ଆଜି ୧୧ ଜିଲାରେ ଟିକାକରଣ କାର୍ଯ୍ୟକ୍ରମ ବାତିଲ

ଭୁବନେଶ୍ୱର : ରାଜ୍ୟରେ କୋଭିସିଲ୍ଡ୍ ଟିକାର ଅଭାବ ଯୋଗୁଁ ଟିକାକରଣ ଅଭିଯାନ ଧିମେଇ ଯାଇଛି। ଏଥିପାଇଁ ରାଜ୍ୟର ୧୧ ଜିଲ୍ଲାରେ ଟିକାକରଣ କାର୍ଯ୍ୟକ୍ରମ ବାତିଲ କରିବାକୁ ପଡ଼ିଛି ବୋଲି ସ୍ୱାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି । ବାଲେଶ୍ୱର, ବରଗଡ଼, ବୌଦ୍ଧ, କଟକ, ଗଜପତି, ଜଗତସିଂହପୁର, କନ୍ଧମାଳ, କୋରାପୁଟ, ନବରଙ୍ଗପୁର, ସମ୍ବଲପୁର ଓ ସୁବର୍ଣ୍ଣପୁର ଜିଲାରେ ଟିକାକରଣ ହେବନାହିଁ। ମଙ୍ଗଳବାର ସୁଦ୍ଧା ରାଜ୍ୟରେ ମାତ୍ର ୧୯ ହଜାର ଡୋଜ୍ କୋଭିସିଲ୍ଡ୍ ଟିକା ରହିଛି । ଏହାକୁ ପ୍ରାଥମିକତା ଭିତ୍ତିରେ ଏବେ ସାମ୍ବାଦିକ ଓ ଦ୍ୱିତୀୟ ପାନ ଅପେକ୍ଷା ହିତାଧିକାରୀଙ୍କୁ ଦିଆଯିବାକୁ ସରକାରଙ୍କ ନିର୍ଦେଶ ରହିଛି। ତେଣୁ ଅନ୍ୟମାନେ ଟିକା ଆସିଲେ ନେବେ ବୋଲି ବିଭାଗ ପକ୍ଷରୁ କୁହାଯାଇଛି। ଏଣେ ୨୯ ଏପ୍ରିଲ ସୁଦ୍ଧା ୮ଲକ୍ଷ ୯୦ ହଜାର ବ୍ୟକ୍ତି ଦ୍ଵିତୀୟ ଡୋଜ୍ ଟିକା ନେବାକୁ ଥିଲେ, ଏହି ସଂଖ୍ୟା ଆହୁରି ବଢ଼ି ଯାଇଛି । ଏପରି ସ୍ଥିତିରେ ରାଜ୍ୟରେ ଦ୍ଵିତୀୟ ପର୍ଯ୍ୟାୟ ଟିକାକରଣ ବାଧାପ୍ରାପ୍ତ ହୋଇଛି । ସ୍ଥିତିକୁ ଦେଖି ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ ମହାପାତ୍ର , ସମସ୍ତ ଜିଲ୍ଲାପାଳ ଏବଂ ମହାନଗର ନିଗମ କମିଶନରଙ୍କୁ ଦ୍ଵିତୀୟ ପର୍ଯ୍ୟାୟ ଉପରେ ପ୍ରାଥମିକତା ଦେବାକୁ ଚିଠି ଲେଖିଛନ୍ତି । ଟିକାକରଣ କେନ୍ଦ୍ରରେ ଦ୍ଵିତୀୟ ଡୋଜ୍ ନେବାକୁ ଥିବା ବ୍ୟକ୍ତିଙ୍କୁ ଅଗ୍ରାଧିକାର ଦେବାକୁ କୁହାଯାଇଛି, କାରଣ ୬ ରୁ ୮ସପ୍ତାହ ଭିତରେ ଦ୍ଵିତୀୟ ଡୋଜ୍ ଟିକା ନେବା ଜରୁରୀ । ସୋମବାର ସୁଦ୍ଧା ରାଜ୍ୟରେ ୫୯ଲକ୍ଷ ୪ହଜାର ୩୧୪ ସଂଖ୍ୟକ ଟିକାକରଣ ହୋଇଛି। ଏଥିରେ ୪୫ବର୍ଷରୁ ଅଧିକ ବର୍ଗର ୪୩ଲକ୍ଷ ୪୭ହଜାର ୩୫୫ ହିତାଧିକାରୀ ରହିଛନ୍ତି ।
ସୂଚନା ଯେ, ସୋମବାର ସୁଦ୍ଧା ରାଜ୍ୟରେ ୫୯ଲକ୍ଷ ୪ହଜାର ୩୧୪ ସଂଖ୍ୟକ ଟିକାକରଣ ହୋଇଛି। ଏଥିରେ ୪୫ବର୍ଷରୁ ଅଧିକ ବର୍ଗର ୪୩ଲକ୍ଷ ୪୭ହଜାର ୩୫୫ ହିତାଧିକାରୀ ପ୍ରଥମ ପାନ ଏବଂ ୫ଲକ୍ଷ ୭୪ହଜାର ୧୨୪ ଦ୍ୱିତୀୟ ପାନ ନେଇଛନ୍ତି। ଏହାବାଦ୍ ୩ଲକ୍ଷ ୨୪ହଜାର ୯୨୧ ସ୍ୱାସ୍ଥ୍ୟ କର୍ମୀ ପ୍ରଥମ ପାନ, ୨ଲକ୍ଷ ୭୩ହଜାର ୩୪୬ ଦ୍ୱିତୀୟ ପାନ, ୨ଲକ୍ଷ ୧୭ହଜାର ୭୪୧ କରୋନା ସମ୍ମୁଖ ଯୋଦ୍ଧା ପ୍ରଥମ ପାନ ନେଇଥିବାବେଳେ ୧ଲକ୍ଷ ୬୦ହଜାର ୩୧୧ ଦ୍ୱିତୀୟ ପାନ ନେଇଛନ୍ତି। ଆଜି ୨୪୭ଟି କେନ୍ଦ୍ରରେ ୪୬ ହଜାର ୬୬୩ଜଣ ଟିକା ନେଇଛନ୍ତି। ସେଥିରେ ୪୫ବର୍ଷରୁ ଅଧିକ ବର୍ଗର ୯୨୪୩ଜଣ ପ୍ରଥମ ପାନ ଏବଂ ୨୯ହଜାର ୫୯୬ଜଣ ଦ୍ୱିତୀୟ ପାନ ନେଇଥିବାବେଳେ ସ୍ୱାସ୍ଥ୍ୟକର୍ମୀ ଓ କରୋନା ଯୋଦ୍ଧା ଅବଶିଷ୍ଟ ପାନ ଟିକା ନେଇଛନ୍ତି।