ସମର୍ଥକଙ୍କ ସହ ଆସି ନାମାଙ୍କନ ଦାଖଲ କଲେ ଯୋଗାନନ୍ଦ ଦାସ

ନୀଳଗିରି : ସିପିଆଇ (ଏମ୍‌) ଦଳର ପ୍ରାର୍ଥୀ ଯୋଗାନନ୍ଦ ଦାସ ନୀଳଗିରି ନିର୍ବାଚନ ମଣ୍ଡଳୀ ପାଇଁ ଗୁରୁବାର ହଜାର ହଜାର ସମର୍ଥକଙ୍କୁ ନେଇ ଏକ ବିରାଟ ପଟୁଆରରେ ଆସି ଗୁରୁବାର ନୀଳଗିରି ଉପ-ଜିଲାପାଳଙ୍କ ନିକଟରେ ପାର୍ଥୀପତ୍ର ଦାଖଲ କରିଛନ୍ତି । ଶ୍ରୀ ଦାସ ତୃତୀୟ ଶ୍ରୀକ୍ଷେତ୍ର ଜଗନ୍ନାଥ ମନ୍ଦିର ଠାରୁ ଏକ ବିଶାଳ ପଟୁଆରରେ ହଜାର ହଜାର କର୍ମୀଙ୍କ ସହ ଉପ-ଜିଲାପାଳଙ୍କ କାର୍ଯ୍ୟଳୟରେ ପହଞ୍ôଚ ନିଜର ପାର୍ଥୀପତ୍ର ଦାଖଲ କରିଛନ୍ତି । ଶ୍ରୀ ଦାସଙ୍କ ସହ ପୂର୍ବତନ ବିଧାୟକ ପ୍ରଦୀପ୍ତ ପଣ୍ଡା, ରାଜ୍ୟ ସମ୍ପାଦକ ମଣ୍ଡଳୀ ସଭ୍ୟ ସନ୍ତୋଷ ଦାସ, ରାଯ୍ୟ କମିଟି ସଭ୍ୟ ନୀର୍ମଳ ନାୟକ, ଜିଲା ସମ୍ପାଦକ ଶିଶିର ଭୁଇ, ରାଜ୍ୟ କମିଟି ସଭ୍ୟ ସିତାଂସୁ ସେନାପତି, ମହିଳା ନେତ୍ରୀ ତାପସୀ ପ୍ରହରାଜ, ଜିଲା ସମ୍ପାଦକ ମଣ୍ଡଳୀର ସଭ୍ୟ ବିଜୟ ପାତ୍ର, ଜ୍ୟୋର୍ତିମୟ ରାଉତଙ୍କ ସମେତ ଅନେକ ନେତା ଓ କର୍ମୀ ଉପସ୍ଥିତ ଥିଲେ ।

ଅନ୍ୟପକ୍ଷରେ ନୀଳଗିରି ବିଜେଡି ବିଧାୟକ ପ୍ରାର୍ଥୀ ସୁକାନ୍ତ କୁମାର ନାୟକ ତାଙ୍କର ଗୋଟିଏ ସେଟ୍ ପ୍ରାର୍ଥୀପତ୍ର ନୀଳଗିରି ଉପଜିଲାପାଳଙ୍କ ଠାରେ ଦାଖଲ କରିଛନ୍ତି । ସେ ଆସନ୍ତା ୧୩ ତାରିଖରେ ନିଜ ସମର୍ଥକ ସହ ରାଲିରେ ଆସି ପୁଣି ଥରେ ନାମାଙ୍କନ ପତ୍ର ଦାଖଲ କରିବେ ବୋଲି ଦଳୀୟ ସୂତ୍ରରୁ ପ୍ରକାଶ କରାଯାଇଛି ।