ୟୁକ୍ରେନ ସୀମାରେ ପୁଣି ବଢୁଛି ଉତ୍ତେଜନା, ଆକ୍ରମଣ ସ୍ଥିତିରେ ରୁଷ୍ ସେନା !
ୱାଶିଂଟନ୍: ୟୁକ୍ରେନ ସୀମାରେ ପୁଣି ରୁଷ ସେନାର ଗତିବିଧି ବଢ଼ିଛି । ଆମେରିକାର ପ୍ରତିରକ୍ଷା ଅଧିକାରୀ କହିଛନ୍ତି ଯେ ୟୁକ୍ରେନ ସୀମାରେ ୪୦%ରୁ ଅଧିକ ରୁଷିଆ ସୈନ୍ୟ ବର୍ତ୍ତମାନ ଆକ୍ରମଣ ସ୍ଥିତିରେ ଅଛନ୍ତି । ଯେକୌଣସି ସମୟରେ ରୁଷ ୟୁକ୍ରେନ ଉପରେ ଆକ୍ରମଣ କରିପାରେ । ଆମେରିକାର ପ୍ରତିରକ୍ଷା ଅଧିକାରୀ ନିଜ ନାମ ଗୋପନ ରଖିବା ସର୍ତ୍ତରେ କହିଛନ୍ତି ଯେ ୟୁକ୍ରେନ ସୀମା ନିକଟରେ ରୁଷ୍ ୧୫୦,୦୦୦ରୁ ଅଧିକ ସୈନ୍ୟ ଠୁଳ କରିଛି । ଆମେରିକା ବୁଧବାର ଠାରୁ ରୁଷର ସାମରିକ ଗତିବିଧି ଉପରେ ନଜର ରଖିଛି।
ଏହି ଅଧିକାରୀ ଗଣମାଧ୍ୟମକୁ କହିଛନ୍ତି ଯେ “ଚାଳିଶରୁ ପଚାଶ ପ୍ରତିଶତ ରୁଷ ସୈନ୍ୟ ଆକ୍ରମଣ ସ୍ଥିତିରେ ଅଛନ୍ତି। ଗତ ୪୮ ଘଣ୍ଟା ମଧ୍ୟରେ ସେଠାରେ ବହୁ ସଂଖ୍ୟକ ସୈନିକ ଠୁଳ ହୋଇଛନ୍ତି।” ଅଧିକାରୀ କହିଛନ୍ତି ଯେ ଏହି ସୈନ୍ୟ ସମାଗମର ବିନ୍ଦୁ ରୁଷ-ୟୁକ୍ରେନ ସୀମା ନିକଟରେ ଅବସ୍ଥିତ, ଯେଉଁଠାରେ ଆକ୍ରମଣ ପୂର୍ବରୁ ସାମରିକ ୟୁନିଟ୍ ଗଠନ କରାଯାଇଥାଏ।
ଅଧିକାରୀ ଜଣକ କହିଛନ୍ତି ଯେ ସାଧାରଣ ସମୟରେ ୬୦ଟି ବାଟାଲିୟନ ତୁଳନାରେ ୟୁକ୍ରେନ ସୀମାରେ ମସ୍କୋ ପ୍ରାୟ ୧୨୫ଟି ବାଟାଲିୟନ ସାମରିକ ବାହିନୀ ଠୁଳ କରିଛି। ୟୁକ୍ରେନର ଦକ୍ଷିଣ-ପୂର୍ବ ଡୋନ୍ବାସ୍ ଅଞ୍ଚଳରେ ରୁଷର ସମର୍ଥକ ବିଚ୍ଛିନ୍ନତାବାଦୀ ତଥା ୟୁକ୍ରେନ ସରକାରୀ ବାହିନୀ ମଧ୍ୟରେ ବିବାଦ ବଢ଼ିବା ଏବଂ ରୁଷ ଏବଂ ଡୋନ୍ବାସର ଅଧିକାରୀଙ୍କ ଉତ୍ତେଜନାମୂଳକ ବୟାନବାଜି ଦର୍ଶାଉଛି ଯେ ଯୁଦ୍ଧ ଆଶଙ୍କା ବଢ଼ିଛି। ୟୁକ୍ରେନ ଉପରେ ଆକ୍ରମଣର ବାହାନା ଖୋଜିବା ପାଇଁ ରୁଷ ଏହି ଅଞ୍ଚଳର ଯେକୌଣସି ଘଟଣାକୁ ଉତ୍ସାହିତ କରିପାରେ ବୋଲି ୱାଶିଂଟନ୍ ଚେତାବନୀ ଦେଇଛି। ଆମେରିକାର ପ୍ରତିରକ୍ଷା ସଚିବ ଓଲିଉଡ ଅଷ୍ଟିନ ଏବିସି ନ୍ୟୁଜର କାର୍ଯ୍ୟକ୍ରମ “ଦିସ୍ ଓ୍ବିକ୍” କୁ କହିଛନ୍ତି ଯେ ରୁଷର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ପାଖରେ ଅନେକ ବିକଳ୍ପ ଅଛି ଏବଂ ସେ ଖୁବ୍ ଶୀଘ୍ର ୟୁକ୍ରେନ ଉପରେ ଆକ୍ରମଣ କରିପାରନ୍ତି। ୨୦୧୪ରେ ରୁଷ ବିଚ୍ଛିନ୍ନତାବାଦୀ ସହାନୁଭୂତି ଆଧାରରେ ୟୁକ୍ରେନର କ୍ରିମିଆ ଅଞ୍ଚଳ ଉପରେ ଆକ୍ରମଣ କରିଥିଲା ଏବଂ ଏହାକୁ ଦଖଲ କରିଥିଲା |
