ମହିଳା ପ୍ରିମିୟର ଲିଗ୍ : ୫୯.୫ କୋଟିରେ ନିଲାମ ହେଲେ ୮୭ ଖେଳାଳି, ସ୍ମୃତି ମନ୍ଧାନା ସବୁଠୁ ଦାମୀ
ମୁମ୍ୱାଇ : ମହିଳା ପ୍ରିମିୟର ଲିଗ୍ (ଡବ୍ଲୁପିଏଲ୍)ର ଉଦଘାଟନୀ ସଂସ୍କରଣ ପାଇଁ ସୋମବାର ନିଲାମ ଶେଷ ହୋଇଛି । ନିଲାମ ତାଲିକାରେ ମୋଟ ୪୩୮ ଖେଳାଳି ରହିଥିଲେ । ତେବେ ଏଥିମଧ୍ୟରୁ ପାଞ୍ଚ ଫ୍ରାଞ୍ଚାଇଜ୍ ୮୭ ଖେଳାଳିଙ୍କୁ ନିଜ ନିଜ ଦଳର ସ୍ଥାନ ଦେଇଛନ୍ତି । ସେମାନଙ୍କ ମଧ୍ୟରୁ ୩୦ ଜଣ ହେଉଛନ୍ତି ବିଦେଶୀ ଖେଳାଳି । ନିଲାମରେ ପାଞ୍ଚ ଦଳ ତରଫରୁ ମୋଟ ୫୯.୫ କୋଟି ଟଙ୍କା ବ୍ୟୟ ହୋଇଥିଲା । ଦିଲ୍ଲୀ, ଗୁଜରାଟ ଏବଂ ଆରସିବି ସର୍ବାଧିକ ୧୮-୧୮ ଖେଳାଳି କିଣିଛନ୍ତି। ୟୁପି ଦଳ ୧୬ ଏବଂ ମୁମ୍ବାଇ ୧୭ ଜଣ ଖେଳାଳିଙ୍କୁ କିଣିଛି । ଭାରତର ଷ୍ଟାର ବ୍ୟାଟର ତଥା ଉପଧିନାୟିକା ସ୍ମୃତି ମନ୍ଧାନା ଲିଗର ସବୁଠାରୁ ଦାମୀ ଖେଳାଳି ହୋଇଛନ୍ତି। ତାଙ୍କୁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ୩.୪୦ କୋଟିରେ କିଣିଛି। ତିନି ଖେଳାଳିଙ୍କୁ ୩ କୋଟିରୁ ଅଧିକ ଟଙ୍କା ମିଳିଛି । ଅଷ୍ଟ୍ରେଲିଆର ଅଲରାଉଣ୍ଡର ଆସଲେ ଗାର୍ଡନର୍ଙ୍କୁ ଗୁଜରାଟ ଜଏଣ୍ଟସ୍ ୩.୨୦ କୋଟି ଟଙ୍କାରେ ଏବଂ ଇଂଲଣ୍ଡ ଅଲରାଉଣ୍ଡର ନାଟାଲିଆ ସ୍କିଭରଙ୍କୁ ମୁମ୍ବାଇ ଇଣ୍ଡିଆନ୍ସ ୩.୨୦ କୋଟିରେ କିଣିଛି। ମହିଳା ପ୍ରିମିୟର ଲିଗର ପ୍ରଥମ ସଂସ୍କରଣ ମାର୍ଚ୍ଚ ୪ ରୁ ୨୬ ପର୍ଯ୍ୟନ୍ତ ଖେଳାଯିବ ।
ଆଜି ଅନୁଷ୍ଠିତ ନିଲାମରେ ଭାରତୀୟ ଦଳର ଉପଅଧିନାୟିକା ସ୍ମୃତି ମନ୍ଧାନା ସବୁଠୁ ଦାମୀ ଖେଳାଳି ଭାବେ ଉଭା ହୋଇଛନ୍ତି । ତାଙ୍କୁ ନେବା ପାଇଁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ଓ ମୁମ୍ବାଇ ଇଣ୍ଡିଆନ୍ସ ମଧ୍ୟରେ କଡ଼ ଟକ୍କର ହୋଇଥିଲା । ଶେଷରେ ଆରସିବି ୩.୪୦ କୋଟି ଟଙ୍କା (୪୧୦,୦୦୦ ଡଲାର)ରେ ମନ୍ଧାନାଙ୍କୁ କିଣିଥିଲା ।
ଭାରତୀୟ ଅଧିନାୟକ ହରମନପ୍ରୀତ କୌରଙ୍କୁ କିନ୍ତୁ ମନ୍ଧାନାଙ୍କ ଠାରୁ କମ୍ ମୂଲ୍ୟ ପାଇଛନ୍ତି । ତାଙ୍କୁ ମୁମ୍ବାଇ ଇଣ୍ଡିଆନ୍ସ ୧.୮୦ କୋଟି ଟଙ୍କାରେ କିଣିଛି, ଯାହାକି ମନ୍ଧାନା ପାଇଥିବା ମୂଲ୍ୟର ଅଧା ଅଟେ। ଏହାଛଡ଼ା କୌର ମୁମ୍ବାଇ ଦଳର ସବୁଠାରୁ ମହଙ୍ଗା ଖେଳାଳି ବି ନୁହଁନ୍ତି । କାରଣ ମୁମ୍ବାଇ ଟିମ୍ ଇଂଲଣ୍ଡର ନାଟ୍ ସ୍କିଭର ବ୍ରଣ୍ଟକୁ ସର୍ବାଧିକ ୩.୨୦ କୋଟି ଟଙ୍କାରେ କିଣିଥିଲା ।
ବାସ୍ତବରେ ହରମନପ୍ରୀତ ଭାରତୀୟ ଖେଳାଳିଙ୍କ ମଧ୍ୟରେ ଶ୍ରେଷ୍ଠ ଚାରି ଖେଳାଳିଙ୍କ ମଧ୍ୟରେ ବି ନାହାଁନ୍ତି । କାରଣ ଦ୍ୱିତୀୟ ମହଙ୍ଗା ଭାରତୀୟ ଖେଳାଳି ହେଉଛନ୍ତି ଅଲରାଉଣ୍ଡର ଦୀପ୍ତି ଶର୍ମା, ଯାହାଙ୍କୁ ୟୁପି ୱାରିୟର୍ସ ୨.୬ କୋଟି ଟଙ୍କାରେ କିଣିଥିଲା ।
ଦ୍ରୁତ ବ୍ୟାଟିଂ ପାଇଁ ଜଣାଶୁଣା ଯୁବ ଖେଳାଳି ଶେଫାଳି ବର୍ମା ଏବଂ ରବିବାର ଦିନ ପାକିସ୍ତାନ ବିପକ୍ଷ ବିଶ୍ୱ ଟି-୨୦ ବିଶ୍ବକପ ମ୍ୟାଚର ତାରକା ଥିବା ଜେମିମା ରଡ୍ରିଗ୍ବେଜଙ୍କୁ ଯଥାକ୍ରମେ ଦିଲ୍ଲୀ କ୍ୟାପିଟାଲ୍ସ ଯଥାକ୍ରମେ ୨ କୋଟି ଏବଂ ୨.୨୦ କୋଟିରେ କିଣିଛି ।
ଦିଲ୍ଲୀ କ୍ୟାପିଟାଲ୍ସ ପାଇଁ ଶ୍ରେଷ୍ଠ ଡିଲ୍ ଥିଲା ସମସାମୟିକ ମହିଳା କ୍ରିକେଟର ଜଣେ ମହାନ୍ ଖେଳାଳି ଅଷ୍ଟ୍ରେଲିଆର ମେଗ୍ ଲାନ୍ନିଙ୍ଗଙ୍କୁ ୧.୧୦ କୋଟି ଟଙ୍କାରେ କିଣିବା।
ଆରସିବିର କ୍ରିକେଟ୍ ନିର୍ଦ୍ଦେଶକ ମାଇକ୍ ହେସନ୍ ତାଙ୍କର ପ୍ରିୟ ଖେଳାଳି କିଣିବା ପରେ ଗଣମାଧ୍ୟମକୁ କହିଛନ୍ତି, “ସମସ୍ତେ ମନ୍ଧାନା ଏବଂ ଏଲିସେ ପେରିଙ୍କୁ ଜାଣନ୍ତି, ଆମେ କିଛି ଖେଳାଳି ପାଇବାକୁ ନିଷ୍ପତ୍ତି ନେଇଥିଲୁ। ଏହିପରି ଚମତ୍କାର ଖେଳାଳି କିଣି ଆମେ ବହୁତ ଖୁସି | ଦଳରେ ମନ୍ଧାନା, ପେରି ଏବଂ ସୋଫି ଡିଭାଇନ୍ ଭଳି ଖେଳାଳିଙ୍କୁ ସାମିଲ କରିବା ଏକ ସ୍ୱପ୍ନିଳ ଫଳାଫଳ ଥିଲା | ,
“ସ୍ମୃତିଙ୍କର ଅଧିନାୟକ ଅଭିଜ୍ଞତା ରହିଛି ଏବଂ ସେ ଭାରତୀୟ ପରିବେଶ ସହିତ ଅତି ପରିଚିତ, ତେଣୁ ସମସ୍ତ ସମ୍ଭାବନା ଅଛି (ସେ ଅଧିନାୟକ ହେବେ) |
ମନ୍ଧାନା ତାଙ୍କ ଦଳ ସହିତ ଦକ୍ଷିଣ ଆଫ୍ରିକାରେ ନିଲାମ ଦେଖୁଥିଲେ। ସେ କହିଛନ୍ତି, “ଆମେ ପୁରୁଷ ଖେଳାଳିଙ୍କ ନିଲାମ ମଧ୍ୟ ଦେଖିଛୁ। ମହିଳା ଖେଳାଳିଙ୍କ ପାଇଁ ଏହିପରି ନିଲାମ ହେବା ଏକ ବଡ଼ ମୁହୂର୍ତ୍ତ | ଏହି ସମ୍ପୂର୍ଣ୍ଣ ପ୍ରକ୍ରିୟା ବହୁତ କଡ଼ା | ଆରସିବି ଏକ ବଡ ଟିମ୍ ଏବଂ ସେମାନଙ୍କର ବହୁତ ବଡ ଫ୍ୟାନ୍ ବେସ୍ ମଧ୍ୟ ରହିଛି | ଆଶା କରୁଛି ଆମେ ଏକ ବଡ଼ ଦଳ ଗଢ଼ିପାରିବୁ ବୋଲି ମନ୍ଧାନା କହିଛନ୍ତି।
ନିଲାମର ପ୍ରଥମ ରାଉଣ୍ଡରେ ଅଷ୍ଟ୍ରେଲିୟ ଅଫ୍ ସ୍ପିନ୍ ଅଲରାଉଣ୍ଡର ଆଶଲି ଗାର୍ଡନର୍ଙ୍କୁ ଶିଳ୍ପପତି ଗୌତମ ଆଦାନୀଙ୍କ ଗୁଜୁରାଟ ଜାଏଣ୍ଟସ୍ ୩.୨୦ କୋଟି (୩୮୬,୦୦୦ ଡଲାର) ରେ କିଣିଛି। ଗାର୍ଡନର୍ ଏବଂ ନାଟ୍ ସ୍କ୍ରିଭର ସର୍ବାଧିକ ପାରିଶ୍ରମିକ ପ୍ରାପ୍ତ ବିଦେଶୀ ଖେଳାଳି ହୋଇଛନ୍ତି |
ଅଷ୍ଟ୍ରେଲିଆର ଷ୍ଟାର୍ ଅଲରାଉଣ୍ଡର ଏଲିସେ ପେରି ୧.୭୦ କୋଟି (୨୦୫,୦୦୦ ଡଲାର) ରେ ଆରସିବିକୁ ବିକ୍ରି ହୋଇଛନ୍ତି । ନ୍ୟୁଜିଲ୍ୟାଣ୍ଡର ଅଧିନାୟକ ସୋଫି ଡିଭାଇନଙ୍କୁ ମଧ୍ୟ ଆରସିବି ୫୦ ଲକ୍ଷ ଟଙ୍କା ଶସ୍ତା ‘ବେସ୍ ପ୍ରାଇସ୍’ ରେ ହିଁ ନିଜ ଦଳରେ ସାମିଲ କରିବାରେ ସଫଳ ହୋଇଥିଲା ।
ୟୁପି ୱାରିୟର୍ସ ଇଂଲଣ୍ଡର ବାମହାତୀ ସ୍ପିନର ସୋଫି ଏକ୍ଲେଷ୍ଟୋନଙ୍କୁ ୧.୮୦ କୋଟି ଟଙ୍କାରେ ନିଜ ଦଳରେ ସାମିଲ କରିଛି ।
