ସାମୁଦ୍ରିକ ବାତ୍ୟା ‘ତୌକ୍ତେ’ର ତାଣ୍ଡବ: କର୍ଣ୍ଣାଟକରେ ୪ ମୃତ
ବେଙ୍ଗାଲୁରୁ : ଆରବ ସାଗରରେ ସୃଷ୍ଟ ବାତ୍ୟା ‘ତୌକ୍ତେ’ ଅତି ଭୟଙ୍କର ସାମୁଦ୍ରିକ ଝଡ଼ରେ ପରିଣତ ହୋଇଛି। ଏହା କେରଳ, କର୍ଣ୍ଣାଟକ, ଗୋଆ, ମହାରାଷ୍ଟ୍ର ଉପକୂଳ ଦେଇ ଗୁଜରାଟ ଉପକୂଳ ଅତିକ୍ରମ କରିବ ବୋଲି ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଛି। ବାତ୍ୟା ଗୁଜରାଟର ଭେରାଭଲ ଏବଂ ପୋରବନ୍ଦର ମଧ୍ୟରେ ମାଙ୍ଗରୋଲ ନିକଟରେ ସ୍ଥଳଭାଗ ଛୁଇଁବ ବୋଲି ପାଣିପାଗ ବିଭାଗ ଆକଳନ କରିଛି। ତେବେ ଏହା ସ୍ଥଳଭାଗ ଛୁଇଁବା ପୂର୍ବରୁ ଉପକୂଳବର୍ତ୍ତୀ ରାଜ୍ୟଗୁଡ଼ିକରେ ତାଣ୍ଡବ ଆରମ୍ଭ କରିଦେଇଛି। ଏହା ପ୍ରଭାବରେ ଉପକୂଳବର୍ତ୍ତୀ ରାଜ୍ୟଗୁଡ଼ିକରେ ପ୍ରବଳ ବର୍ଷା ସାଙ୍ଗକୁ ପବନ ବହୁଛି। କର୍ଣ୍ଣାଟକରେ ପ୍ରବଳ ବର୍ଷାପବନ ଯୋଗୁ ୪ ଜଣଙ୍କର ମୃତ୍ୟୁ ଘଟିଥିବା ସୂଚନା ମିଳିଛି। ଏହା ସହିତ ୭୩ଟି ଗାଁ ପ୍ରଭାବିତ ହୋଇଛି । ବାତ୍ୟା ପ୍ରଭାବରେ ଗୋଆରେ ବି ପ୍ରବଳ ବର୍ଷାପବନ ହୋଇଛି। ରାସ୍ତାଘାଟରେ ବଡ଼ ବଡ଼ ଗଛ ଉପୁଡ଼ି ପଡ଼ିଛି। ବାତ୍ୟା ପ୍ରକୋପକୁ ଦୃଷ୍ଟିରେ ରଖି କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଗୁଜରାଟ, ମହାରାଷ୍ଟ୍ର ଏବଂ ଡାମନ ଓ ଡିଉ ଏବଂ ଦାଦ୍ରାନଗର ହାଭେଳି ସରକାରଙ୍କ ପ୍ରଶାସନିକ ଅଧିକାରୀଙ୍କୁ ନେଇ ଏକ ସମୀକ୍ଷା ବୈଠକ ଡକାଇଛନ୍ତି। ବାତ୍ୟାକୁ କିପରି ମୁକାବିଲା କରାଯାଇପାରିବ ସେ ନେଇ ଶାହ ବୈଠକରେ ଆଲୋଚନା କରିବା ସହିତ ପ୍ରାକ୍ ପ୍ରସ୍ତୁତି ଉପରେ ଗୁରୁତ୍ବ ଦେବେ। ଅନ୍ୟପଟେ ରବିବାର ବାତ୍ୟା ମୁମ୍ବଇ ଦେଇ ଅତିକ୍ରମ କରିବା ଆଶଙ୍କା ରହିଛି। ଏହାକୁ ଦୃଷ୍ଟିରେ ରଖି ବ୍ରିହନ ମୁମ୍ବଇ ମହାନଗର ନିଗମ ଶତାଧିକ କରୋନା ରୋଗୀଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରିଛି। ବାତ୍ୟାକୁ ଦୃଷ୍ଟିରେ ରଖି ଗୁଜରାଟରେ ହାଇଆଲର୍ଟ ଜାରି କରାଯାଇଛି। ମହାରାଷ୍ଟ୍ର, କେରଳ ଏବଂ ଗୁଜରାଟ ଉପକୂଳ ଅଞ୍ଚଳରେ ୩ ଦିନ ପର୍ଯ୍ୟନ୍ତ ବାତ୍ୟାର ପ୍ରଭାବ ରହିବ ବୋଲି ଆଶଙ୍କା କରାଯାଉଛି। ବାତ୍ୟା ସ୍ଥଳଭାଗ ଛୁଇଁଲେ ଘଣ୍ଟାପ୍ରତି ୧୫୦ରୁ ୧୬୦ କିଲୋମିଟର ବେଗରେ ପବନ ବହିବ ବୋଲି ଅନୁମାନ କରାଯାଉଛି।
ସେହିପରି କର୍ଣ୍ଣାଟକର ମୁଖ୍ୟମନ୍ତ୍ରୀ ବିଏସ୍ ୟେଦିୟୁରପ୍ପା କହିଛନ୍ତି, ଉପକୂଳବର୍ତ୍ତୀ ଅଞ୍ଚଳର ବାତ୍ୟା ପରିସ୍ଥିତି ଉପରେ ଧ୍ୟାନ ରଖିଛୁ। ରିଲିଫ୍ ଓ ଉଦ୍ଧାର କାର୍ଯ୍ୟ ସଂକ୍ରାନ୍ତରେ ସୁନିଶ୍ଚିତ ହେବା ଲାଗି ପ୍ରଭାବିତ ଜିଲ୍ଲା ଦାୟିତ୍ବରେ ଥିବା ମନ୍ତ୍ରୀ ଓ ଜିଲ୍ଲାପାଳମାନଙ୍କ ସହ ମୁଁ ଯୋଗାଯୋଗ ରଖିଛି। ସାମୁଦ୍ରିକ ବାତ୍ୟା ତୌତେ ସମ୍ପ୍ରତି ଉତ୍ତର-ଉତ୍ତରପଶ୍ଚିମ ଦିଗକୁ ମୁହାଁଉଥିବା କଥା ଭାରତୀୟ ପାଣିପାଗ ବିଭାଗ କହିଛି। ବିଳମ୍ବିତ ଅପରାହ୍ଣ ସୁଦ୍ଧା ଏହାର କେନ୍ଦ୍ରସ୍ଥଳ ଉତ୍ତର-ଉତ୍ତରପଶ୍ଚିମ ଗୋଆ ଉପରେ ଥିବ। ବାତ୍ୟା ପ୍ରକୋପରୁ ଦିନ ତମାମ ପବନ ଓ ବର୍ଷା ଲାଗି ରହିବ।
