ନଦୀରେ ବୁଡି ଇଂଜିନିୟରିଂ ଛାତ୍ରର ମୃତ୍ୟୁ
ସାଲେପୁର : ପବିତ୍ର ହୋଲି ଉତ୍ସବରେ ରଙ୍ଗ ଖେଳିସାରି ଚିତ୍ରୋତ୍ପଳା ନଦୀରେ ଗାଧୋଉଥିବା ବେଳେ ଜଣେ ଇଂଜିନିୟର ଛାତ୍ରଙ୍କର ସଲିଳ ସମାଧି ହେବା ଘଟଣା ଏ ଅଂଚଳରେ ବିଶାଦର ଛାୟା ଖେଳାଇ ଦେଇଛି । ନିଶ୍ଚିନ୍ତକୋଇଲି ଥାନା ଅଧିନସ୍ଥ ମହାଜନପୁର ଗ୍ରାମ ରାମଚନ୍ଦ୍ର ସେନାପତିଙ୍କ ଏକମାତ୍ର ପୁତ୍ର ରାଜକୁମାର ସେନାପତି(୨୦) ରଙ୍ଗ ଖେଳିସାରିବା ପରେ ତାଙ୍କ ସାଙ୍ଗମାନଙ୍କ ସହିତ ଚିତ୍ରୋତ୍ପଳା ନଦୀକୁ ଗାଧୋଇ ଯାଇଥିଲେ । ଏହି ନଦୀର ନାଗାମଠ ନିକଟରେ ଥିବା ଏକ ଗଭୀର ମଳମଳାରେ ଗୋଡ ଖସିଯିବାରୁ ସେ ପହଁରା ନଜାଣିଥିବାରୁ ବୁଡି ଯାଇଥିଲେ । ଖବର ପାଇ ସ୍ଥାନୀୟ ଗ୍ରାମବାସୀ ଓ ଦମକଳବାହିନୀର କର୍ମଚାରୀମାନେ ଦୀର୍ଘ ୪ ଘଣ୍ଟା କାଳ ଖୋଜାଖୋଜି କରିବା ପରେ ଅପରାହ୍ନରେ ତାଙ୍କୁ ଉଦ୍ଧାର କରାଯାଇ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା । ସେଠାରେ ଡାକ୍ତର ମୃତ୍ୟୁ ଘୋଷଣା କରିବା ପରେ ଥାନାରେ ଏକ ଅପମୃତ୍ୟୁ ମାମଲା ରୁଜୁ କରାଯାଇ ଶବ ବ୍ୟବଚ୍ଛେଦ ପାଇଁ କଟକ ବଡ ମେଡିକାଲ ପଠାଇ ଦିଆଯାଇଛି ।
