ବସ-ବାଇକ ମୁହାଁମୁହିଁ : ସ୍ୱାମୀ ମୃତ, ସ୍ତ୍ରୀ ଓ ୨ ଶିଶୁ ଗୁରୁତର
ବଲାଙ୍ଗିର : ବଲାଙ୍ଗିର ଉପକଣ୍ଠ ସିନଖମନ ଛକରେ ମର୍ମନ୍ତୁଦ ସଡ଼କ ଦୁର୍ଘଟଣା । ବଲାଙ୍ଗୀର-ଦେଓଗାଁ ରାସ୍ତା ଜାତୀୟ ରାଜପଥ ୨୬ ସିନଖମନ ନିକଟରେ ଥିବା ରାଣୀବନ୍ଧ ବୁଲାଣିଠାରେ ଏକ ବସ ସହ ବାଇକ ମୁହାଁମୁହିଁ ଧକ୍କା । ଫଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ୨ ଜଣ ଶିଶୁଙ୍କ ସହ ଜଣେ ମହିଳା ଗୁରୁତର। ଗୁରୁତରଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି ।
ସୂଚନା ଯେ, ଗୁରୁବାର ଦିନ ୧୨ ଟା ସମୟରେ ବଲାଙ୍ଗୀରରୁ ଟିଟିଲାଗଡ଼ ଯାଉଥିବା ଗଣପତି ନାମକ ଏକ ଘରୋଇ ବସ୍ ସହ ଦେଓଗାଁ ପଟରୁ ଯାଉଥିବା ଏକ ବାଇକ ଦୁର୍ଘଟଣା ଗ୍ରସ୍ତ ହୋଇଥିଲା। ଏହି ଦୁର୍ଘଟଣାରେ ବାଇକ ଚଳାଉଥିବା ସରୋଜ ପଶାୟତ, ସ୍ତ୍ରୀ କରିସ୍ମା ପଶାୟତ, ସେମାନଙ୍କ ୩ ବର୍ଷର ଓ ଦେଢ଼ ବର୍ଷର ଝିଅ ଆହତ ହୋଇଥିଲେ । ସମସ୍ତଙ୍କୁ ଗୁରୁତର ଅବସ୍ଥାରେ ଭୀମଭୋଇ ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ ଚିକିତ୍ସାଧୀନ ଅବସ୍ଥାରେ ସରୋଜଙ୍କ ମୃତ୍ୟୁ ଘଟିଥିବା ଜଣାପଡିଛି । ଖବରପାଇ ଦେଓଗାଁ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
