ବିଲରୁ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର
ଦେବଗଡ : ଦେବଗଡ ସହରର ୩ ନମ୍ବର ୱାର୍ଡ ମଠସାହି ଦୁର୍ଗା ମନ୍ଦିର ନିକଟସ୍ଥ ଜମିମାଳରୁ ଜଣେ ବ୍ୟକ୍ତିଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର କରାଯାଇଛି । ମୃତକ ଜଣଙ୍କ ହେଲେ ସେହି ଅଞ୍ଚଳର ବିଶୁ ନାୟକ । ସୂଚନାଯୋଗ୍ୟ ଯେ, ଶନିବାର ଦିନ ଅଚିହ୍ନା ଅର୍ଦ୍ଧଦଗ୍ଧ ମୃତଦେହ ଜମିମାଳରେ ପଡିଥିବା ନେଇ ଚର୍ଚ୍ଚା ହେବା ପରେ ଦେବଗଡ ଆଦର୍ଶ ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା ।
ମୃତଦେହ ନିକଟରେ ପଡିଥିବା କାଗଜପତ୍ର, ଚପଲ, ଖୋଲା ପ୍ଲାଷ୍ଟିକ ବୋତଲ ଓ ଅଧାଜଳା ଦିଆସିଲ ଡବାକୁ ନେଇ ପୋଲିସ ମୃତକଙ୍କ ପରିଚୟ ଖୋଜୁଥିବା ବେଳେ ପରେ ଶବ ଚିହ୍ନଟ ହୋଇଥିଲା । ମୃତଦେହରେ ରହିଥିବା ଟାଟୁ ଓ ମିଳିଥିବା ଲକେଟରୁ ମୃତକ ରାଜମିସ୍ତ୍ରୀ କାମ କରୁଥିବା ବିଶୁ ନାୟକ ବୋଲି ଜଣାପଡିଛି । ମୃତକଙ୍କ ସ୍ତ୍ରୀ ଓ ବାପା ଆସି ଶବ ଚିହ୍ନଟ କରିଥିଲେ । ଦେବଗଡ ଏସଡିପିଓ ପ୍ରତ୍ୟୁଷ ମହାପାତ୍ରଙ୍କ ନେତୃତ୍ଵରେ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛନ୍ତି । ଏହା ଆତ୍ମହତ୍ୟା ନା ସୁପରିକଳ୍ପିତ ହତ୍ୟାକାଣ୍ଡ ସେ ନେଇ ତଦନ୍ତ ଚାଲିଛି ।
