ଶିମିଳିପାଳ ଅଭୟାରଣ୍ୟରେ ବଦଳୁଛି ମହାବଳ ବାଘଙ୍କ ରଙ୍ଗ, ଚିନ୍ତାରେ ବ୍ୟାଘ୍ର ପ୍ରକଳ୍ପ କର୍ତ୍ତୃପକ୍ଷ
ବାରିପଦା : ମହାବଳ ବାଘଙ୍କ ସଂଖ୍ୟା ଦେଶରେ କମ୍ ରହିଛି । ହାତ ଗଣତି କେତେଟି ଅଭୟାରଣ୍ୟରେ ମହାବଳ ବାଘଙ୍କୁ ଦେଖିବାକୁ ମିଳୁଛି । ଆମ ଏଥିମଧ୍ୟରୁ ମୟୂରଭଞ୍ଜ ଶିମିଳପାଳ ଅଭୟାରଣ୍ୟ ଅନ୍ୟତମ । ଏହି ଅଭୟାରଣ୍ୟରେ ୨୦ରୁ ଅଧିକ ମହାବଳ ବାଘ ଅଛନ୍ତି । କିନ୍ତୁ କୌଣସି କାରଣରୁ ଏଠାରେ ଥିବା ମହାବଳଙ୍କ ରଙ୍ଗ କ୍ରମଶଃ ବଦଳିବାରେ ଲାଗିଛି । ସାଧାରଣତଃ ମହାବଳର ରଙ୍ଗ ହଳଦିଆ ହୋଇଥିବା ବେଳେ ଦେହ ଉପରେ କଳା ରଙ୍ଗର ପଟା ପଟା ଦାଗ ରହିଥାଏ । କିନ୍ତୁ ଏଠାରେ ଥିବା ବାଘଙ୍କ ରଙ୍ଗ ହଳଦିଆ ହେବା ପରିବର୍ତ୍ତେ କଳା ହେବାର ଲାଗିଲାଣୀ । ଅଭୟାରଣ୍ୟରେ ଲାଗିଥିବା କ୍ୟାମେରାରେ ଏଭଳି କିଛି ବାଘଙ୍କ ଫଟୋ ବର୍ତ୍ତମାନ ସାମ୍ନାକୁ ଆସିଛି । ଯାହାକୁ ନେଇ ଚିନ୍ତାରେ ପଡିଛନ୍ତି ବ୍ୟାଘ୍ର ପ୍ରକଳ୍ପ କର୍ତ୍ତୃପକ୍ଷ।
ସଂକ୍ରମଣ ଜନିତ ରୋଗ, ଜିନ୍ ପରିବର୍ତ୍ତନ ବା ଅନ୍ୟ କୌଣସି କାରଣରୁ ବାଘଙ୍କ ରଙ୍ଗ ପରିବର୍ତ୍ତନ ହେଉଛି ବୋଲି ଚର୍ଚ୍ଚା ହେଉଛି । ଏହାର କାରଣ ଖୋଜିବାକୁ ବିଶେଷଜ୍ଞଙ୍କ ସହାୟତା ଲୋଡିଛନ୍ତି ଅଭୟାରଣ୍ୟ କର୍ତ୍ତୃପକ୍ଷ। ତେବେ, ଏଠାରେ ଆମେ ଆପଣଙ୍କୁ କହି ରଖୁଛୁ ଯେ, ପୂର୍ବରୁ ଶିମିଳିପାଳରେ ୧୮ଟି ମହାବଳ ଥିବା ବେଳେ ଏବେ ୨୦ଟି ମହାବଳ ଥିବା ଜାତୀୟ ବାଘ ଗଣନା ରିପୋର୍ଟରୁ ପ୍ରକାଶ ପାଇଛି। ତେବେ, ଏହା ପ୍ରକୃତରେ ଏହା ମହାବଳ ନା କଳାବାଘ ସେନେଇ ଦ୍ବନ୍ଦରେ ପଡିଛି ବନ ବିଭାଗ । କାରଣ ଶିମିଳିପାଳରେ ବିରଳ କଳାବାଘ ଥିବା ନେଇ ପ୍ରଥମେ ୧୯୮୭ ମସିହାରେ ରିପୋର୍ଟ ପ୍ରକାଶ ପାଇଥିଲା। ତେବେ, ବିଶେଷଜ୍ଞଙ୍କ ଅଧିକ ଗବେଷଣା ପରେ ହିଁ ଶିମିଳିପାଳ ମହାବଳ ବାଘଙ୍କ ରଙ୍ଗ ପରିବର୍ତ୍ତନର ପ୍ରକୃତ କାରଣ ଜଣା ପଡିବ ବୋଲି ବ୍ୟାଘ୍ର ପ୍ରକଳ୍ପ କ୍ଷେତ୍ର ନିର୍ଦ୍ଦେଶକ କହିଛନ୍ତି।
