ଟୋକିଓ ଅଲିମ୍ପିକ୍ସ : କ୍ୱାର୍ଟର୍ରେ ପରାସ୍ତ ହେଲେ ଭାରତର ବିନେଶ ଫୋଗାଟ୍
ଟୋକିଓ : ୫୩ କେଜି କ୍ୱାର୍ଟର୍-ଫାଇନାଲ୍ରେ ଗୁରୁ୍ୱାର ଭାରତୀୟ କୁସ୍ତି ଖେଳାଳି ବିନେଶ ଫୋଗାଟ୍ ବେଲାରୁସ୍ର ବାନେସା କାଲାଦଜିନ୍ସକାୟାଙ୍କ ଠାରୁ ୧-୪ରେ ପରାସ୍ତ ହୋଇଛନ୍ତି । ଏଥିସହ ସେ କେବଳ ସ୍ୱର୍ଣ୍ଣପଦକ ଆଶାରୁ ବଂଚିତା ହୋଇ ନାହାନ୍ତି, ପ୍ରତିଯୋଗିତାରୁ ବିତାଡ଼ିତ ହେବାର ଆଶଙ୍କା ମଧ୍ୟ ଦେଖାଦେଇଛି ।
ୟୁରୋପୀୟ ଚାମ୍ପିଅନ୍ ଏଭଳି ନିପୂଣା ଭାବେ ତାଙ୍କର କ୍ରୀଡ଼ାକୌଶଳ ପ୍ରଦର୍ଶନ କଲେ ଯେ, ଯେତେ ଉଦ୍ୟମ କଲେ ମଧ୍ୟ ବିନେଶ ତାଙ୍କ କବଳରୁ ମୁକ୍ତ ହୋଇ ପାରିଲେ ନାହିଁ । ତାଙ୍କ ଅକ୍ତିଆରରେ ଥାଇ ବିନେଶ ଏକପ୍ରକାର ନିରୂପାୟ ହୋଇପଡ଼ିଲେ । ବିନେଶ ବାନେସାଙ୍କ ପଛପଟକୁ ଯାଇ ମଧ୍ୟ ତାଙ୍କ ଆଣ୍ଠୁକୁ ଭୂଇଁରେ ମାଡ଼ି ଲଗାଇ ପାରିଲେ ନାହିଁ । ଅସୀମ ଶକ୍ତି ପ୍ରଦର୍ଶନ କରି ବାନେସା ଦୃଢ଼ ଭାବେ ଠିଆ ହୋଇ ରହିଥିଲେ । ପ୍ରସିଦ୍ଧ ‘ଡବଲ୍-ଲେଗ୍ ଆଟାକ୍’ କରି ମଧ୍ୟ ବିନେଶ ବାନେସାଙ୍କୁ ଅକ୍ତିଆର କରି ପାରିଲେନାହିଁ । ଏହା ପୂର୍ବରୁ ବିନେଶ ରିଓ ଅଲିମ୍ପିକ୍ କାଂସ୍ୟପଦକ ବିଜୟିନୀ ସୋଫିଆ ମ୍ୟାଟ୍ସନ୍ଙ୍କୁ ପ୍ରଶଂସନୀୟ ୭-୧ ପରାସ୍ତ କରି କ୍ୱାର୍ଟର୍-ଫାଇନାଲ୍କୁ ଉତୀର୍ଣ୍ଣ ହୋଇଥିଲେ । ଅନ୍ୟତମ ମହିଳା କୁସ୍ତି ଖେଳାଳି ଅଂଶୁ ମଲିକ ମଧ୍ୟ ପ୍ରତିଯୋଗିତାରେ ପରାସ୍ତ ହୋଇଛନ୍ତି ।
