ବିଧାୟକ ତଥା ବରିଷ୍ଠ ବିଜେଡି ନେତା ସୁକାନ୍ତଙ୍କୁ ଛୁଟୁଛି କୃତଜ୍ଞତାର ସୁଅ
ନୀଳଗିରି : ନୀଳଗିରି ନିର୍ବାଚନ ମଣ୍ଡଳୀର ଲୋକପ୍ରିୟ ବିଧାୟକ ସୁକାନ୍ତ କୁମାର ନାୟକ ବିଜେଡିକୁ ଘରବାହୁଡା ପରେ ପ୍ରତିଦିନ ଜନସମର୍ଥନ ବୃଦ୍ଧି ପାଇଥିବା ବେଳେ ବିଭିନ୍ନ ସ୍ଥାନରେ ତାଙ୍କୁ କୃତଜ୍ଞତାର ସୁଅ ଛୁଟିଥିବା ଦେଖିବାକୁ ମିଳିଛି। ଶନିବାର ନୀଳଗିରି ବିଜ୍ଞାପିତ ଅଞ୍ଚଳ ବିଜୁ ଜନତାଦଳର ସଭାପତି ରବୀନ୍ଦ୍ର ପରିଡାଙ୍କ ଅଧ୍ୟକ୍ଷତାରେ ଏନଏସି କଲ୍ୟାଣ ମଣ୍ଡପ ଠାରେ ବରିଷ୍ଠ ବିଜେଡି କାର୍ଯ୍ୟକର୍ତ୍ତାଙ୍କ ଦ୍ଵାରା ଆୟୋଜିତ କୃତଜ୍ଞତା ସଭାରେ ସୁକାନ୍ତ ନାୟକଙ୍କୁ ଭବ୍ୟ ସ୍ଵାଗତ ସମ୍ବର୍ଦ୍ଧନା ଦିଆଯାଇଥିଲା।
ଆଗାମୀ ସାଧାରଣ ନିର୍ବାଚନରେ ସୁକାନ୍ତ ନାୟକଙ୍କ ଭଳି ଦକ୍ଷ ନେତାଙ୍କ ଛତ୍ରଛାୟାରେ ବିଜୁଜନତା ଦଳ ନୀଳଗିରି ପାଇଁ ତୃଣମୂଳ ସ୍ତରରେ ଆହୁରି ଅଧିକ ସଂଗଠିତ ହୋଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିକାଶ ଧାରାକୁ ଦ୍ଵିଗୁଣିତ କରିବ ବୋଲି ଆୟୋଜିତ ସଭାରେ ବରିଷ୍ଠ ନେତା ଗଙ୍ଗାଧର ମିଶ୍ର, ରାଧାଗୋବିନ୍ଦ ଖଟୁଆ, ଲୋକନାଥ ଦଳେଇ, ଆଇନଜୀବୀ କିଶୋର ଦାସ, ସୂର୍ଯ୍ୟନାରାୟଣ ଆଇଚ୍, ଗଙ୍ଗାଧର ସିଂ, ସୁନୀଲ ପ୍ରଧାନ, କମଳା ମଣି ପରିଡା ପ୍ରମୁଖ ମତ ରଖିଥିଲେ।
ଏହି କୃତଜ୍ଞତା ସଭାରେ ବହୁ ସଂଖ୍ୟାରେ ଏନଏସି ର କାର୍ଯ୍ୟକର୍ତ୍ତା, ମା ଭଉଣୀ ଯୋଗ ଦେଇଥିଲେ। ଅନୁରୂପ ଭାବେ ନୀଳଗିରି ବ୍ଲକ୍ ତେଲିପାଳ ଓ କେ. ସି. ପୁର ଠାରେ ମଧ୍ୟ ବିଜେଡ଼ି ନେତା, କର୍ମୀ ଓ ସାଧାରଣ ଜନତା ବିଧାୟକ ସୁକାନ୍ତ ନାୟକଙ୍କୁ ବିଜେଡିକୁ ପ୍ରତ୍ୟାବର୍ତ୍ତନ ପାଇଁ କୃତଜ୍ଞତା ଜଣାଇବା ସହିତ ତାଙ୍କ ନେତୃତ୍ୱରେ କାମ କରିବେ ବୋଲି କହିଛନ୍ତି।
