ବାଲେଶ୍ୱର ଏସ୍ପି ସାଗରିକା ନାଥଙ୍କୁ ‘ଟାଇମ୍ସ ପାୱାର ୱିମେନ୍-୨୦୨୩’ ପୁରସ୍କାର
ବାଲେଶ୍ୱର : ବାଲେଶ୍ୱର ଜିଲା ବାହାନଗା ଟ୍ରେନ୍ ଟ୍ରାଜେଡ଼ିକୁ ସଫଳତାର ସହ ମୁକାବିଲା କରିବା ନେଇ ଜିଲା ଆରକ୍ଷୀ ଅଧୀକ୍ଷକ ସାଗରିକା ନାଥଙ୍କୁ ‘ଦ ଟାଇମ୍ସ ଗ୍ରୁପ୍’ ପକ୍ଷରୁ ‘ଟାଇମ୍ସ ପାୱାର୍ ୱିମେନ୍-୨୦୨୩’ ପୁରସ୍କାରରେ ସମ୍ମାନିତ କରାଯାଇଛି । ଭୁବନେଶ୍ୱର ସ୍ୱସ୍ତି ପ୍ରିମିୟମ୍ ଠାରେ ଗତ ବୁଧବାର ଅନୁଷ୍ଠିତ ଏକ କାର୍ଯ୍ୟକ୍ରମରେ ରାଜ୍ୟପାଳ ଗଣେଶୀ ଲାଲଙ୍କ ଉପସ୍ଥିତିରେ ସେ ଏହି ପୁରସ୍କାର ଅତିଥିଙ୍କ ଠାରୁ ଗ୍ରହଣ କରିଛନ୍ତି ।
ଜିଲା ଆରକ୍ଷୀ ଅଧୀକ୍ଷକ ସାଗରିକା ନାଥ ଉକ୍ତ ପୁରସ୍କାରକୁ ଟ୍ରେନ୍ ଟ୍ରାଜେଡ଼ିର ମୁକାବିଲା ପାଇଁ କରାଯାଇଥିବା ଟିମ୍ ୱାର୍କର ସମସ୍ତ ସଦସ୍ୟଙ୍କୁ ଉତ୍ସର୍ଗ କରିଥିବା ନେଇ ନିଜ ଟ୍ୱିଟର୍ ଆକାଉଣ୍ଟରେ ଜଣାଇଛନ୍ତି । ଏନେଇ ତାଙ୍କୁ ବିଭିନ୍ନ ମହଲରୁ ଶୁଭେଚ୍ଛା ଜଣାଇଛନ୍ତି । ସୂଚନା ଯେ, ଏହି ପୁରସ୍କାର ବିଭିନ୍ନ କ୍ଷେତ୍ରରେ ସଫଳତା ସାଉଁଟିଥିବା ରାଜ୍ୟର ୩୦ ଜଣ ମହିଳାଙ୍କୁ ପ୍ରଦାନ କରାଯାଇଥିବା ବେଳେ ଜିଲା ଆରକ୍ଷୀ ଅଧୀକ୍ଷକ ସାଗରିକା ନାଥ ସେମାନଙ୍କ ମଧ୍ୟରେ ରହିଥିଲେ ।
