ଆଜମଗଡ଼ ରାଜ୍ୟ ବିଶ୍ୱବିଦ୍ୟାଳୟର ଶିଳାନ୍ୟାସ କଲେ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ
- ଆଜମଗଡ଼ ବିଶ୍ୱବିଦ୍ୟାଳୟ ଛାତ୍ରଛାତ୍ରୀଙ୍କ ଉଜ୍ଜ୍ୱଳ ଭବିଷ୍ୟତର ସ୍ୱପ୍ନକୁ ସାକାର କରିବ : ଧର୍ମେନ୍ଦ୍ର ପ୍ରଧାନ
ଆଜମଗଡ଼ : ଉତରପ୍ରଦେଶର ଆଜମଗଡ଼ ଠାରେ ୧୦୮ କୋଟି ଟଙ୍କା ବ୍ୟୟରେ ହେବାକୁ ଥିବା ଆଜମଗଡ ରାଜ୍ୟ ବିଶ୍ୱବିଦ୍ୟାଳୟର ଶିଳାନ୍ୟାସ କରିବା ଅବସରରେ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ଯୁବବର୍ଗଙ୍କୁ ମାତୃଭାଷାକୁ ପ୍ରାଥମିକତା ଦେବାକୁ ପରାମର୍ଶ ଦେଇଛନ୍ତି । ଏହି ସମାରୋହରେ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଯୋଗଦେଇଛନ୍ତି । ସ୍ୱରାଷ୍ଟ୍ର ମନ୍ତ୍ରୀ ଶ୍ରୀ ଶାହ କହିଛନ୍ତି ଯେ ଯେଉଁ ଦେଶ ନିଜର ଭାଷାକୁ ହରାଇଥାଏ ସେହି ଦେଶ ନିଜର ସଭ୍ୟତା, ସଂସ୍କୃତି ଏବଂ ନିଜର ମୌଳିକ ଚିନ୍ତାଧାରାକୁ ମଧ୍ୟ ହରାଇଦିଏ । ତେଣୁ ଯୁବକମାନେ ନିଜର ମାତୃଭାଷାକୁ ଭଲପାଇବା ସହ କୌଣସି ବି ସ୍ଥାନରେ ନିଜର ମାତୃଭାଷା କହିବା ପାଇଁ ଲଜ୍ଜ୍ୟା କରିବା ଅନୁଚିତ୍ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଶାସନ ସମୟରେ ମାତୃଭାଷାକୁ ପ୍ରାଧାନ୍ୟ ଦିଆଯିବା ଏକ ବଡ଼ ଉପଲବ୍ଧି ବୋଲି ସେ କହିଛନ୍ତି । ସେହିପରି ଶିଳାନ୍ୟାସ ହୋଇଯାଇଥିବା ରାଜ୍ୟ ବିଶ୍ୱବିଦ୍ୟାଳୟ ସମଗ୍ର ପୂର୍ବାଂଚଳର ଯୁବକଙ୍କ ବରଦାନ ସାବ୍ୟସ୍ତ ହେବ ବୋଲି ଶ୍ରୀ ଶାହ କହିଛନ୍ତି ।
ଏହି ଅବସରରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ ଏହି ବିଶ୍ୱବିଦ୍ୟାଳୟ ସ୍ଥାନୀୟ ପିଲାମାନଙ୍କୁ ଉଚ୍ଚ ଶିକ୍ଷା ପ୍ରଦାନ କରି ଉଜ୍ଜ୍ୱଳ ଭବିଷ୍ୟତର ସ୍ୱପ୍ନକୁ ସାକାର କରିବାରେ ବଡ଼ ଭୂମିକା ନେବ । ଆଜମଗଡ଼ରେ ଏହି ବିଶ୍ୱବିଦ୍ୟାଳୟର ଭୂମିପୂଜନ ସହ ୨୦୧୭ ନିର୍ବାଚନୀ ଇସ୍ତାହାରରେ କୁହାଯାଇଥିବା ୧୦ ନୂଆ ବିଶ୍ୱବିଦ୍ୟାଳୟ ନିର୍ମାଣ କରିବାର କାର୍ଯ୍ୟ ପୂରଣ ହୋଇଛି । ଏହି ବିଦ୍ୟାମନ୍ଦିର ସହିତ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ରାଜ୍ୟର ଲୋକମାନଙ୍କୁ ୪୦ ନୂଆ ମେଡ଼ିକାଲ କଲେଜ ନିର୍ମାଣ କରିବାର ପ୍ରତିଶ୍ରୁତିକୁ ମଧ୍ୟ ପୂରଣ କରିଛନ୍ତି । ଆଜିର ଉତରପ୍ରଦେଶ କେବଳ ମାଫିଆରାଜ କିମ୍ବା ଭୟରୁ ମୁକ୍ତ ହୋଇନାହିଁ ବରଂ ଜାତିବାଦ, ବଂଶବାଦ ଏବଂ ତୃଷ୍ଟିକରଣକୁ ପଛରେ ରଖି ସବକା ସାଥ୍, ସବକା ବିକାଶ ଏବଂ ସବକା ବିଶ୍ୱାସର ନୀତି ସହ ଦ୍ରୁତ ଗତିରେ ଆଗକୁ ବଢ଼ୁଛି । ରାଜ୍ୟର ଜନତା ୨୦୨୨ରେ ପୁଣି ଥରେ ବିଜେପିକୁ ବିଜୟ କରି ବିକାଶ ଏବଂ
ସୁଶାସନକୁ ଗତି ଦେବେ । ପ୍ରଧାନମନ୍ତ୍ରୀ ମୋଦି ଏବଂ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନେତୃତ୍ୱରେ ଉତରପ୍ରଦେଶରେ ଗରିବଙ୍କୁ ଉଜ୍ଜ୍ୱଳା ଯୋଜନାରେ ଗ୍ୟାସ, ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହ, ପ୍ରଧାନମନ୍ତ୍ରୀ ସ୍ୱନିଧି ଯୋଜନାରେ ଉଠା ଦୋକାନୀଙ୍କ ପାଇଁ ଆର୍ôଥକ ପ୍ରୋତ୍ସାହନ, ଘରକୁ ପାଇପ ଯୋଗେ ପାଣି ଭଳି ଯୋଜନାର ଲାଭ ପାଉଛନ୍ତି । ରାଜ୍ୟରେ ଅରାଜକତା ଏବଂ ଆତଙ୍କର ଅନ୍ତ ଘଟାଯାଇ ଆଇନ ବ୍ୟବସ୍ଥାକୁ ସୁଦୃଢ଼ କରାଯାଇଛି । ଗୋଟେ ସମୟରେ ବିମାର ରାଜ୍ୟ ଭାବରେ ଜଣାଯାଉଥିବା ୟୁପି କରୋନାର କଠିନ ସମୟରେ ପୂରା ଦେଶ ପାଇଁ ଉଦାହରଣ ତିଆରି କରିଛି । ସୂଚନାଯୋଗ୍ୟ, ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ ସ୍ୱରଷ୍ଟ୍ର ମନ୍ତ୍ରୀ ଅମିତ ଶାହଙ୍କ କରକମଳରେ ଏକ ସରସ୍ୱତୀ ମନ୍ଦିରର ମଧ୍ୟ ଭୂମିପୂଜନ କାର୍ଯ୍ୟକ୍ରମରେ ଶ୍ରୀ ପ୍ରଧାନ ଉପସ୍ଥିତ ରହିଥିଲେ । ଏହାବ୍ୟତିତ ଗତକାଲି ମଧ୍ୟ କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ଅମିତ ଶାହ ଏବଂ ଯୋଗୀ ଆଦିତ୍ୟନାଥଙ୍କ ସହ ଉତରପ୍ରଦେଶର ବିଧାନସଭା ପ୍ରଭାରୀ ଏବଂ କ୍ଷେତ୍ରୀୟ ପଦାଧିକାରୀଙ୍କ ସହ ବୈଠକ କରିଥିଲେ ।