ବିଜେପି ମହାସଚିବ ହେଲେ ରିତୁରାଜ ସିହ୍ନା
ନୂଆଦିଲ୍ଲୀ: ଭାରତୀୟ ଜନତା ପାର୍ଟିର ଜାତୀୟ ମହାସଚିବ ହେଲେ ବିହାର ବିଜେପିର ଯୁବନେତା ରିତୁରାଜ ସିହ୍ନା । ଏନେଇ ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡା ନିଷ୍ପତ୍ତି ନେଇଥିବା ଜଣାପଡିଛି । ଦଳ ପକ୍ଷରୁ ଜାରି ନିର୍ଦ୍ଦେଶରେ ତୁରନ୍ତ ରିତୁରାଜଙ୍କୁ ଦାୟିତ୍ବ ଗ୍ରହଣ କରିବା ପାଇଁ କୁହାଯାଇଛି । ଏହାପୂର୍ବରୁ ୨୦୧୯ ଲୋକସଭା ନିର୍ବାଚନରେ ରିତୁରାଜଙ୍କୁ ତତ୍କାଳୀନ ଦଳ ସଭାପତି ଅମିତ ଶାହାଙ୍କ ନେତୃତ୍ବରେ ମଧ୍ୟ ଗୁରୁତ୍ୱପୂର୍ଣ୍ଣ ଦାୟିତ୍ବରେ ଅବସ୍ଥାପିତ କରାଯାଇଥିଲା ।
ଗତବର୍ଷ ବିହାର ବିଧାନସଭା ନିର୍ବାଚନରେ ମଧ୍ୟ ରିତୁରାଜ ପ୍ରମୁଖ ସାଙ୍ଗଠନିକ ଦାୟିତ୍ବ ତୁଲାଇଥିଲେ । ରାଜ୍ୟ ବିଧାନସଭା ନିର୍ବାଚନରେ ସେ ବିହାର ବିଜେପିର ଇସ୍ତାହାର କମିଟିର ସଂଯୋଜକ ଭାବରେ କାର୍ଯ୍ୟ କରିଥିଲେ। ସେହିପରି ସାଙ୍ଗଠନିକ ସଦୃଢୀକରଣ ପାଇଁ ସ୍ୱର୍ଗତ ଅରୁଣ ଜେଟଲୀଙ୍କ ନେତୃତ୍ୱରେ ଗଠିତ ୮ଜଣିଆ କମିଟିରେ ମଧ୍ୟ ରିତୁରାଜଙ୍କୁ ସାମିଲ କରାଯାଇଥିଲା । ରିତୁରାଜ ହେଉଛନ୍ତି ବିଜେପିର ପ୍ରତିଷ୍ଠାତା ସଦସ୍ୟ ତଥା ପୂର୍ବତନ ରାଜ୍ୟସଭା ସାଂସଦ ରବିନ୍ଦ୍ର କିଶୋର ସିହ୍ନାଙ୍କ ପୁଅ ।
