କଲେଜ ଛାତ୍ରୀଙ୍କ ସନ୍ଦେହଜନକ ମୃତ୍ୟୁ

ବସ୍ତା : ବାଲେଶ୍ୱର ଜିଲା ସିଂଲା ଥାନା ଅନ୍ତର୍ଗତ ସାର୍ଥା କଲେଜରେ ପଢୁଥୁବା ଜଣେ କଲେଜ ଛାତ୍ରୀଙ୍କ ସନ୍ଦେହଜନକ ମୃତ୍ୟୁ ଘଟିଛି । ଏକ ଘରୋଇ ଛାତ୍ରୀ ନିବାସରେ ଏହି ଅଘଟଣ ଘଟିବା ପରେ ବିଭିନ୍ନ ମହଲରେ ଚର୍ଚ୍ଚା ଜୋର ଧରିଛି ।

ମୃତ ଛାତ୍ରୀ ହେଲେ ଯୁକ୍ତ୨ ପ୍ରଥମ ବର୍ଷ ବିଜ୍ଞାନ ଛାତ୍ରୀ ଜ୍ୟୋତିପ୍ରଭା ଦାସ । ସେ ଇଡ଼ଦା ପଞ୍ଚାୟତ କାଳନ୍ଦା ଗ୍ରାମର ସନାତନ ଦାସଙ୍କ ଝିଅ । ଜ୍ୟୋତିପ୍ରଭା ଦୂର୍ଗା ପୂଜା ଛୁଟିରେ ଘରକୁ ଆସି ଗତ ସୋମବାର ପୁଣି ମେସକୁ ଫେରିଥିଲେ । ବିଦ୍ୟା ରେସିଡେଣ୍ଟାଲ କୋଚିଙ୍ଗ ଏକାଡ଼େମୀ ମେସ୍‌ରେ ଉପର ଭାଗରେ ଝିଅ ପିଲା ରହୁଥିବା ବେଳେ ତଳ ଭାଗରେ ପୁଅ ପିଲା ରହୁଥିଲେ । ତେବେ ମେସରେ ରାତିରେ କିଛି ଖାଇ ନଥିବା ବେଳେ ସକାଳ ସମୟରେ ନିତ୍ୟକର୍ମ ସାରି ରୁମରେ ପହଞ୍ôଚବା ପରେ ତଳେ ପଡ଼ିଯାଇଥିଲେ । ତାଙ୍କ ପାଟିରୁ ଫେଣ ବାହାରୁଥିବା ଦେଖି ଜିଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା । ହେଲେ ଡ଼ାକ୍ତର ତାଙ୍କୁ ମୃତ ବୋଲି ଘୋଷଣା କରିଥିଲେ । ଏନେଇ କଲେଜ କର୍ତ୍ତୃପକ୍ଷ ଘଟଣା ସମ୍ପର୍କରେ କିଛି ଜାଣିନାହାନ୍ତି ବୋଲି କହିଥିଲେ । ପୋଲିସ ଘଟଣାର ତଦନ୍ତ ଜାରି ରଖିଛି । ପୋଷ୍ଟମର୍ଟମ ରିପୋର୍ଟ ଆସିବା ପରେ ପ୍ରକୃତ ସତ୍ୟାସତ୍ୟ ଜଣାପଡ଼ିବ ବୋଲି ଥାନାଧିକାରୀ କହିଛନ୍ତି ।