ଭୋଜିରୁ ଫେରିବା ବେଳେ ଗଛରେ ପିଟି ହେଲା କାର : ଜଣେ ମୃତ, ଜଣେ ଗୁରୁତର
ବାଙ୍କୀ : ଭୋଜିରୁ ଫେରିବା ବେଳେ ମର୍ମନ୍ତୁଦ ଦୁର୍ଘଟଣା । ଗଛରେ ପିଟି ହେଲା ବରଯାତ୍ରୀ କାର୍ । ଗତ ରବିବାର ବିଳମ୍ବିତ ରାତିରେ ଏକ ବିବାହ ଭୋଜିରେ ଯୋଗଦେଇ ଫେରୁଥିବାବେଳେ ବାଙ୍କୀରୁ ଆଠଗଡ଼ ଗ୍ରାମକୁ ତିନିଜଣ କାରରେ ଘରକୁ ଫେରୁଥିବା ବେଳେ ରଣଶଙ୍ଖ ଠାରେ ବୁଲାଣୀ ରାସ୍ତାରେ ଭାରସାମ୍ୟ ହରାଇ ଗଛରେ ପିଟି ହେଲା କାର। ଏହି ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ହୋଇଛନ୍ତି । ଗୁରୁତରଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି । ତେବେ ଦୁର୍ଘଟଣା ପରେ ଡ୍ରାଇଭର ଜଣକ ଚମ୍ପଟ ମାରିଛି।
ସୂଚନା ଯେ, ବିବାହ ଭୋଜି ଖାଇବାକୁ ଏକ କାର୍ରେ କିଛି ଲୋକ ଆଠଗଡ଼ରୁ ବାଙ୍କୀ ମକୁନ୍ଦପୁର ଗାଁକୁ ଆସିଥିଲେ । ଭୋଜି ଖାଇ ଫେରିବା ସମୟରେ ରଣଶଙ୍ଖ ନିକଟରେ କାର୍ଟି ଭାରସାମ୍ୟ ହରାଇ ରାସ୍ତାକଡ଼ରେ ଥିବା ଗଛକୁ ପିଟିଥିଲା । ସ୍ଥାନୀୟ ଲୋକେ ସଙ୍ଗେ ସଙ୍ଗେ ଦୁର୍ଘଟଣାଗ୍ରସ୍ତ କାରରୁ ତାଙ୍କୁ ଉଦ୍ଧାର କରି ବାଙ୍କୀ ଡାକ୍ତରଖାନାକୁ ପଠାଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ତେବେ ମୃତକଙ୍କ ନାମ ପାର୍ଥ ସାରଥି ନାୟକ ବୋଲି ଜଣାପଡିଛି । ଆଉ ଜଣେ ଗୁରୁତରଙ୍କୁ ସଙ୍କଟାପନ୍ନ ଅବସ୍ଥାରେ କଟକ ବଡ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।
