ସ୍ୟାଣ୍ଡସିଟି କ୍ରିକେଟ୍ କପ୍-୨୦୨୨; ସମ୍ରାଟ୍ କ୍ଲବ ବିଜୟୀ
ବାଲେଶ୍ୱର : ବାଲେଶ୍ୱର ପରମିଟ୍ ପଡ଼ିଆ ଆନୁକୂଲ୍ୟରେ ଗୁରୁବାର ପ୍ରଥମ ସ୍ୟାଣ୍ଡସିଟି କ୍ରିକେଟ୍ କପ୍-୨୦୨୨ର ଆୟୋଜନ ହୋଇଛି । ଏହି ଟୁର୍ଣ୍ଣାମେଣ୍ଟରେ ମୋଟ୍ ୮ଟି ଦଳ ଭାଗ ନେଇଛନ୍ତି ।
ଗୁରୁବାର ପ୍ରଥମ ଉଦ୍ଘାଟନୀ ମ୍ୟାଚ୍ ସମ୍ରାଟ୍ କ୍ଲବ ଓ ବିସିଏ ଦଳ ମଧ୍ୟରେ ଅନୁଷ୍ଠିତ ହୋଇଥିଲା । ଏଥିରେ ସମ୍ରାଟ କ୍ଲବ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇ ନିର୍ଦ୍ଧାରିତ ୩୦ ଓଭରରେ ୭ ଉଇକେଟ୍ ବିନିମୟରେ ୨୩୩ ରନ୍ କରିଥିଲା । ଦଳ ପକ୍ଷରୁ ନରୋତ୍ତମ ଭଞ୍ଜ ୧୩୨ ରନ୍ ସଂଗ୍ରହ କରିଥିଲେ । ସେହିପରି ବିସିଏ ପକ୍ଷରୁ ଜାଭେଦ୍ ହୁସେନ୍ ୬ ଓଭରରେ ୪୯ ରନ୍ ଦେଇ ୫ଟି ଉଇକେଟ୍ ହାସଲ କରିଥିଲେ । ଜବାବରେ ବିସିଏ ଦଳ ୨୩୪ ରନ୍ର ବିଶାଳ ସ୍କୋରକୁ ପିଛା କରି ମାତ୍ର ୧୨୮ ରନ୍ରେ ଅଲଆଉଟ୍ ହୋଇଥିଲା । ଦଳ ପକ୍ଷରୁ ସ୍ୱରୂପ ଜୋସେଫ ୩୨ ରନ୍ କରିଥିଲେ । ସମ୍ରାଟ କ୍ଲବ ପକ୍ଷରୁ ଅଭିନାଶ ପାତ୍ର ଏବଂ ତାରାକାନ୍ତ ବିଶ୍ୱାଳ ୨ଟି ଲେଖାଏଁ ଉଇକେଟ୍ ନେଇଥିଲେ ।
ମ୍ୟାଚ୍କୁ ଅମ୍ପାୟାର ସୁଜିତ ଦାସ ଏବଂ ବିବେକାନନ୍ଦ ଚୌଧୁରୀ ପରିଚାଳନା କରିଥିଲେ । ସୌମେନ୍ଦ୍ର ସାହୁ ଓ ରାହୁଲ ସିଂ ସ୍କୋରର ଦାୟିତ୍ୱ ଏବଂ ସମିର ଡେଭିଡ୍ ଭକ୍ତା ଓ ବି. ସିମରନ୍ କମେଣ୍ଟେଟର ଭାବେ କାର୍ଯ୍ୟ ନିର୍ବାହ କରିଥିଲେ । ସମ୍ରାଟ କ୍ଲବର ଖେଳାଳୀ ନରୋତ୍ତମ ଭଞ୍ଜଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ କରାଯାଇଥିଲା । କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଜିଲା କ୍ରିକେଟ୍ ସମ୍ପାଦକ ସୁଜୟ କୁମାର ଆଚାର୍ଯ୍ୟ, ଅତିଥି ଭାବେ କୋଷାଧ୍ୟକ୍ଷ ଅମର ମହାନ୍ତି ଓ ଜଏଣ୍ଟ ସମ୍ପାଦକ ସଞ୍ଜୟ ଲେଙ୍କା ଯୋଗଦେଇଥିଲେ ।
