର କରିବାକୁ ଯାଇ ଆଉ ଜଣେ ଶ୍ରମିକ ମଧ୍ୟ ଭିତରେ ରହିଯାଇଥିଲେ । ଉଭୟେ ଦୀର୍ଘ ସମୟ ପର୍ଯ୍ୟନ୍ତ ବାହାରକୁ ବାହାରି ପାରିନଥିଲେ । ଏହା ଦେଖି ତୃତୀୟ ଶ୍ରମିକ ଜଣକ ଭିରକୁ ଯାଇଥିଲେ । ତେବେ ସେ ମଧ୍ୟ ଫସି ରହିଯାଇଥିଲେ । ତେବେ ତୃତୀୟ ଶ୍ରମିକ ଜଣକ ହାତ ଉପରକୁ ଉଠାଇ ଚିତ୍କାର କରିବାରୁ କିଛି ଲୋକ ତାଙ୍କ ପାଟି ଶୁଣି ଭିତରେ ସେମାନେ ଫସିରହିଥିବା ଜାଣିପାରିଥିଲେ । ଉପସ୍ଥିତ ଲୋକେ ଅଗ୍ନିଶମ ସେବା ସଂସ୍ଥାକୁ ଖବର ଦେବା ପରେ ଅଗ୍ନିଶମ ବିଭାଗ କର୍ମଚାରୀମାନେ ଘଟଣାସ୍ଥଳରେ ପହଂଚି ସମସ୍ତଙ୍କୁ ଭିତରୁ ଉଦ୍ଧାର କରି କଟକ ବଡ ମେଡିକାଲକୁ ପଠାଇଥିଲେ । ମାତ୍ର ସେଠାରେ ଡାକ୍ତର କଟକର ପି. ଶଙ୍କର ଓ ବଡମ୍ବା ଅଂଚଳର ବିଷ୍ଣୁ ନାୟକଙ୍କୁ ମୃତ ଘୋଷଣା କରିଥିଲେ । ତେବେ ଅନ୍ୟ ଜଣେ ଶ୍ରମିକ ଟି. ଶିବା ଏବେ ମେଡିକାଲରେ ଚିକିତ୍ସିତ ହେଉଥିବା ବେଳେ ତାଙ୍କର ସ୍ୱାସ୍ଥ୍ୟାବସ୍ଥା ଗୁରୁତର ଥିବା ମେଡିକାଲ ସୂତ୍ରରୁ ଜଣାପଡିଛି ।
