ତ୍ରିପୁରା ନିର୍ବାଚନ : ବିଜେପି ଘୋଷଣା କଲା ପ୍ରଥମ ପ୍ରାର୍ଥୀ ତାଲିକା
ଅଗରତାଲା : ତ୍ରିପୁରା ବିଧାନସଭା ନିର୍ବାଚନ ୨୦୨୩ ପାଇଁ ବିଜେପି ନିଜ ପ୍ରଥମ ପ୍ରାର୍ଥୀ ତାଲିକା ଜାରି କରିଛି। ପ୍ରଥମ ତାଲିକାରେ ୪୮ଟି ବିଧାନସଭା ଆସନ ପାଇଁ ପ୍ରାର୍ଥୀଙ୍କ ନାମ ଘୋଷଣା କରାଯାଇଛି। ଏହି ତାଲିକାରେ ପୂର୍ବତନ ମୁଖ୍ୟମନ୍ତ୍ରୀ ବିପ୍ଲବ ଦେବଙ୍କ ନାମ ନାହିଁ । ସେ ଏଥର ନିର୍ବାଚନ ଲଢ଼ିବେ ନାହିଁ ବୋଲି ଚର୍ଚ୍ଚା ହେଉଛି । ତାଙ୍କ ଆସନ ବନମାଳିପୁରରୁ ବିଜେପି ରାଜ୍ୟ ସଭାପତି ରାଜୀବ ଭଟ୍ଟାଚାର୍ଜୀଙ୍କୁ ପ୍ରାର୍ଥୀ କରାଯାଇଛି ।
ଟାଉନ ବୋର୍ଡୋବଲି ବିଧାନସଭା ଆସନରୁ ମୁଖ୍ୟମନ୍ତ୍ରୀ ମାଣିକା ଶାହାଙ୍କୁ ପ୍ରାର୍ଥୀ କରାଯାଇଛି। କେନ୍ଦ୍ର ମନ୍ତ୍ରୀ ପ୍ରତୀମା ଭୌମିକଙ୍କ ନାମ ମଧ୍ୟ ଏହି ତାଲିକାରେ ରହିଛି। ସେ ଧନପୁର ଆସନରୁ ପ୍ରାର୍ଥୀ ହୋଇଛନ୍ତି । ତ୍ରିପୁରାରେ ୬୦ଟି ଆସନ ପାଇଁ ଫେବୃଆରୀ ୧୬ରେ ମତଦାନ ଅନୁଷ୍ଠିତ ହେବ। ମାର୍ଚ୍ଚ ୨ ରେ ଭୋଟ ଗଣତି ହେବ। ତ୍ରିପୁରା ବିଧାନସଭାର କାର୍ଯ୍ୟକାଳ ମାର୍ଚ୍ଚ ୨୨ରେ ଶେଷ ହେଉଛି ।
ତ୍ରିପୁରା ନିର୍ବାଚନ ପାଇଁ ଜାନୁଆରୀ ୨୧ରେ ବିଜ୍ଞପ୍ତି ଜାରି କରାଯାଇଥିଲା । ନାମାଙ୍କନ ଦାଖଲ କରିବାର ଶେଷ ତାରିଖ ହେଉଛି ଜାନୁଆରୀ ୩୦ । ଫେବୃଆରୀ ୨ ପର୍ଯ୍ୟନ୍ତ ନାମାଙ୍କନ ପ୍ରତ୍ୟାହାର କରାଯାଇପାରିବ ।
ତ୍ରିପୁରାରେ ବିଜେପି ଗତ ୧୦ ବର୍ଷ ଧରି କ୍ଷମତାସୀନ ରହିଛି । କିନ୍ତୁ ଏଥର ବିଜେପି ଦୁଇଟି ଦଳରୁ କଡା ମୁକାବିଲାର ସାମ୍ନା ହୋଇପାରେ। ଗତ ଥର ବିଜେପି ଏକାକୀ ସଂଖ୍ୟାଗରିଷ୍ଠତା ହାସଲ କରିଥିଲା । କିନ୍ତୁ ବିଜେପି ଓ ସିପିଏମ୍ ମଧ୍ୟରେ ଭୋଟ୍ ସେୟାର ବ୍ୟବଧାନ ମାତ୍ର ୧.୨୫ ପ୍ରତିଶତ ଥିଲା। ବିଜେପି ୨୦୨୨ରେ ବିପ୍ଲବ ଦେବଙ୍କୁ ହଟାଇ ମାଣିକ ଶାହାଙ୍କୁ ମୁଖ୍ୟମନ୍ତ୍ରୀ କରିଥିଲା । କିନ୍ତୁ ଏହି ନିଷ୍ପତ୍ତି କେତେ ଠିକ୍ ଥିଲା ତାହା ଆଗାମୀ ନିର୍ବାଚନରେ ଜଣାପଡିବ।
