ଶ୍ରଦ୍ଧା ହତ୍ୟା ମାମଲା : ଆଜି ହୋଇପାରେ ଆଫତାବର ନାର୍କୋ ଟେଷ୍ଟ
ନୂଆଦିଲ୍ଲୀ : ଶ୍ରଦ୍ଧା ୱାଲକର ହତ୍ୟା ମାମଲାରେ ଦିଲ୍ଲୀ ପୋଲିସ କଟା ମୃତଦେହ ଅଂଶ ଗୁଡ଼ିକର ତଲାସୀ ଅଭିଯାନ ଜୋରଦାର କରିଛି । ପୋଲିସ ରବିବାର ମେହରୌଲି ଜଙ୍ଗଲରୁ ଖପୁରୀର କିଛି ଅଂଶ ଏବଂ କିଛି ହାଡ଼ ଏକ ଜଙ୍ଗଲରୁ ଉଦ୍ଧାର କରିଛି । ଏହାଛଡ଼ା ଦକ୍ଷିଣ ଦିଲ୍ଲୀର ମଇଦାନଗଡୀର ଏକ ପୋଖରୀରୁ ପାଣି ନିଷ୍କାସନ କରିବା ପାଇଁ ଏକ ଦଳକୁ ଲଗାଇଛି । ଏହି ପୋଖରୀରେ ଶ୍ରଦ୍ଧାଙ୍କ ମୁଣ୍ଡ ଫିଙ୍ଗିଥିଲା ବୋଲି ଅଭିଯୁକ୍ତ ଆଫତାବ୍ କହିଥିଲା ।
ପୋଲିସର ସୂଚନାନୁସାରେ, ପୁନାୱାଲା ୱାଲକର (୨୭)କୁ ମେ ୧୮ରେ ହତ୍ୟା କରି ତାଙ୍କ ଶରୀରକୁ ୩୫ ଖଣ୍ଡରେ କାଟି ଆଫତାବ୍ ୩୦୦ ଲିଟର ଫ୍ରିଜରେ ଦକ୍ଷିଣ ଦିଲ୍ଲୀର ମେହେରୁଲି ସ୍ଥିତ ବାସଭବନରେ ପ୍ରାୟ ତିନି ସପ୍ତାହ ପର୍ଯ୍ୟନ୍ତ ରଖିଥିଲା। ଏହାପରେ ସେ ଅନେକ ଦିନ ଧରି ସହରର ବିଭିନ୍ନ ସ୍ଥାନରେ ଏହି ମୃତଦେହ ଖଣ୍ଡ ଗୁଡ଼ିକୁ ଫିଙ୍ଗି ଦେଇଥିଲା | ଏଥିପାଇଁ ସେ ଅଧରାତିରେ ଘରୁ ବାହାରୁଥିଲା। ଅଧିକ ପ୍ରମାଣ ସଂଗ୍ରହ କରିବା ପାଇଁ ପୋଲିସ ଅଭିଯୁକ୍ତ ଆଫତାବ ପୁନାୱାଲାଙ୍କୁ ଯେଉଁ ଫ୍ଲାଟରେ ସେ ଏବଂ ଶ୍ରଦ୍ଧା ରହୁଥିଲେ ସେହି ଫ୍ଲାଟକୁ ନେଇଥିଲା। ଇତିମଧ୍ୟରେ ଆଫତାବର ନାର୍କୋ ଟେଷ୍ଟକୁ ଦୃଷ୍ଟିରେ ରଖି ଦିଲ୍ଲୀ ପୋଲିସର ଅଧିକାରୀ ଏବଂ ରୋହିଣୀ ସ୍ଥିତ ଫୋରେନସିକ୍ ସାଇନ୍ସ ଲାବୋରେଟୋରୀ ମଧ୍ୟରେ ଏକ ବୈଠକ ଅନୁଷ୍ଠିତ ହୋଇଛି। ଏହି ନାର୍କୋ ଟେଷ୍ଟ ମାଧ୍ୟମରେ ପୋଲିସ ଅଭିଯୁକ୍ତ ଠାରୁ କିଛି ଗୁରୁତ୍ୱପୂର୍ଣ୍ଣ ସୂଚନା ପାଇବ ବୋଲି ଆଶା କରାଯାଉଛି। ଆଜି ଆଫତାବର ନାର୍କୋ ଟେଷ୍ଟ ହେବା ସମ୍ଭାବନା ରହିଛି ।
ରୋହିଣୀ ଫୋରେନସିକ୍ ସାଇନ୍ସ ଲାବୋରେଟୋରୀର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଆମର ଅନେକ ଫୋରେନସିକ୍ ବିଶେଷଜ୍ଞ ଦଳ ନାର୍କୋ ଟେଷ୍ଟ ସମ୍ପର୍କରେ ଦିଲ୍ଲୀ ପୋଲିସ୍ ଅଧିକାରୀଙ୍କ ସହ ବିସ୍ତୃତ ଆଲୋଚନା କରିଛନ୍ତି ଏବଂ ଏଥିପାଇଁ ପ୍ରସ୍ତୁତ ହେଉଛନ୍ତି। ଦିଲ୍ଲୀର ଏକ କୋର୍ଟ ପୋଲିସକୁ ଆଫତାବର ନାର୍କୋ ଟେଷ୍ଟ କରିବାକୁ ଗତ ଗୁରୁବାର ଅନୁମତି ଦେଇଥିଲେ । କିନ୍ତୁ ଅଭିଯୁକ୍ତ ଉପରେ ପୋଲିସ ‘ଥାର୍ଡ ଡିଗ୍ରୀ’ ବ୍ୟବହାର କରିପାରିବ ନାହିଁ ବୋଲି କୋର୍ଟ ସ୍ପଷ୍ଟ କରିଥିଲେ । ଏହାରି ଭିତରେ ମହାରାଷ୍ଟ୍ରର ପାଲଘରର ଜଣେ ଅଧିକାରୀ କହିଛନ୍ତି ଯେ ରବିବାର ପାଲଘରର ଭାସାଇରେ ଦିଲ୍ଲୀ ପୋଲିସର ଏକ ଟିମ୍ ପହଞ୍ଚି ଏହି ବୀଭତ୍ସ ହତ୍ୟାକାଣ୍ଡ ସମର୍କରେ ଛାନଭିନ୍ କରିଛି। ଏହାଛଡ଼ା ବୟାନ ରେକର୍ଡ ପାଇଁ ତିନି ଜଣଙ୍କୁ ସମନ ଜାରି କରାଯାଇଛି ।
ଅଧିକାରୀମାନେ ଏହା ପୂର୍ବରୁ କହିଥିଲେ ଯେ ଦିଲ୍ଲୀ ପୋଲିସ ଦଳ ଶନିବାର ପାଲଘରରେ ଚାରି ଜଣଙ୍କ ବୟାନ ରେକର୍ଡ କରିଥିଲା। ତାଙ୍କ କହିବାନୁସାରେ, ଏହି ଚାରିଜଣଙ୍କ ମଧ୍ୟରୁ ଦୁଇଜଣ ହେଉଛନ୍ତି ସେହି ବ୍ୟକ୍ତି ଯେଉଁମାନଙ୍କଠାରୁ ଶ୍ରଦ୍ଧା ୨୦୨୦ ରେ ଆଫତାବଙ୍କ ଦ୍ବାରା ନିର୍ଯାତନାର ଶିକାର ହେବା ସାହାଯ୍ୟ ମାଗିଥିଲେ। ଅନ୍ୟ ଦୁଇଜଣ ମଧ୍ୟରେ ଜଣେ ବ୍ୟକ୍ତି ମୁମ୍ବାଇର କଲ୍ ସେଣ୍ଟରର ପୂର୍ବତନ ମ୍ୟାନେଜର ଏବଂ ଆଉ ଜଣେ ହେଉଛନ୍ତି ଶ୍ରଦ୍ଧାଙ୍କ ସାଙ୍ଗ। ଉକ୍ତ କଲ୍ ସେଣ୍ଟରରେ ଶ୍ରଦ୍ଧା କାମ କରୁଥିଲେ ।
ସୂଚନାନୁସାରେ, ଦିଲ୍ଲୀ-ଏନସିଆର ଅଞ୍ଚଳରେ ମେହରୋଲି ଏବଂ ଗୁରୁଗାଓଁର ଜଙ୍ଗଲ ଅଞ୍ଚଳରେ ବ୍ୟାପକ ଛାନଭିନର ତୃତୀୟ ଦିନରେ ପୋଲିସ ଖପୁରୀ ଏବଂ ଶରୀରର ଅନ୍ୟ ଅଂଶ, ମୁଖ୍ୟତ ହାଡର ଖଣ୍ଡଗୁଡ଼ିକୁ ଉଦ୍ଧାର କରିଥିଲା। ଏଗୁଡିକ ଫୋରେନସିକ୍ ପରୀକ୍ଷା ପାଇଁ ପଠାଯିବ | ଦିଲ୍ଲୀ ପୋଲିସ ମ୍ୟୁନିସିପାଲିଟି କର୍ପୋରେସନର ଟିମ୍ ସହିତ ରବିବାର ଅପରାହ୍ନରୁ ପୋଖରୀରୁ ପାଣି ନିଷ୍କାସନ କରିବାରେ ଲାଗିଛି। କାରଣ ଆଫତାବ୍ ପୋଲିସକୁ କହିଛି ଯେ ସେ ଶ୍ରଦ୍ଧାଙ୍କ ମୁଣ୍ଡ ଏବଂ ଶରୀରର ଅନ୍ୟ କିଛି ଅଂଶ ଏହି ପୋଖରୀରେ ଫିଙ୍ଗି ଦେଇଥିଲା ।
