ବୁଧବାର କରନ୍ତୁ ଗଣେଶଙ୍କ ପୂଜା ! ଶୁଭ ଫଳ ପ୍ରଦାନ କରନ୍ତି ବୁଧ ଓ କେତୁ, ଦୂର ହେବ ଗ୍ରହ ଦୋଷ
![](https://thetruths.in/wp-content/uploads/2022/05/Lord-Ganesha-1.jpg)
ବୁଧବାର ଦିନ ଭଗବାନ ଗଣେଶଙ୍କୁ ସମର୍ପିତ । ଏହି ଦିନ ଗଣେଶଙ୍କୁ ପୂଜା କଲେ ବୁଧ ଓ କେତୁ ଗ୍ରହ ଶୁଭ ଫଳ ପ୍ରଦାନ କରିଥାନ୍ତି। ସେହିପରି ଦୂର ହୋଇଥାଏ ଗ୍ରହ ଦୋଷ ।
ଭଗବାନ ଗଣେଶଙ୍କୁ ବୁଦ୍ଧିଦାତା ବୋଲି କୁହାଯାଏ। ଜ୍ୟୋତିଷ ଶାସ୍ତ୍ରରେ ବୁଧଙ୍କୁ ବୁଦ୍ଧିର କାରକ ବୋଲି ବିଶ୍ୱାସ କରାଯାଏ। ସେଥିପାଇଁ ବୁଧବାର ଦିନ ଗଣେଶଙ୍କ ପୂଜାର ବିଶେଷ ମହତ୍ତ୍ୱ ରହିଛି। ବୁଧବାର ଦିନ ଗଣେଶଙ୍କୁ ପୂଜା କଲେ ବୁଧ ଗ୍ରହ ସହ ଜଡିତ ଅନେକ ସମସ୍ୟା ଦୂର ହୋଇଥାଏ। କେତୁ ଗ୍ରହର ପ୍ରଭାବ ଦୂର କରିବାକୁ ଗଣେଶଙ୍କ ପୂଜା ବହୁତ ପ୍ରଭାବଶାଳୀ।
ବୁଧବାର ଦିନ ଗଣେଶଙ୍କ ପୂଜା କରିବା ପୂର୍ବରୁ ପୂଜା ସ୍ଥାନକୁ ଗଙ୍ଗାଜଳରେ ଶୁଦ୍ଧ କରନ୍ତୁ। ଏହାପରେ ଗଣେଶଙ୍କ ପ୍ରତିମା ସମ୍ମୁଖରେ ଧୂପ, ଦୀପ, ଫୁଲ, ଚନ୍ଦନ ଦେଇ ଧ୍ୟାନ କରନ୍ତୁ। ପୂଜା ବେଳେ ଗଣେଶଙ୍କ ପ୍ରିୟ ମୋଦକ କିମ୍ବା ଲଡୁ ଭୋଗ କରନ୍ତୁ। ଗଣେଶ ବନ୍ଦନା ନିଶ୍ଚୟ ପଢନ୍ତୁ। ଆଳତି କରିବା ପରେ ଭୋଗ ବାଣ୍ଟି ନିଜେ ମଧ୍ୟ ଗ୍ରହଣ କରନ୍ତୁ।
ଜ୍ୟୋତିଷ ଶାସ୍ତ୍ର ଅନୁସାରେ ବୁଧ ଗ୍ରହକୁ ଶୁଭ ଗ୍ରହ। ବୁଧ ମିଥୁନ ଓ କନ୍ୟା ରାଶିର ସ୍ୱାମୀ। କନ୍ୟା ବୁଧଙ୍କ ଉଚ୍ଚ ରାଶି। ମିଥୁନ ବୁଧଙ୍କ ନୀଚ ରାଶି। ଅଶ୍ଳେଷା, ଜ୍ୟେଷ୍ଠା, ରେବତୀ ବୁଧଙ୍କ ନକ୍ଷତ୍ର। ବୁଧ ଗ୍ରହ ବୁଦ୍ଧି, ବାଣୀ, ଶିକ୍ଷା, ଗଣିତ, ଲେଖନ, ତର୍କ-ବିତର୍କ, ଲଳିତ କଳା, ବନସ୍ପତି, ବ୍ୟବସାୟ, ମିତ୍ର, ସମ୍ପର୍କୀୟ, ଗଳା, ନାକ, କାନ, ଫୁସଫୁସ ଆଦିର କାରକ।
କେତୁ ଗ୍ରହକୁ ଜ୍ୟୋତିଷ ଶାସ୍ତ୍ରରେ ପାପ ଗ୍ରହ ବୋଲି କୁହାଯାଏ। ଏହାକୁ ଛାୟା ଗ୍ରହ ମଧ୍ୟ କୁହାଯାଏ। କେତୁଙ୍କ ମୁଣ୍ଡ ନାହିଁ। କେତୁଙ୍କୁ ତର୍କ, ବୁଦ୍ଧି, ଜ୍ଞାନ, କଳ୍ପନା ଓ ମାନସିକ ଗୁଣର କାରକ ବୋଲି କୁହାଯାଏ। କେତୁ ପ୍ରଧାନ ବ୍ୟକ୍ତି ନିଜ ଭାଗ୍ୟ ଉପରେ ନିର୍ଭର ନ କରି ଟିକିଏ ଅଲଗା କାମ କରିବା ଉପରେ ବିଶ୍ୱାସ କରନ୍ତି।
ବୁଧ ଓ କେତୁ ଅଶୁଭ ଥିଲେ ବ୍ୟକ୍ତିଙ୍କୁ ଅନେକ ସମସ୍ୟା ସାମ୍ନା କରିବାକୁ ପଡିଥାଏ। ବ୍ୟବସାୟ ଓ ଶିକ୍ଷାରେ ହାନି ହୋଇଥାଏ। ନାନା ବାଧା ବିଘ୍ନ ସୃଷ୍ଟି ହୋଇଥାଏ। କେତୁ ଅଶୁଭ ହେବାରୁ ମାନସିକ ଅବସାଦ ସ୍ଥିତି ଉତ୍ପନ୍ନ ହୋଇଥାଏ। ନାନା ସଂଘର୍ଷ କରିବାକୁ ପଡିଥାଏ ଏବଂ ସଫଳତା ବିଳମ୍ବରେ ପ୍ରାପ୍ତ ହୁଏ।