ମଦ କାଉଣ୍ଟରରେ ଲଙ୍କାକାଣ୍ଡ; ନିଅଁ ଲଗାଇଦେଲେ ଦୁର୍ବୃତ୍ତ
ବାଲେଶ୍ୱର : ମଦ କାଉଣ୍ଟରରେ ଲଙ୍କାକାଣ୍ଡ। ରବିବାର ବିଳମ୍ବିତ ରାତିରେ ରବି ପ୍ଲାଜାକୁ କେହି ଦୁର୍ବୃତ୍ତ ନିଆଁ ଲଗାଇ ଜାଳି ଦେଇଛନ୍ତି। ଏଥିସହିତ ମଦ କାଉଣ୍ଟରର ମାଲିକଙ୍କ ୪ ଚକିଆ ଗାଡିକୁ ମଧ୍ୟ ଜାଳି ଦେଇଛନ୍ତି। ଏହି ଘଟଣା ଖନ୍ତାପଡା ଥାନା ଅନ୍ତର୍ଗତ ନଇଛନପୁର ଗ୍ରାମରେ ନିକଟରେ ଘଟିଛି। ସନ୍ଦେହରେ ଖନ୍ତାପଡା ପୋଲିସ କିଛି ସ୍ଥାନୀୟ ଅଞ୍ଚଳବାସୀଙ୍କୁ ଅଟକ ରଖି ପଚରାଉଚରା କରୁଛି।
ସୂଚନା ଯେ, ଖନ୍ତାପଡ଼ା ଥାନା ନଇଛନପୁର ଗ୍ରାମରେ ଥିବା ରବି ପ୍ଲାଜାର ମଦ କାଉଣ୍ଟରକୁ କିଛି ଅଜ୍ଞାତ ଲୋକେ ନିଆଁ ଲଗାଇଦେଇଛନ୍ତି। ଫଳରେ ଲକ୍ଷାଧିକ ଟଙ୍କାର ମଦ, ଆସବାପତ୍ର ପୋଡି ପାଉଁଶ ହୋଇଯାଇଛି। ମାଲିକଙ୍କ କାରକୁ ମଧ୍ୟ ଦୁର୍ବୃତ ପୋଡି ଭସ୍ମୀଭୂତ କରିଦେଇଛନ୍ତି। ମଦ କାଇଣ୍ଟର ମାଲିକଙ୍କ ଅଭିଯୋଗକ୍ରମେ କିଛି ଅଞ୍ଚଳବାସୀଙ୍କୁ ଅଟକ ରଖି ଖନ୍ତାପଡ଼ା ପୋଲିସ ତଦନ୍ତ ଜାରି ରଖିଛି। ପୂର୍ବରୁ ନିକଟସ୍ଥ ଗ୍ରାମଵାସୀଙ୍କ ବିରୋଧ ଯୋଗୁଁ ରବି ପ୍ଲାଜାର ମଦ କାଉଣ୍ଟରକୁ ବନ୍ଦ କରାଯାଇଥିଲା। ତିନି ମାସ ଏହି ମଦ କାଉଣ୍ଟର ବନ୍ଦ ରହିବା ପରେ ହାଇକୋର୍ଟଙ୍କ ନିର୍ଦେଶ କ୍ରମେ ଅଗଷ୍ଟ ୨୭ରେ ପୁଣି ଖୋଲା ଯାଇଥିଲା। ଏହି ସମୟରେ ଘଟଣା ସ୍ଥଳରେ ସ୍ଥାନୀୟ ତହସିଲଦାର ଓ ଖନ୍ତାପଡା ପୋଲିସ ଉପସ୍ଥିତ ଥିଲା। ଅନ୍ୟପଟେ ମଦକାଉଣ୍ଟର ଜାଳିଥିବା ଅଭିଯୋଗରେ ପୋଲିସ କିଛି ନିର୍ଦୋଷ ଲୋକଙ୍କୁ ଉଠାଇନେଇଥିବା ନେଇ ଉତେଜନା ଦେଖିବାକୁ ମିଳିଛି।
