ଭାରତରେ କରୋନା ସଂକ୍ରମଣକୁ ନିୟନ୍ତ୍ରଣ ପାଇଁ ମଧ୍ୟମ ଓ ଦୀର୍ଘସୂତ୍ରୀ ଆକାରରେ ପଦକ୍ଷେପ ନେବାକୁ ହ୍ୱାଇଟହାଉସ ମୁଖ୍ୟ ଡାକ୍ତରୀ ପରାମର୍ଶଦାତାଙ୍କ ପରାମର୍ଶ
ୱାଶିଂଟନ : ବର୍ତ୍ତମାନ ଭାରତରେ କୋଭିଡ-୧୯ର ଦ୍ୱିତୀୟ ପର୍ଯ୍ୟାୟ ସଂକ୍ରମଣ ହୁ ହୁ ହୋଇ ବଢ଼ିବାରେ ଲାଗିଛି । ଏହାକୁ ନେଇ ହ୍ୱାଇଟ ହାଉସର ମୁଖ୍ୟ ଡାକ୍ତରୀ ପରାମର୍ଶଦାତା ଡା. ଆନ୍ଥୋନି ଫୋୖସି କହିଛନ୍ତି ଯେ, ଭାରତର ସ୍ଥିତି ଅତ୍ୟନ୍ତ ଜଟିଳ ରହିଛି। କରୋନା ସଂକ୍ରମଣକୁ ନିୟନ୍ତଣ କରିବା ସକାଶେ ଦେଶବ୍ୟାପୀ ତାଲାବନ୍ଦ ଘୋଷଣା ସହିତ ବିଭିନ୍ନ ସ୍ଥାନରେ ବହୁସଂଖ୍ୟାରେ ଅସ୍ଥାୟୀ ଡାକ୍ତରଖାନା ନିର୍ମାଣ ଏବଂ କୋଭିଡ ପ୍ରତିଷେଧକ ଟିକାକରଣ କାର୍ଯ୍ୟ ତ୍ୱରାନ୍ୱିତ କରାଯିବ ଆବଶ୍ୟକ ରହିଛି ।
ଏଥିସହିତ ସେ କହିଛନ୍ତି ଯେ, ଯେତେବେଳେ ଏତେ ସଂଖ୍ୟକ ଲୋକ ସଂକ୍ରମିତ ହେଉଛନ୍ତି, ପ୍ରତ୍ୟେକଙ୍କ ଯତ୍ନ ନେବାକୁ ପର୍ଯ୍ୟାପ୍ତ ସ୍ୱାସ୍ଥ୍ୟସେବା ସାମର୍ଥ୍ୟର ଅଭାବ ରହିଛି, ଡାକ୍ତରଖାନାରେ ଶଯ୍ୟାର ଅଭାବ, ଅମ୍ଳଜାନ ଅଭାବ, ଚିକିତ୍ସା ସାମଗ୍ରୀ ଯୋଗାଣରେ ନିଅଣ୍ଟିଆ ଅବସ୍ଥା ରହିଛି, ସେତେବେଳେ ଅତ୍ୟନ୍ତ ହତାଶାଜନକ ପରିସ୍ଥିତି ସୃଷ୍ଟି ହେବା ସ୍ୱାଭାବିକ। ସେଥିପାଇଁ ସାରା ବିଶ୍ୱ ଯଥାସମ୍ଭବ ସହାୟତା କରିବା ଦିଗରେ ଆଗେଇ ଆସିବା ଆବଶ୍ୟକ। ଭାରତକୁ ମଧ୍ୟମ ଓ ଦୀର୍ଘସୂତ୍ରୀ ଆକାରରେ କେତେକ ପଦକ୍ଷେପ ନେବାକୁ ପଡିବ। ସେ କହିଛନ୍ତି, ଯେତେ ଅଧିକ ସମ୍ଭବ ଲୋକଙ୍କର ଟିକାକରଣ କରିବାକୁ ହେବ। ଭାରତରେ ଉତ୍ପାଦିତ ହେଉଥିବା ଟିକା ସହିତ ବିଦେଶରୁ ଯୋଗାଇ ଦିଆଯାଉଥିବା ଟିକା ଭାରତର ଜନସାଧାରଣଙ୍କୁ ଦେବାକୁ ପଡିବ। ତାହା ଏବେ ଚାଲିଛି। ତତ୍ସହିତ କିଛିଦିନ ପାଇଁ ଦେଶବ୍ୟାପୀ ସଂପୂର୍ଣ୍ଣ ତାଲାବନ୍ଦ ଘୋଷଣା କରିବାର ଆବଶ୍ୟକତା ରହିଛି, ଯାହା ଚୀନ, ନ୍ୟୁଜିଲାଣ୍ଡ ଭଳି ରାଷ୍ଟ୍ର କରିଥିଲେ। ତାଲାବନ୍ଦ ହେବାଦ୍ୱାରା କରୋନା ସଂକ୍ରମଣ ବ୍ୟାପିବାକୁ ନିଶ୍ଚିତ ଭାବରେ ରୋକାଯାଇପାରିବ। ଏସବୁ ସହିତ ଦେଶବ୍ୟାପୀ ବହୁ ସଂଖ୍ୟାରେ ଅସ୍ଥାୟୀ ଡାକ୍ତରଖାନା ନିର୍ମାଣ କରିବାକୁ ପରାମର୍ଶ ଦେଇଛନ୍ତି। ଏଥିପାଇଁ ଭାରତୀୟ ସେନାର ସହାୟତା ଲୋଡିବାକୁ ସେ କହିଛନ୍ତି। ଏହାଦ୍ୱାରା ଜଣେ ଅସୁସ୍ଥ ହୋଇ ଚିକିତ୍ସା ଆବଶ୍ୟକ କରିବା ସମୟରେ ତାଙ୍କୁ ଡାକ୍ତରଖାନାର ଏକ ଶଯ୍ୟା ମିଳିପାରିବ ବୋଲି କହିଛନ୍ତି।
