ବାଇକ୍ ଦୁର୍ଘଟଣାରେ ୨ ଗୁରୁତର
ତିହିଡ଼ି : ଭଦ୍ରକ ଜିଲା ତିହିଡ଼ି ଥାନା ଅଧୀନ କଲେଜ ଛକ ନିକଟରେ ଗୁରୁବାର ଅପରାହ୍ନରେ ଏକ ବାଇକ୍ ଦୁର୍ଘଟଣାରେ ୨ଜଣ ଯୁବକ ଗୁରୁତର ଆହତ ହୋଇଥିବା ଜଣା ପଡ଼ିଛି । ପ୍ରକାଶ ଯେ, ଗୋବିନ୍ଦପୁର ପଞ୍ଚାୟତ ଅଧୀନ ବାଗସାହିପାଳ ଗ୍ରାମର ଭାଗିରଥି ମାଝୀଙ୍କ ପୁଅ ଗୌରାଙ୍ଗ ମାଝୀ (୩୫) ଓ ତାଙ୍କର ଅନ୍ୟ ଦୁଇ ସାଙ୍ଗ ଏକ ବାଇକ୍ରେ ଘରୁ ତିହିଡ଼ି ଅଭିମୁଖେ ଦୃତ ଗତିରେ ଯାଉଥିବା ବେଳେ ଅପର ପକ୍ଷରୁ ଫତେପୁର ପଞ୍ଚାୟତ ଅଧୀନ ଗୋପାଳପୁର ଗ୍ରାମର ଅମର ନାଥ ଜେନା (୪୫) ତିହିଡ଼ି ବଜାରରୁ ଘରକୁ ଫେରୁଥିଲେ । ଏହି ସମୟରେ ଉଭୟ ବାଇକ୍ ମଧ୍ୟରେ ତିହିଡ଼ି କଲେଜ ଛକ ନିକଟରେ ମୁହାଁମୁହିଁ ଧକ୍କା ହୋଇଥିଲା । ଫଳରେ ଗୌରାଙ୍ଗ ଓ ଅମର ଗୁରୁତର ହୋଇ ରାସ୍ତାରେ ପଡ଼ିଥିବା ବେଳେ ସ୍ଥାନୀୟ ଲୋକେ ୧୦୮ ଆମ୍ବୁଲାନ୍ସ ସାହାଯ୍ୟରେ ସେମାନଙ୍କୁ ଚିକିତ୍ସା ପାଇଁ ତିହିଡ଼ି ଡାକ୍ତରଖାନାରେ ଭର୍ତ୍ତି କରିଥିଲେ । ପରେ ସେମାନଙ୍କ ଅବସ୍ଥା ସଂକଟାପନ୍ନ ହେବାରୁ ସେମାନଙ୍କୁ ଭଦ୍ରକ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ଗୁରୁତର ଗୌରାଙ୍ଗଙ୍କ ବାଇକ୍ରେ ଥିବା ଅନ୍ୟ ୨ଜଣ ସାମାନ୍ୟ ଆହତ ହୋଇଥିବା ଜଣାପଡ଼ିଛି ।
