ଟି-୨୦ ବିଶ୍ୱକପ୍ ପୂର୍ବରୁ ଶକ୍ତ ଝଟକା, ବ୍ୟାନ୍ ହେଲେ ଏହି ଷ୍ଟାର କ୍ରିକେଟର
ଇଂଲଣ୍ଡ ଏବଂ ଡରହମ ଫାଷ୍ଟ ବୋଲର ବ୍ରାଏଡନ୍ କାର୍ସଙ୍କୁ ବେଟିଂ ପାଇଁ ୩ ମାସ ପର୍ଯ୍ୟନ୍ତ କ୍ରିକେଟ୍ ର ସମସ୍ତ ଫର୍ମାଟରୁ ବ୍ୟାନ କରାଯାଇଛି। ଇଂଲଣ୍ଡ କ୍ରିକେଟ୍ ବୋର୍ଡ ତାଙ୍କୁ ୨୦୧୭ ରୁ ୨୦୧୯ ପର୍ଯ୍ୟନ୍ତ ୩୦୩ ଥର ବେଟିଂ କରିବାରେ ଦୋଷୀ ସାବ୍ୟସ୍ତ କରିଛନ୍ତି। ଏହା ପରେ ବୋର୍ଡର ଦୁର୍ନୀତି ନିବାରଣ ସଂସ୍ଥା ତାଙ୍କୁ ୧୬ ମାସ ଦଣ୍ଡ ଦେଇଥିଲା ଯେଉଁଥିରେ ତାଙ୍କୁ ୧୩ ମାସ ପାଇଁ ନିଲମ୍ବିତ କରାଯାଇଥିଲା। ବର୍ତ୍ତମାନ ସେ ୨୮ଅଗଷ୍ଟ ପର୍ଯ୍ୟନ୍ତ କୌଣସି ଫର୍ମାଟର କ୍ରିକେଟ୍ ଖେଳି ପାରିବେ ନାହିଁ । କାର୍ସ ତଦନ୍ତରେ ସହଯୋଗ କରିଛନ୍ତି ଏବଂ ତାଙ୍କ ବିରୋଧରେ ଆସିଥିବା ସମସ୍ତ ଅଭିଯୋଗକୁ ଗ୍ରହଣ କରିଛନ୍ତି। ପ୍ରକାଶ ଥାଉକି, ଏହା ମଧ୍ୟ ପ୍ରକାଶ ପାଇଛି ଯେ କାର୍ସ କେବଳ ସେହି ମ୍ୟାଚ୍ ଗୁଡିକରେ ବେଟିଂ କରୁଥିଲେ ଯେଉଁଥିରେ ସେ ଖେଳିନଥିଲେ ।
ବ୍ରାଏଡନ୍ କାର୍ସ ୨୦୨୧ ରେ ପାକିସ୍ତାନ ବିପକ୍ଷରେ ଡେବ୍ୟୁ କରିଥିଲେ। ସେବେଠାରୁ ସେ ୧୪ ଟି ODI ଏବଂ ୩ଟି -20 ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି। ସେ ODI ରେ ୧୫ ୱିକେଟ୍ ଏବଂ ଟି -20 ରେ ୪ ୱିକେଟ୍ ନେଇଛନ୍ତି। ଇଂଲଣ୍ଡ ଦ୍ୱାରା ୨୦୨୩ ODI ବିଶ୍ୱକପ୍ ଦଳରେ କାର୍ସ ମଧ୍ୟ ଅନ୍ତର୍ଭୁକ୍ତ ହୋଇଥିଲେ । ଜେମ୍ସ ଆଣ୍ଡରସନଙ୍କ ଅବସର ପରେ ସେ ୱେଷ୍ଟଇଣ୍ଡିଜ ଗସ୍ତରେ ମଧ୍ୟ ଟେଷ୍ଟ ଡେବ୍ୟୁ କରିବାକୁ ଯାଉଥିଲେ। ବର୍ତ୍ତମାନ ୨୮ ମେରୁ ୨୮ଅଗଷ୍ଟ ପର୍ଯ୍ୟନ୍ତ ନିଷେଧାଦେଶ ହେତୁ ସେ ଏହି ସୁଯୋଗକୁ ହରାଇବେ।
ତାଙ୍କ ଭୁଲ ପାଇଁ କାର୍ସ୍ ସମ୍ପୂର୍ଣ୍ଣ ଦାୟିତ୍ୱ ଗ୍ରହଣ କରିଥିଲେ ଏବଂ କହିଥିଲେ ଯେ ଯଦିଓ ସେ ଏହା ବହୁ ବର୍ଷ ପୂର୍ବେ କରିସାରିଛନ୍ତି, ତଥାପି ସେ ବୋର୍ଡ ସମ୍ମୁଖରେ ଏଥିପାଇଁ କୌଣସି ବାହାନା କରିବାକୁ ଚାହୁଁନାହାଁନ୍ତି। ସେମାନଙ୍କ ସମର୍ଥନ ପାଇଁ ସେ ECB, Durham Cricket ଏବଂ PCA କୁ ମଧ୍ୟ ଧନ୍ୟବାଦ ଜଣାଇଛନ୍ତି। ଏହି ପ୍ରତିବନ୍ଧକ ସମୟରେ ପ୍ରତ୍ୟାବର୍ତ୍ତନ ପାଇଁ ସେ କଠିନ ପରିଶ୍ରମ କରିବେ ବୋଲି କାର୍ସ କହିଛନ୍ତି।
ବ୍ରାଏଡନ୍ କାର୍ସ ମାମଲାରେ ଇଂଲଣ୍ଡ କ୍ରିକେଟ୍ ବୋର୍ଡ ଏହି ପ୍ରତିବନ୍ଧକକୁ ସମର୍ଥନ କରିଥିଲା। ବୋର୍ଡ କହିଛି ଯେ ଏହା ଏଭଳି ପ୍ରସଙ୍ଗକୁ ଗମ୍ଭୀରତାର ସହ ନେଇଥାଏ ଏବଂ କ୍ରିକେଟ୍ ଦୁର୍ନୀତିକୁ କୌଣସି ପ୍ରକାରେ ପ୍ରୋତ୍ସାହିତ କରେ ନାହିଁ। ବୋର୍ଡ କହିଛି ଯେ କାର୍ସ ତାଙ୍କ ଭୁଲକୁ ଗ୍ରହଣ କରିଛନ୍ତି ଏବଂ ଏଥିପାଇଁ ଦୁଃଖ ପ୍ରକାଶ କରିଛନ୍ତି। ଏହା ବ୍ୟତୀତ ସେ ଗତ ପାଞ୍ଚ ବର୍ଷ ମଧ୍ୟରେ ନିଜର ଦାୟିତ୍ୱ କୁ ଭଲ ଭାବରେ ପୂରଣ କରିଛନ୍ତି। ବୋର୍ଡ କାର୍ସ ଉପରେ ସନ୍ତୁଷ୍ଟ ଥିବା ବେଳେ ଅନ୍ୟ କ୍ରିକେଟରମାନଙ୍କୁ ମଧ୍ୟ ଏଥିରୁ ଶିଖିବାକୁ କହିଛି।
