ବନ୍ଦ ପଡିଥିବା ଭାରତୀୟ ଦୂତାବାସର ତାଲା ଭାଙ୍ଗି ଭିତରକୁ ପଶିଲେ ତାଲିବାନ ଯୋଦ୍ଧା
କାବୁଲ : ଆଫଗାନିସ୍ତାନ ଦଖଲ ପରେ ତାଲିବାନ ନିଜର ଅସଲ ରୂପ ଦେଖାଇବାରେ ଲାଗିଛି । ଅନ୍ତର୍ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ ତାଲିବାନ ଯୋଦ୍ଧାମାନେ କାନ୍ଦାହାର ଓ ହୈରାତରେ ବନ୍ଦ ପଡିଥିବା ଭାରତୀୟ ଦୂତାବାସର ତାଲା ଭାଙ୍ଗି ଭିତରକୁ ପଶିଥିଲେ । ସେଠାରେ ସେମାନେ ଅଫିସରେ ଥିବା କାଗଜ ପତ୍ର ଯାଞ୍ଚ କରିବା ସହ କିଛି କାଗଜପତ୍ର ଧରି ବାହାରକୁ ଆସିଥିଲେ । ଅଫିସ ଆଗରେ ଥିବା କିଛି କାରକୁ ବି ସେମାନେ ନେଇଯାଇଥିବା ଜଣାପଡିଛି ।
ଏହାକୁ ନେଇ ଜଣେ ଭାରତୀୟ ଅଧିକାରୀ କହିଛନ୍ତି ଯେ, ତାଲିବାନ ଯେଉଁ ପ୍ରତିଜ୍ଞା କରିଥିଲା ଏବେ ତାହାର ବିପରିତ ଦିଗରେ କାମ କରୁଛି । ସେ ବିଶ୍ୱର କୌଣସି କ୍ଷତି କରିବ ନାହିଁ ବୋଲି ଆଶ୍ୱସନା ଦେଇ ଏବେ ଭାରତୀୟ ଦୂତାବାସରେ ପଶି ଗାଡ଼ି ନେଇଯିବା ଘଟଣା ଭାରତକୁ ବ୍ୟଥିତ କରିଛି । ସେପଟେ ତାଲିବାନର ବରିଷ୍ଠ ନେତା ମହମ୍ମଦ ଆବାସ ଭାରତୀୟ ପକ୍ଷଙ୍କ ନିକଟରେ ପହଞ୍ଚି ଦୂତାବାସ ବନ୍ଦ ନକରିବାକୁ ଅନୁରୋଧ କରିଥିଲା । ତାଲିବାନୀମାନଙ୍କ ପକ୍ଷରୁ ଭାରତୀୟଙ୍କ ଉପରେ କୌଣସି ବିପଦ ନଥିବା କଥା ସେ କହିଥିଲେ । ହେଲେ ଗୁରୁବାର ଦିନ ତାଲିବାନୀମାନେ ଆଫଗାନିସ୍ତାନ ଓ ଭାରତ ମଧ୍ୟରେ ବାଣିଜ୍ୟିକ ସଂପର୍କ ଛିନ୍ନ କରିବା ପରେ ତାଲିବାନୀମାନଙ୍କ ଆଶ୍ୱାସନା ପାଣିର ଗାର ଭଳି ଲିଭି ଯାଇଛି ।
