ଉତ୍ତର ପ୍ରଦେଶ ବିଧାନସଭା ନିର୍ବାଚନ : ୧୦୦ ଆସନରେ ଲଢିବ ଏଆଇଏମଏମ
ହାଇଦ୍ରାବାଦ : ଉତ୍ତର ପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ଅଲ୍ ଇଣ୍ଡିଆ ମଜଲିସ୍-ଇ-ଇଥେହାଦ୍-ଉଲ୍-ମୁସଲିମେନ (ଏଆଇଏମଏମ)ର ମୁଖ୍ୟ ଓଓ୍ବେସୀ ବଡ ଘୋଷଣା କରିଛନ୍ତି । ମୋଟ ୪୦୩ ବିଧାନସଭା ଆସନ ମଧ୍ୟରୁ ୧୦୦ଟି ଆସନରେ ତାଙ୍କ ଦଳ ନିର୍ବାଚନ ଲଢିବ ବୋଲି ସୂଚନା ଦେଇଛନ୍ତି ଏଆଇଏମଏମ ମୁଖ୍ୟ ଅସାଦୁଦ୍ଦିନ ଓଓ୍ବେସୀ ।
ଲକ୍ଷ୍ନୌରେ ଏଆଇଏମଏମ ମୁଖ୍ୟ ଅସାଦୁଦ୍ଦିନ ଓଓ୍ବେସୀ କହିଛନ୍ତି, ଏଆଇଏମଏମ ୧୦୦ଟି ଆସନରେ ନିର୍ବାଚନ ଳଢିବାକୁ ନିଷ୍ପତ୍ତି ନେଇଥିବାବେଳେ ଗୋଟିଏ କିମ୍ବା ଦୁଇଟି ଦଳ ସହ ମେଣ୍ଟ ନେଇ ଆଲୋଚନା ମଧ୍ୟ ଜାରି ରହିଛି । ମେଣ୍ଟ ହେବକି ନାହିଁ ତାହା ଆଗାମି ଦିନରେ ସ୍ପଷ୍ଟ ହେବ । କିନ୍ତୁ ପୂର୍ବାପେକ୍ଷା ଉତ୍ତର ପ୍ରଦେଶରେ ଏଆଇଏମଏମ ସ୍ଥିତି ସୁଧୁରିଛି ବୋଲି କହିଛନ୍ତି ଓଓ୍ବେସୀ । ସେହିପରି ରାଷ୍ଟ୍ରୀୟ ଲୋକ ଦଳ (ଆରଏଲଦି) ସମାଜବାଦୀ ପାର୍ଟି (ଏସପି) ସହ ମେଣ୍ଟ ଗଠନ କରିବାକୁ ସୂଚନା ଦେଇଛି । ଏହି ପ୍ରସଙ୍ଗରେ ଦଳର ସଭାପତି ଜୟନ୍ତ ଚୌଧୁରୀ କହିଛନ୍ତି ଯେ ଏହି ମାସ ଶେଷ ସୁଦ୍ଧା ଦୁଇ ଦଳ ସାଙ୍ଗ ହୋଇ ନିର୍ବାଚନ ଲଢିବେ କି ନାହିଁ ତାହା ସ୍ପଷ୍ଟ ହୋଇଯିବ । ଏହି ପ୍ରସ୍ତାବ ଉପରେ ଉଭୟ ଦଳ ବିଚାରବିମର୍ଶ ଜାରି ରଖିଛନ୍ତି । ସୂଚନା ଯେ, ଗତ ୨୦୧୭ ଉତ୍ତର ପ୍ରଦେଶ ବିଧାନସଭା ନିର୍ବାଚନରେ ଭାରତୀୟ ଜନତା ପାର୍ଟି ମୋଟ ୪୦୩ ଆସନରୁ ୩୨୨ଟି ଆସନରେ ବୃହତ ବିଜୟ ସହ କ୍ଷମତାକୁ ଆସିଥିଲା । ସେହିପରି ସମାଜବାଦୀ ପାର୍ଟି ୪୭ଟି ଆସନ, ବହୁଜନ ସମାଜବାଦୀ ପାର୍ଟି ୧୯ଟି ଆସନ ହାତେଇବାରେ ସଫଳ ହୋଇଥିଲେ । କିନ୍ତୁ କଂଗ୍ରେସ ନୈରାଶଜନକ ଭାବେ ମାତ୍ର ୭ ଆସନରେ ସନ୍ତୁଷ୍ଟ ହେବାରେ ବାଧ୍ୟ ହୋଇଥିଲା ।
