ଅନ୍ତର୍ଜାତୀୟ କ୍ରିକେଟକୁ ଅଲବିଦା କଲେ ରସ ଟେଲର
ହାମିଲଟନ୍ : ନ୍ୟୁଜିଲ୍ୟାଣ୍ଡର ଭେଟେରାନ ବ୍ୟାଟ୍ସମ୍ୟାନ୍ ରସ ଟେଲର ସୋମବାର ଅନ୍ତର୍ଜାତୀୟ କ୍ରିକେଟକୁ ଅଲବିଦା କହିଛନ୍ତି । ନେଦରଲ୍ୟାଣ୍ଡ ବିପକ୍ଷ ତୃତୀୟ ଦିନିକିଆ ତାଙ୍କ କ୍ୟାରିୟରର ଶେଷ ମ୍ୟାଚ୍ ଥିଲା । ନିଜ ଶେଷ ମ୍ୟାଚରେ ଟେଲର ୧୪ ରନ୍ କରିଥିଲେ । ଦର୍ଶକମାନେ ଏହି କିମ୍ବଦନ୍ତୀ ଖେଳାଳିଙ୍କୁ ଠିଆ ହୋଇ ଅଭିବାଦନ ଜଣାଇଥିଲେ।
ନ୍ୟୁଜିଲ୍ୟାଣ୍ଡ ପାଇଁ ଏହା ଟେଲରଙ୍କ ୪୫୦ ତମ ତଥା ଶେଷ ମ୍ୟାଚ୍ ଥିଲା, ଯାହା ସହ ତାଙ୍କର ୧୬ ବର୍ଷର ଆନ୍ତର୍ଜାତୀୟ କ୍ୟାରିୟର ଉପରେ ଯବନିକା ପଡ଼ିଥିଲା । ଏହି ୩୮ ବର୍ଷୀୟ ବ୍ୟାଟ୍ସମ୍ୟାନ୍ ଚଳିତ ବର୍ଷ ଆରମ୍ଭରେ ଦକ୍ଷିଣ ଆଫ୍ରିକା ବିପକ୍ଷରେ ତାଙ୍କର ଶେଷ ଟେଷ୍ଟ ମ୍ୟାଚ୍ ଖେଳିଥିଲେ । କିନ୍ତୁ ନିଜ ହୋମ୍ ଗ୍ରାଉଣ୍ଡ ସେଡେନ୍ ପାର୍କରେ ଶେଷ ମ୍ୟାଚ୍ ଖେଳି କ୍ରିକେଟକୁ ଅଲବିଦା କରିବାକୁ ଚାହୁଁଥିଲେ।ନେଦରଲ୍ୟାଣ୍ଡ ବିପକ୍ଷ ଦିନିକିଆ ପୂର୍ବରୁ ଜାତୀୟ ସଂଗୀତ ଗାନ ବେଳେ ଟେଲରଙ୍କ ସହ ତାଙ୍କ ପିଲାମାନେ ମାକେଞ୍ଜି, ଜଣ୍ଟି ଏବଂ ଆଡିଲେଡ ଟେଲରଙ୍କ ପାଖରେ ଠିଆ ହୋଇଥିଲେ । ଯେତେବେଳେ ସେ ପଡ଼ିଆକୁ ଫେରିଲେ, ନେଦରଲ୍ୟାଣ୍ଡର ଖେଳାଳିମାନେ ତାଙ୍କ ପାଖରେ ଠିଆ ହୋଇ ତାଙ୍କୁ ଗାର୍ଡ ଅଫ୍ ଅନର୍ ଦେଇଥିଲେ ।
୨୦୦୬ ରେ ନ୍ୟୁଜିଲ୍ୟାଣ୍ଡ ପାଇଁ ଟେଲର ତାଙ୍କର ପ୍ରଥମ ଦିନିକିଆ ଖେଳିଥିଲେ । ପରବର୍ତ୍ତୀ ବର୍ଷ ସେ ତାଙ୍କର ପ୍ରଥମ ଟେଷ୍ଟ ଖେଳିଥିଲେ | ସେ ୧୧୨ ଟେଷ୍ଟ ମ୍ୟାଚରେ ୧୯ ଟି ଶତକ ସହାୟତାରେ ୭,୬୮୩ ରନ୍ ସଂଗ୍ରହ କରିଛନ୍ତି । ଟେଲର ୨୩୬ ଅନ୍ତର୍ଜାତୀୟ ଦିନିକିଆରେ ୮,୫୯୩ ରନ୍ ଏବଂ ୧୦୨ ଟି-୨୦ରେ ୧୯୦୯ ରନ୍ କରିଛନ୍ତି । ସୂଚନା ଯେ, ଟେଲର ବିଶ୍ବର ଏକମାତ୍ର ଖେଳାଳି ଯିଏ କି ତିନୋଟି ଫର୍ମାଟରେ ୧୦୦ ରୁ ଅଧିକ ଆନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି।
