ଆଜି ଉଦଘାଟନ ହେବ ବହୁ ପ୍ରତୀକ୍ଷିତ ସମ୍ବଲପୁର ଫ୍ଲାଏ ଓଭର୍ ବ୍ରିଜ୍

ସମ୍ୱଲପୁର : ସମ୍ବଲପୁର ସହରବାସୀଙ୍କ ଦୀର୍ଘ ବର୍ଷର ପ୍ରତୀକ୍ଷାର ଅନ୍ତ । ଆଜି ଉଦଘାଟନ ହେବ ବହୁ ପ୍ରତୀକ୍ଷିତ ସମ୍ବଲପୁର ଫ୍ଲାଏ ଓଭର୍ ବ୍ରିଜ୍ । ସହରର ଫାଟକରୁ କଚେରୀ ଛକକୁ ସଂଯୋଗ କରୁଥିବା ୧୮୦୦ ମିଟର ଲମ୍ବ ଏହି ଫ୍ଲାଏଓଭର ବିଭିନ୍ନ କାରଣରୁ ନିର୍ମାଣରେ ବିଳମ୍ବ ହୋଇଥିଲା। ତେବେ, ଏହାର ଉଦଘାଟନ ଖବର ଲୋକଙ୍କ ମଧ୍ୟରେ ଉତ୍ସାହ ଖେଳାଇ ଦେଇଛି। ଏହି ଫ୍ଲାଏଓଭର ଆକର୍ଷଣୀୟ ଆଲୋକମାଳାରେ ଝଲସି ଉଠିଥିବା ବେଳେ ସମ୍ବଲପୁରୀ ଡିଜାଇନର ରଙ୍ଗରେ ଚିତ୍ରିତ ହୋଇଛି।

ଏଥିରେ ଦୁର୍ଘଟଣା କମାଇବା ପାଇଁ ଲଗାଯାଇଛି ଅତ୍ୟାଧୁନିକ ଲାଇଟ୍ । ଏହି ଲାଇଟ୍ ଦ୍ୱାର ପୂର୍ତ୍ତ ବିଭାଗର ଖର୍ଚ୍ଚ କମ୍ ହେବ ବୋଲି ବିଦ୍ୟୁତକରଣ କରିଥିବା ସଂସ୍ଥା ବିରାଜ ଇଲେକ୍ଟ୍ରିକାଲ ଆଣ୍ଡ କନଷ୍ଟ୍ରକସନ୍ ପକ୍ଷରୁ କୁହାଯାଇଛି । ସଂସ୍ଥାର କହିବା କଥା, ଲାଇଟ ଗୁଡ଼ିକ ସବୁ ପାନାସୋନିକ୍ କମ୍ପାରୀର । ଏହିଭଳି ଅତ୍ୟାଧୁନିକ ଲାଇଟ୍ ଲଗାଇବାରେ ସମ୍ବଲପୁର ଜିଲ୍ଲା ପ୍ରଥମ । ଏହା ସହ ଏହି ଅତ୍ୟାଧୁନିକ ଲାଇଟ୍ ଦ୍ବାରା ରାସ୍ତା ଉପରେ ବ୍ଲାକ୍ ମାର୍କ ପଡ଼ିବନି ବୋଲି ସଂସ୍ଥା ଦାବି କରିଛି । ଯାହା ଦୁର୍ଘଟଣା ମଧ୍ୟ କମାଇବାରେ ସହାୟକ ହେବ । ଏହା ସହ ଫ୍ଲାଏ ଓଭର ବ୍ରିଜ୍ ଉପରେ ଏପରି ଆଲୋକିକରଣ କରାଯିବା ଦ୍ବାରା ଯାତ୍ରୀମାନେ ସୁରକ୍ଷିତ ଯାତ୍ରା କରିପାରିବେ ।

ସୂଚନା ଯେ, ସମ୍ବଲପୁର ସହରର ବର୍ଦ୍ଧିତ ଟ୍ରାଫିକ ସମସ୍ୟାର ସମାଧାନ ପାଇଁ ସହରର ଧୁଚୁରାପଡାରୁ କଚେରୀ ଛକ ପର୍ଯ୍ୟନ୍ତ ଫ୍ଲାଏଓଭର ନିର୍ମାଣ ପାଇଁ ମୁଖ୍ୟମନ୍ତ୍ରୀ ଶୁଭ ଦେଇଥିଲେ। ଏହାପରେ ୧୮ଶହ ମିଟର ଲମ୍ବ ଏବଂ ୭ ମିଟର ଓସାର ବିଶିଷ୍ଟ ଏହି ଫ୍ଲାଏଓଭରର ନିର୍ମାଣ କାମ ଆରମ୍ଭ ହୋଇଥିଲା। କଟକର ପଣ୍ଡା ଇନଫ୍ରା କଂପାନି ଏହାର ନିର୍ମାଣ କାମ ହାତକୁ ନେଇଥିଲା। ତେବେ, ସହରର ମୁଖ୍ଯ ରାସ୍ତାରେ ନିର୍ମାଣ ହୋଇଥିବାରୁ ଏହାର ଜମି ଅଧିଗ୍ରହଣ ମୁଖ୍ଯ ସମସ୍ୟା ପାଲଟିବାରୁ ନିର୍ମାଣରେ ବିଳମ୍ବ ହୋଇଥିଲା। ଏପରିକି ବର୍ଷକ ତଳୁ ଏହାର ନିର୍ମାଣ ଶେଷ ହୋଇଥିଲେ ହେଁ ସର୍ଭିସ ରୋଡ ପାଇଁ ଉଦଘାଟନ ହୋଇପାରିନଥିଲା। ତେବେ ଜିଲାପାଳ ଅନନ୍ୟା ଦାସ ଯୋଗଦେବା ପରଠାରୁ ଜମି ସମସ୍ୟାର ସମାଧାନ ତ୍ବରାନ୍ବିତ ହୋଇଥିଲା। ଆଉ ଇତିମଧ୍ୟରେ ସର୍ଭିସ ରୋଡ ନିର୍ମାଣ ବି ଶେଷ ହୋଇଛି। ଆଜି ପୂର୍ତ୍ତ ମନ୍ତ୍ରୀ ପ୍ରଫୁଲ୍ଲ ମଲ୍ଲିକ ଏହାକୁ ଉଦଘାଟନ କରିବାର କାର୍ଯ୍ୟକ୍ରମ ରହିଛି। ଏଥିରେ ସ୍ଥାନୀୟ ଏମପି, ବିଧାୟକ ଓ ଜିଲାପାଳ ଉପସ୍ଥିତ ରହିବେ ବୋଲି ଜଣାପଡିଛି। ତେବେ, ଏହାର ଉଦଘାଟନ ପରେ ମୁଖ୍ଯ ରାସ୍ତାର ଟ୍ରାଫିକ ସମସ୍ୟାର ପ୍ରାୟତଃ ହୋଇଯିବ ବୋଲି କୁହାଯାଉଛି।