ଭଗବାନ ଗଣେଶଙ୍କ ପୂଜାରେ କାହିଁକି ଗୁରୁତ୍ୱପୂର୍ଣ୍ଣ ଦୁବ ଘାସ? ଜାଣନ୍ତୁ ଏହା ପଛର କାହାଣୀ

ଭାଦ୍ରବ ମାସ ଶୁକ୍ଲପକ୍ଷ ଚତୁର୍ଥୀ ତିଥିକୁ ‘ଗଣେଶ ଚତୁର୍ଥୀ’ ରୂପେ ପାଳନ କରାଯାଇଥାଏ । ଏହି ଦିନରେ ପ୍ରଭୁ ଶ୍ରୀଗଣେଶ ଜନ୍ମ ନେଇଥିବାର ମାନ୍ୟତା ରହିଛି । ଯେଉଁଥିପାଇଁ ଏହି ଦିନରେ ତାଙ୍କର ଜନ୍ମୋତ୍ସବ ପାଳନ କରାଯାଇଥାଏ । ଚଳିତଥର ଅଗଷ୍ଟ ୩୧ ତାରିଖରେ ପଡୁଛି ଗଣେଶ ଚତୁର୍ଥୀ । କୁହାଯାଏ ଭଗବାନ ଗଣେଶଙ୍କୁ ଆରାଧନା କରିବା ଦ୍ୱାରା ସୁଖ, ସମୃଦ୍ଧି ଓ ବୈଭବ ଆଦି ପ୍ରାପ୍ତି ହୁଏ ।

ହିନ୍ଦୁ ଧର୍ମରେ ପ୍ରତ୍ୟେକ ଦେବତାଙ୍କୁ ସନ୍ତୁଷ୍ଟ କରିବା ପାଇଁ ସେମାନଙ୍କ ପୂଜା ବିଧି ଏବଂ ପୂଜା ସାମଗ୍ରୀ ଭିନ୍ନ ଅଟେ। ହିନ୍ଦୁ ଧର୍ମରେ ଭଗବାନ ଗଣେଶଙ୍କୁ ପ୍ରଥମ ଦେବତା ଭାବରେ ବିବେଚନା କରାଯାଏ। କୌଣସି ଶୁଭ କାର୍ଯ୍ୟ, ଧାର୍ମିକ କାର୍ଯ୍ୟ ବା ମଙ୍ଗଳ କାର୍ଯ୍ୟରେ ପ୍ରଭୁ ଗଣେଶଙ୍କୁ ପ୍ରଥମେ ପୂଜା କରାଯାଏ। ଭଗବାନ ଗଣେଶଙ୍କୁ ବିଘ୍ନ ବିନାଶକ କୁହାଯାଏ। ତେଣୁ ତାଙ୍କୁ ପ୍ରଥମେ ପୂଜା କରାଯାଏ ଯେପରି କୌଣସି ପ୍ରକାର ବାଧାବିଘ୍ନ ଶୁଭ କାର୍ଯ୍ୟରେ ନ ଆସେ।

ଭଗବାନ ଗଣେଶଙ୍କ ପୂଜାରେ ନିଶ୍ଚିତ ଭାବରେ ଦୁବ ଘାସ ଅର୍ପଣ କରାଯାଏ। ତେବେ ଆସନ୍ତୁ ଜାଣିବା ଭଗବାନ ଗଣେଶଙ୍କୁ କାହିଁକି ଦୁବ ଘାସ ଅର୍ପଣ କରାଯାଏ। ଏହା ପଛର କାରଣ କ’ଣ…..

କିମ୍ବଦନ୍ତୀ ଅନୁଯାୟୀ, ଅନଲାସୁର ନାମକ ଏକ ରାକ୍ଷସ ଥିଲା। ତା’ର ଆତଙ୍କରେ ସମସ୍ତ ଦେବାଦେବୀ ବହୁତ ବିଚଳିତ ହୋଇଯାଇଥିଲେ। କୌଣସି ଦେବତା ଏହି ରାକ୍ଷସକୁ ମାରିବାକୁ ସକ୍ଷମ ହେଲେ ନାହିଁ। ତେଣୁ ଅନଲାସୁର ରାକ୍ଷସ କବଳରୁ ବର୍ତ୍ତିବା ପାଇଁ ସମସ୍ତ ଦେବାଦେବୀ ଭଗବାନ ଗଣେଶଙ୍କ ଆଶ୍ରୟ ନେଲେ। ସେତେବେଳେ ଭଗବାନ ଗଣେଶ ଅନଲାସୁରଙ୍କୁ ଗିଳି ଦେଇଥିଲେ। ଅନଲାସୁର ଗିଳିବା କାରଣରୁ ଭଗବାନ ଗଣେଶ ପେଟରେ ଜ୍ୱଳା ବା ଯନ୍ତ୍ରଣା ଅନୁଭବ କଲେ। ପେଟର ଜ୍ବଳାକୁ ଶାନ୍ତ କରିବା ପାଇଁ ସାଧୁ ଓ ମୁନୀ ଋଷିଗଣ ତାଙ୍କୁ ଘାସ ଖାଇବାକୁ ଦେଲେ। ଏହାକୁ ଖାଇବା ପରେ ଭଗବାନ ଗଣେଶଙ୍କ ପେଟର ଜ୍ୱଳା ବା ଯନ୍ତ୍ରଣା ଦୂର ହେଲା। ସେବେଠାରୁ ତାଙ୍କୁ ଭଗବାନ ଗଣେଶଙ୍କ ପୂଜାରେ ଦୁବ ଘାସ ଅର୍ପଣ କରାଯାଇଆସୁଛି।

ଦୁବ ଘାସ ଅର୍ପଣର ନିୟମ :

ଭଗବାନ ଗଣେଶଙ୍କ ଉପାସନା ଏବଂ ପୂଜାରେ ଦୁବ ଘାସ ଅର୍ପଣ କରିବା ଦ୍ବାରା ସୁଖ-ଶାନ୍ତି ଏବଂ ଧନ ବୃଦ୍ଧି ହୋଇଥାଏ। ପୂଜାରେ, ଦୁବର ଯୋଡି ବା ଗୁଚ୍ଛା ତିଆରି କରି ଭଗବାନଙ୍କୁ ଅର୍ପଣ କରାଯାଏ। ଭଗବାନ ଗଣେଶଙ୍କୁ ୧୧ଟି ଯୋଡି ବା ଗୁଚ୍ଛା ଦୁବ ଘାସ ଅର୍ପଣ କରାଯିବା ଉଚିତ୍। ପରିଷ୍କାର ସ୍ଥାନରୁ ଦୁବ ଘାସ ସଂଗ୍ରହ କରନ୍ତୁ। ଦୁବ ଘାସ ଅର୍ପଣ କରିବାବେଳେ ଗଣେଶଙ୍କର ୧୧ଟି ମନ୍ତ୍ର ପାଠ କରାଯିବା ଉଚିତ୍।