କେମିତି ଖସିଲା ହାଇଦର, ଖୋଲିବ ଗୁମର
କଟକ: ଓଡ଼ିଶା ଫେରିଲା କୁଖ୍ୟାତ ଅପରାଧୀ ହାଇଦର। ବିମାନବନ୍ଦରରେ ପହଞ୍ଚିବା ପରେ ତାକୁ କଡ଼ା ସୁରକ୍ଷା ଭିତରେ କଟକ ନିଆଯାଇଥିଲା। କଟକ ଡିସିପି ଅଫିସରେ ହାଇଦରକୁ ଜେରା କରାଯାଇଛି। ସେ କେମିତି ଫେରାର ହେଲା , କେଉଁ ବାଟ ଦେଇ ସେ ତେଲେଙ୍ଗାନା ଯାଇଥିଲା, ତାଙ୍କୁ ଏଥିରେ କିଏ ସହାୟତା କରିଥିଲା ସେ ନେଇ ଜେରା କରାଯାଇଥିବାର ସୂଚନା ରହିଛି। ଏହାପରେ ଜେଏମଏଫସି କୋର୍ଟରେ ହାଜର କରି ରିମାଣ୍ଡରେ ନେବ କମିସନରେଟ ପୋଲିସ। ଫେରାର ପଛର ଗୁମର ଖୋଲିବ। କୁଖ୍ୟାତ ଫେରାର ଅପରାଧୀ ହାଇଦରକୁ ଗତକାଲି ତେଲେଙ୍ଗାନାର ସଙ୍ଗାରେଡ୍ଡି ଜିଲ୍ଲାରୁ ସ୍ଥାନୀୟ ପୋଲିସ ସହାୟତାରେ ହାଇଦରକୁ ଗିରଫ କରାଯାଇଥିଲା।
ହାଇଦରକୁ ଧରିବା ପାଇଁ ସ୍ୱତନ୍ତ୍ର ଅପରେସନ୍ କରିଥିବା କମିଶନରେଟ୍ ପୋଲିସ୍ ଏବେ ପଚରାଉଚରା ପାଇଁ ବି ସ୍ୱତନ୍ତ୍ର ଟିମ୍ ଗଠନ କରିବ । କିପରି ଓ କାହା ସହଯୋଗରେ ଏସ୍ସିବିରୁ ଚମ୍ପଟ୍ ମାରିଥିଲା ତା’ସମ୍ପର୍କରେ ପଚରାଉଚରା ହେବ ବୋଲି ସିପି ସୂଚନା ଦେଇଛନ୍ତି । ତାଛଡ଼ା ଏସସିବିରେ ଥିବା ଢିଲା ସୁରକ୍ଷା ବ୍ୟବସ୍ଥା ନେଇ ବି ଖୋଳତାଡ଼ ହେବ । ଫେରାର ହେବା ପରେ ମଙ୍ଗଳାବାଗ ଥାନାରେ ଏନେଇ ଏକ ମାମଲା ରୁଜୁ ହୋଇଥିଲା । ସେହି ଆଧାରରେ ପ୍ରାଥମିକ ତଦନ୍ତ ହେବ ବୋଲି ପୋଲିସ୍ କମିଶନର ସୂଚନା ଦେଇଛନ୍ତି । ଏନେଇ ସିପି କହିଛନ୍ତି, ୧୨୦ ଘଣ୍ଟାର ଅପରେସନ ପରେ ହାଇଦରକୁ ଧରିଥିଲୁ। ବିଳମ୍ବିତ ରାତିରେ ସଙ୍ଗାରେଡିର ସ୍ଥାନୀୟ କୋର୍ଟରେ ହାଜର କରି ଟ୍ରାନଜିଟ ରିମାଣ୍ଡରେ ବିମାନରେ ଓଡ଼ିଶା ଆଣିଛୁ। ମଙ୍ଗଳାବାଗ ଥାନାରେ ଥିବା ମାମଲା ଆଧାରରେ କୋର୍ଟ ଚାଲାଣ କରିବୁ। କୋର୍ଟରୁ ପୁଣି ରିମାଣ୍ଡରେ ଆଣି ଫେରାର ଘଟଣାର ତଦନ୍ତ କରିବୁ । ସେହିପରି ଏହି ପୂରା ଘଟଣା ପୁଲିସ୍ ପାଇଁ ଏକ ବଡ଼ ଚ୍ୟାଲେଞ୍ଜ ଥିଲା। ବଡ଼ ବଡ଼ କଏଦୀ ଯେଉଁଠି ଚିକିତ୍ସାଧୀନ ରହୁଛନ୍ତି, ସେଠାରୁ ଖସିବା ପୂର୍ବରୁ ପୂରା ପ୍ଲାନିଂ କରିଥାନ୍ତି। ଏହା ଲୋକାଲ ପୋଲିସ୍କୁ ଚାଲେଞ୍ଜ। ତେଣୁ ସେଠାରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିବା ଦରକାର। ଗୋଟିଏ ମୋଷ୍ଟ ୱାଣ୍ଟେଡ ଅପରାଧିକୁ ଧରିବା ପୋଲିସ୍ ପାଇଁ ଚାଲେଞ୍ଜ। ଇଣ୍ଟେଲିଜେନ୍ସ, ଟେକନିକାଲ ପାର୍ଟ, ହ୍ୟୁମାନ ଇଣ୍ଟେଲିଜେନ୍ସ ମିଶିଲେ ସଫଳତା ମିଳିଥାଏ। ଅପରାଧି ସବୁଠି ଭୁଲ କରିଥାଏ। ସେ ଭୁଲକୁ ଠିକ୍ ଭାବେ ଧରିପାରିଲେ ସଫଳତା ମିଳିଥାଏ ବୋଲି କହିଛନ୍ତି ସିପି। ହାଇଦ୍ରାବଦ ପୋଲିସ୍ଠୁ ଟେକନିକାଲ ସପୋର୍ଟ ପାଇନୁ। କିନ୍ତୁ ସେଠାକାର ଆଞ୍ଚଳିକ ଭାଷା, ତଥା ସ୍ଥାନୀୟ ଅଞ୍ଚଳ ସମ୍ପର୍କରେ ଆମର ଧାରଣା ନ ଥିବାରୁ ତେଲେଙ୍ଗାନା, ହାଇଦ୍ରାବାଦ ପୋଲିସ୍ ସହାୟତା କରିଥିବା କହିଛନ୍ତି ସିପି ।
ସୂଚନା ଯେ, ୫ ଦିନର ଲୁଚକାଳି ପରେ ମୋଷ୍ଟ ୱାଣ୍ଟେଣ୍ଡ ଗ୍ୟାଙ୍ଗଷ୍ଟାର ହାଇଦରକୁ ହାଇଦ୍ରାବାଦ୍ ସହର ନିକଟ ସଙ୍ଗାରେଡ୍ଡିରୁ ଗିରଫ କରି ଧରି ଓଡ଼ିଶା ଆଣିଛି ପୋଲିସ୍ । ଭୁବନେଶ୍ୱର ବିମାନବନ୍ଦରରେ ପହଞ୍ଚିବା ପରେ ତାକୁ କଟକ ନିଆଯାଇଛି । ଏବେ ହାଇଦର ଧରାପଡ଼ିବା ପରେ ତାକୁ ଫେରାର କରାଇବାରେ କିଏ ସହଯୋଗ କରିଥିଲା, କେମିତି ଫେରାର ହେଲା ଏବଂ ହାଇଦ୍ରାବାଦରେ କିପରି ପହଞ୍ଚିଲା ସେ ନେଇ ଗୋଟି ଗୋଟି ତଥ୍ୟ ଓଗାଲିବ କମିଶନରେଟ୍ ପୋଲିସ୍ । ତାସହ ଏସସିବିର ଢିଲା ସୁରକ୍ଷା ବ୍ୟବସ୍ଥା ସମ୍ପର୍କରେ ବି ତଦନ୍ତ ହେବ।
