ଆଜି ଧାମନଗର ଏନଏସିର ୬ଟି ବୁଥରେ ପୁନଃ ମତଦାନ
ଭଦ୍ରକ : ଆଜି ଭଦ୍ରକ ଜିଲା ଧାମନଗର ଏନଏସିର ୬ଟି ବୁଥରେ ପୁନଃ ମତଦାନ ହେବ । ୪ଟି ୱାର୍ଡର ୬ଟି ବୁଥ୍ରେ ପୁନଃ ମତଦାନ କରାଯିବ। ୧୦ଟାରୁ ୪ଟା ଯାଏଁ ଚାଲିବ ଭୋଟିଂ। ନିର୍ବାଚନୀ ହିଂସା ଯୋଗୁଁ ବୁଥ୍ ଗୁଡିକରେ ମତଦାନ ସ୍ଥଗିତ ରଖାଯାଇଥିଲା। ଶାନ୍ତିଶୃଙ୍ଖଳାରେ ଭୋଟ୍ ଗ୍ରହଣ ନେଇ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ମୁତୟନ ହୋଇଛନ୍ତି ୧୧ ପ୍ଲାଟୁନ୍ ଫୋର୍ସ । ଗତକାଲି ଭଦ୍ରକ ଏସପି ଚରଣ ସିଂ ମୀନାଙ୍କ ନେତୃତ୍ୱରରେ ଧାମନଗର ସହରରେ ବିଭିନ୍ନ ଅଞ୍ଚଳରେ ଫ୍ଲାଗ ମାର୍ଚ୍ଚ କରିଥିଲେ । ଶାନ୍ତି ଶୃଙ୍ଖଳାରେ ମତଦାନ ପାଇଁ ୫ ପ୍ଲାଟୁନ୍ ପୋଲିସ ଫୋର୍ସ ମୁତୟନ ହୋଇଛନ୍ତି । ଜଣେ ଅତିରିକ୍ତ ଆରକ୍ଷୀ ଅଧୀକ୍ଷକ, ଇନିସପେକ୍ଟର, ସବ ଇନ୍ସପେକ୍ଟର, ଓ ମହିଳା ପୋଲିସ ମୁତୟନ ହୋଇଛନ୍ତି ।
ସୂଚନା ଯେ, ଗତମାସ ୨୪ରେ ଧାମନଗର ବିଜ୍ଞାପିତ ଅଞ୍ଚଳ ପରିଷଦର ୪ଟି ଓ୍ୱାର୍ଡ଼ ଅନ୍ତର୍ଗତ ୬ଟି ବୁଥରେ ମତଦାନ ବେଳେ ହିଂସାକାଣ୍ଡ ହୋଇଥିଲା। କିଛି ଅସାମାଜିକ ବ୍ୟକ୍ତି ଅତର୍କିତ ଭାବେ ବୁଥ୍ ଭିତରେ ପହଞ୍ଚି ମାରପିଟ୍ ଓ ଭଙ୍ଗାରୁଜା କରିଥିଲେ। ଏପରିକି ଇଭିଏମକୁ ମଧ୍ୟ ଭାଙ୍ଗି ଦିଆଯାଇଥିଲା। ଏହାସହ ଜଣେ ବ୍ୟକ୍ତିଙ୍କୁ ମଧ୍ୟ ଛୁରାମାଡ଼ ହୋଇଥିଲା। ଏଥିଯୋଗୁ ଧାମନଗର ବିଜ୍ଞାପିତ ଅଞ୍ଚଳ ପରିଷଦର ୩, ୮, ୯, ୧୬, ୧୭ ଓ ୧୮ ନମ୍ବର ବୁଥରେ ମତଦାନ ବାଧାପ୍ରାପ୍ତ ହୋଇଥିଲା । ଅଧିକ ଉତ୍ତେଜନାକୁ ଦୃଷ୍ଟିରେ ରଖି ସେଠାରେ ମତଦାନ ସମ୍ପୂର୍ଣ୍ଣ ଭାବେ ଥଗିତ ରଖିଥିଲେ ନିର୍ବାଚନ କମିଶନ ।
