ସୋସିଆଲ ମିଡ଼ିଆରେ ମାତାଲ ଶିକ୍ଷକଙ୍କ ଭିଡ଼ିଓ ଭାଇରାଲ ; କାର୍ଯ୍ୟାନୁଷ୍ଠାନ ପାଇଁ ଅଭିଭାବକ ଓ ଗ୍ରାମବାସୀଙ୍କ ଧାରଣା

ସିମୁଳିଆ : ବାଲେଶ୍ୱର ଜିଲା ସିମୁଳିଆ ବ୍ଲକ ଅଧୀନ ଭାରତ ସେବାନିଧି ଉଚ୍ଚ ବିଦ୍ୟାଳୟର ସରୋଜ କୁମାର ମଲିକ ନାମକ ଜଣେ ଶିକ୍ଷକଙ୍କ ଭିଡ଼ିଓ ସୋସିଆଲ ମିଡ଼ିଆରେ ଘୁରୁ ବୁଲୁଛି । ଏହାକୁ କେନ୍ଦ୍ରକରି ଶୁକ୍ରବାର ମଧ୍ୟାହ୍ନରେ କେତେକ ଅଭିଭାବକ ଓ ସ୍ଥାନୀୟ ଗ୍ରାମବାସୀ ଏହି ଶିକ୍ଷକଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ଦାବୀରେ ବିଦ୍ୟାଳୟ ଫାଟକ ନିକଟରେ ଧାରଣାରେ ବସିଥିଲେ । ଅପରାହ୍ନରେ ଗୋଷ୍ଠୀ ଶିକ୍ଷା ଅଧିକାରୀ (ବିଇଓ) ପ୍ରକାଶ ଚନ୍ଦ୍ର ମହାଳିକ ଧାରଣା ସ୍ଥଳରେ ପହଞ୍ôଚ ଜିଲା ଶିକ୍ଷା ଅଧିକାରୀ (ଡିଇଓ)ଙ୍କୁ ଫୋନ୍ ଯୋଗେ ସୂଚନା ଦେଇଥିଲେ । ଆସନ୍ତା ୩ଦିନ ମଧ୍ୟରେ ଉକ୍ତ ଶିକ୍ଷକଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାର ପ୍ରତିଶୃତି ଦିଆଯିବା ପରେ ଧାରଣା ପ୍ରତ୍ୟାହୃତ ହୋଇଥିଲା ।

ସୂଚନାଯେ ଉକ୍ତ ଭିଡ଼ିଓରେ ଶିକ୍ଷକ ମଲିକ ସ୍କୁଲ ଡ୍ରେସ ପିନ୍ଧି ମାତାଲ ଅବସ୍ଥାରେ ତଳେ ପଡ଼ିଛନ୍ତି । ପାଦରୁ ତାଙ୍କ ଯୋତା ବାହାରି ପାଖରେ ପଡ଼ିଥିବା ବେଳେ ଅନ୍ୟ କେତେକ ଯୁବକ ପାଖ ଟେବୁଲରେ ମୁଣ୍ଡ ରଖି ଶୋଇ ଥିବାର ଦେଖାଯାଇଛ । ଏହା କୌଣସି ଏକ ଢାବା କିମ୍ବା ହୋଟେଲ ବୋଲି ସୂଚନା ମିଳିଛି । ସୂଚନା ଯେ, ଉକ୍ତ ଶିକ୍ଷକ ଜଣଙ୍କ ପୂର୍ବରୁ ଜଣେ ଛାତ୍ରୀଙ୍କ ଅଭିଭାବକଙ୍କ ମୋବାଇଲକୁ ଅଶ୍ଳୀଳ ମେସେଜ ପଠାଇବା ଓ ପୂର୍ବତନ ପ୍ରଧାନଶିକ୍ଷକଙ୍କୁ ଅସୌଜନ୍ୟବ୍ୟବହାର ପ୍ରଦର୍ଶନ କରିବା ସମ୍ପର୍କରେ ଥାନା, ଜିଲାପାଳ ଓ ଶିକ୍ଷାଅଧିକାରୀଙ୍କ ନିକଟରେ ଅଭିଯୋଗ ହୋଇଥିଲା ।