ଦକ୍ଷିଣରେ ବିଜେପିର ବଢ଼ିଲା ପ୍ରଭାବ, ଏନଡିଏରେ ମିଶିଲା ଜେଡିଏସ୍
![](https://thetruths.in/wp-content/uploads/2023/09/JDS-joined-NDA.jpg)
ନୂଆଦିଲ୍ଲୀ : ଆସନ୍ତା ୨୦୨୪ ସାଧାରଣ ନିର୍ବାଚନ ପୂର୍ବରୁ ବିଜେପି ପୁଣି ଏକ କାର୍ଡ ଖେଳିଛି । ଏଚଡି କୁମାରସ୍ୱାମୀଙ୍କ ଜେଡିଏସ (ଜନତାଦଳ ସିକୁଲାର) ଏନଡିଏ ସହ ହାତ ମିଳାଇଛି । ଅର୍ଥାତ ଆଗାମୀ ନିର୍ବାଚନ ଉଭୟ ମିଳିତ ଭାବେ ଲଢ଼ିବେ ।
ଜେଡିଏସ୍ ନେତା ତଥା କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ଏଚଡି କୁମାରସ୍ୱାମୀ ଶୁକ୍ରବାର ତାଙ୍କ ବାସଭବନରେ ଗୃହମନ୍ତ୍ରୀ ଅମିତ ଶାହ ଓ ବିଜେପି ସଭାପତି ଜେପି ନଡ୍ଡାଙ୍କୁ ଭେଟିବା ପରେ ଏନଡିଏରେ ଜେଡିଏସ୍ ମିଶିବା ନେଇ ଔପଚାରିକ ଘୋଷଣା ହୋଇଥିଲା । ଏହି ଅବସରରେ ଆଗାମୀ ଲୋକସଭା ନିର୍ବାଚନ ପାଇଁ କର୍ଣ୍ଣାଟକରେ ଆସନ ଭାଗବଣ୍ଟା ନେଇ ତିନି ନେତାଙ୍କ ମଧ୍ୟରେ ଆଲୋଚନା ହୋଇଥିବା ଜଣାପଡିଛି । ତେବେ କୁମାରସ୍ବାମୀ କହିଛନ୍ତି ଯେ ତାଙ୍କ ଦଳ ତରଫରୁ ସେଭଳି କିଛି ଦାବି ହୋଇନାହିଁ ।
ଗତ କିଛି ଦିନ ଧରି ଜେଡିଏସ ମିଶ୍ରଣ ନେଇ ଚର୍ଚ୍ଚା ଜୋର ଧରିଥିଲା । ବିଜେପି ଅଧ୍ୟକ୍ଷ ଜେପି ନଡ୍ଡା ଆଜି (ଶୁକ୍ରବାର) ଘୋଷଣା କରି କହିଛନ୍ତି, ଆଗାମୀ ଲୋକସଭା ନିର୍ବାଚନରେ ଜେଡିଏସ ଏନଡିଏ ସହ ମିଶି ନିର୍ବାଚନ ଲଢ଼ିବ ।
ବିଜେପି ପାଇଁ ଜେଡିଏସ ସହ ମିଶ୍ରଣ ଏକ ଭଲ ସୂଚନା । କାରଣ କର୍ଣ୍ଣାଟକରେ ଜେଡିଏସ ଏକ ମଜବୁତ ପାର୍ଟି । ଦକ୍ଷିଣାଞ୍ଚଳ ରାଜ୍ୟରେ ଜେଡିଏସର ସ୍ଥିତି ବହୁତ ସୁଦୃଢ଼ ରହିଛି । ଚଳିତ ବିଧାନସଭାରେ କର୍ଣ୍ଣାଟକରେ ବିଜେପିର ଯେଭଳି ଶୋଚନୀୟ ପରାଜୟ ହେଲା, ସେ ଦୃଷ୍ଟିରୁ ଏନଡିଏ ସହ ଜେଡିଏସର ମିଶ୍ରଣ ବିଜେପି ପାଇଁ ଏକ ବଡ଼ ସୁଯୋଗ ଆଣି ଦେବ ।
ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଓ ଗୃହ ମନ୍ତ୍ରୀ ଅମିତ ଶାହଙ୍କ ଉପସ୍ଥିତିରେ ଏନଡିଏରେ ସାମିଲ ହୋଇଛି ଜେଡିଏସ। ଗତକାଲି ଜେଡିଏସ ପ୍ରତିଷ୍ଠାତା ତଥା ପୂର୍ବତନ ପ୍ରଧାନମନ୍ତ୍ରୀ ଏଚଡି ଦେବେଗୌଡ଼ା ଓ ତାଙ୍କ ପୁଅ ଏଚଡି କୁମାରସ୍ବାମୀ ଅମିତ ଶାହ ଓ ଜେପି ନଡ୍ଡାଙ୍କୁ ପାର୍ଲ୍ୟାମେଣ୍ଟରେ ସାକ୍ଷାତ କରିଥିଲେ।
୨୦୨୪ ଲୋକସଭା ନିର୍ବାଚନରେ ବିଜେପି – ଜେଡିଏସ ମେଣ୍ଟ ନେଇ ଆଲୋଚନା ହୋଇଥିଲା। ଆଜି ଦେବେଗୌଡ଼ା ଓ କୁମାର ସ୍ବାମୀଙ୍କୁ ବିଜେପି ସ୍ବାଗତ କରିଥିଲା। ଆଗାମୀ ଲୋକସଭା ନିର୍ବାଚନ ପାଇଁ ଜେଡିଏସ ସହ ମେଣ୍ଟ ନେଇ ବିଜେପି ବିଚାର କରୁଛି ବୋଲି ପ୍ରଥମେ ବିଏସ୍ ୟେଦୁରପ୍ପା ସୂଚନା ଦେଇଥିଲେ। ଏହା ପରେ ଏନଡିଏରେ ଜେଡିଏସ ମିଶିବା ନେଇ କଳ୍ପନାଜଳ୍ପନା ପ୍ରକାଶ ପାଇଥିଲା।
ତେବେ ୨୦୧୯ ଲୋକସଭା ନିର୍ବାଚନରେ କଂଗ୍ରେସ ସହ ମେଣ୍ଟ କରିଥିଲା ଜେଡିଏସ। ସେତେବେଳେ କର୍ଣ୍ଣାଟକରେ ଦୁଇ ଦଳ ମିଳିତ ସରକାର ଚଳାଉଥିଲେ । କୁମାରସ୍ବାମୀ ମୁଖ୍ୟମନ୍ତ୍ରୀ ଥିଲେ । କର୍ଣ୍ଣାଟକର ୨୮ ଲୋକସଭା ଆସନରୁ ୨୦୨୪ରେ ଜେଡିଏସ ୪ଟିରେ ଲଢ଼ିବ ବୋଲି ବିଶେଷ ସୂତ୍ରରୁ ସୂଚନା ରହିଛି। ଜେପି ନଡ୍ଡା କହିଛନ୍ତି ଆମେ ଖୋଲା ହୃଦୟର ସହ ଜେଡିଏସକୁ ସ୍ବାଗତ କରିଛୁ। ଏବେ ଏନଡିଏର ଶକ୍ତି ବୃଦ୍ଧି ହେବ।