ଆଜି ଭାରତ-ଶ୍ରୀଲଙ୍କା ଦ୍ୱିତୀୟ ଟି-୨୦, ଆହତ କାରଣରୁ ବାଦ ପଡିଲେ ଏହି ଖେଳାଳି

ନୂଆଦିଲ୍ଲୀ: ଆଜି ଭ୍ରମଣକାରୀ ଶ୍ରୀଲଙ୍କା ଓ ଭାରତ ମଧ୍ୟରେ ଦ୍ୱିତୀୟ ଟି-୨୦ ଖେଳାଯିବ। ଧର୍ମଶାଳାରେ ଶନିବାର ସନ୍ଧ୍ୟା ୭ଟାରେ ମ୍ୟାଚ ହେବ। ପ୍ରଥମ ଟି-୨୦ ଜିତିଥିବା ଟିମ୍ ଇଣ୍ଡିଆ ଦ୍ୱିତୀୟ ମ୍ୟାଚ ଜିତି ତିନି ମ୍ୟାଚ ବିଶିଷ୍ଟ ସିରିଜକୁ କବଜା କରିବାକୁ ଲକ୍ଷ୍ୟ ରଖିଛି। ଅନ୍ୟପଟେ ଉଭୟ ଟିମର ଅନେକ ଖେଳାଳି ପ୍ରଥମ ମ୍ୟାଚ ପରେ ଏହି ସିରିଜରୁ ବାଦ ପଡିଛନ୍ତି।

ଟିମ୍ ଇଣ୍ଡିଆ କ୍ରମାଗତ ଭାବରେ ଫିଟନେସ୍ ସମସ୍ୟାର ସମ୍ମୁଖୀନ ହେଉଛି। ଆହତ କାରଣରୁ ଶ୍ରୀଲଙ୍କା ବିପକ୍ଷ ସିରିଜରୁ କେଏଲ ରାହୁଲ, ଭେଙ୍କଟେଶ ଆୟର, ଦୀପକ ଚହର, ସୂର୍ଯ୍ୟକୁମାର ଯାଦବଙ୍କ ସମେତ ଅନେକ ଖେଳାଳି ବାଦ ପଡିଛନ୍ତି। ବର୍ତ୍ତମାନ ଆହତ ଖେଳାଳିଙ୍କ ତାଲିକାରେ ଆଉ ଏକ ନାମ ଯୋଡା ଯାଇଛି। ଆହତ କାରଣରୁ ଶ୍ରୀଲଙ୍କା ବିପକ୍ଷ ଟି-୨୦ ସିରିଜରୁ ଭାରତୀୟ ଦଳର ଓପନର୍ ଋତୁରାଜ ଗାଇକୱାଡଙ୍କୁ ବାଦ୍ ଦିଆଯାଇଛି।

କ୍ରିକବଜ୍ ଅନୁଯାୟୀ ଋତୁରାଜ ଗାଇକୱାଡ ଶ୍ରୀଲଙ୍କା ବିପକ୍ଷ ଦ୍ୱିତୀୟ ଏବଂ ତୃତୀୟ ଟି-୨୦ମ୍ୟାଚ୍ ଖେଳିବେ ନାହିଁ। ତାଙ୍କ ସ୍ଥାନରେ ମୟଙ୍କ ଅଗ୍ରୱାଲଙ୍କୁ ସ୍ଥାନ ଦିଆଯାଇଛି। ଲକ୍ଷ୍ନୌରେ ଖେଳାଯାଇଥିବା ସିରିଜର ପ୍ରଥମ ମ୍ୟାଚ୍ ପୂର୍ବରୁ ତାଙ୍କ ଡାହାଣ ହାତଗୋଡ଼ରେ ଆଘାତ ଲାଗିଥିଲା। ଏବେ ଖବର ଆସୁଛି ଯେ ସେ ପୁରା ସିରିଜରୁ ବାହାରିଛନ୍ତି। ସେପଟେ ଚଣ୍ଡିଗଡ଼ରେ ଟେଷ୍ଟ ସିରିଜ୍ ପାଇଁ ପ୍ରସ୍ତୁତି କରିବାରେ ବ୍ୟସ୍ତ ଥିବା ମୟଙ୍କ ଅଗ୍ରୱାଲଙ୍କୁ ଧର୍ମଶାଳା ପଠାଯାଇଛି।

ଅନ୍ୟପଟେଟିମ୍ ଇଣ୍ଡିଆ ବିପକ୍ଷ ଟି-୨୦ ସିରିଜର ଆରମ୍ଭ ଶ୍ରୀଲଙ୍କା ପାଇଁ ଭଲରେ ଚାଲି ନଥିଲା। ଲକ୍ଷ୍ନୌରେ ଖେଳାଯାଇଥିବା ପ୍ରଥମ ଟି-୨୦ରେ ଶ୍ରୀଲଙ୍କା ୬୨ ରନ୍ ହରାଇଥିଲା। ହାମଷ୍ଟ୍ରିଂ ଆଘାତ ହେତୁ ଏହାର ଦୁଇ ଖେଳାଳି ପୁରା ସିରିଜରୁ ବାଦ ପଡିଛନ୍ତି। ଶ୍ରୀଲଙ୍କା କ୍ରିକେଟ୍ ବୋର୍ଡ ଶୁକ୍ରବାର କହିଛି ଯେ, ଆହତ କାରଣରୁ କୁସାଲ ମେଁଡିସ ଏବଂ ମହିଷ ଥିକସାନାଙ୍କୁ ସମଗ୍ର ଟି-୨୦ ସିରିଜରୁ ବାଦ ଦିଆଯାଇଛି। ତାଙ୍କ ସ୍ଥାନରେ ଧନଞ୍ଜୟ ଦି ସିଲଭା ଏବଂ ନିରୋଶନ ଡିକୱେଲାଙ୍କୁ ଟିମରେ ସ୍ଥାନ ଦିଆଯାଇଛି।