ଚଳିତବର୍ଷ ଯୁକ୍ତ୨ରେ ନାମଲେଖା ପାଇଁ ରେକର୍ଡ ସଂଖ୍ୟକ ଆବେଦନ
ଭୁବନେଶ୍ୱର : ଉଚ୍ଚ ମାଧ୍ୟମିକ ଶିକ୍ଷା ପରିଷଦ(ସିଏଚ୍ଏସ୍ଇ) ଦ୍ୱାରା ପରିଚାଳିତ ଯୁକ୍ତ୨ ନାମଲେଖା ପାଇଁ ଚଳିତ ବର୍ଷ ରେକର୍ଡସଂଖ୍ୟକ ଛାତ୍ରଛାତ୍ରୀ ଆବେଦନ କରିଛନ୍ତି। ଆବେଦନ ପ୍ରକ୍ରିୟା ସରିବାକୁ ୬ ଦିନ ବାକିଥିବାବେଳେ ଏଯାବତ୍ ଗତବର୍ଷ ତୁଳନାରେ ଅଧିକ ବିଦ୍ୟାର୍ଥୀ ଆବେଦନ କରିଥିବା ଦେଖିବାକୁ ମିଳିଛି। ଆସନ୍ତା ୫ରେ ଯୁକ୍ତ୨ ନାମଲେଖା ପ୍ରକ୍ରିୟା ଶେଷ ହେବ। ଅନ୍ୟପକ୍ଷରେ ଚଳିତ ବର୍ଷ ୫ଟି କନିଷ୍ଠ ମହାବିଦ୍ୟାଳୟ ବନ୍ଦ ହୋଇଛି। ତେବେ କୌଣସି କନିଷ୍ଠ ମହାବିଦ୍ୟାଳୟ ନାମଲେଖା ଉପରେ କଟକଣା ଜାରି କରାଯାଇନି।
ସୂଚନା ଯେ, ଚଳିତ ବର୍ଷ ରେକର୍ଡସଂଖ୍ୟକ ଛାତ୍ରଛାତ୍ରୀ ଦଶମ ଶ୍ରେଣୀ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ। ସେଥିଯୋଗୁଁ ଉଚ୍ଚ ମାଧ୍ୟମିକ ଶିକ୍ଷା ନିର୍ଦେଶାଳୟ ପକ୍ଷରୁ କନିଷ୍ଠ ମହାବିଦ୍ୟାଳୟ ଆସନ ବୃଦ୍ଧି କରିବା ସହ କୌଣସି ଶିକ୍ଷାନୁଷ୍ଠାନ ନାମଲେଖା ଉପରେ କଟକଣା ଲଗାଯାଇନି। ଭିତ୍ତିଭୂମି ଓ ଶିକ୍ଷାନୁଷ୍ଠାନ ଚାଲୁ ରଖିବାକୁ ଅନିଚ୍ଛା ପ୍ରକାଶ କରିବାରୁ ୫ କନିଷ୍ଠ ମହାବିଦ୍ୟାଳୟ ବନ୍ଦ କରାଯାଇଛି। ଅନ୍ୟପକ୍ଷରେ ଗତବର୍ଷ କଳା, ବାଣିଜ୍ୟ, ବିଜ୍ଞାନ ଓ ଧନ୍ଦାମୂଳକ ପାଠ୍ୟକ୍ରମରେ ମୋଟ ୩ ଲକ୍ଷ ୮୪ ହଜାର ଛାତ୍ରଛାତ୍ରୀ ଯୁକ୍ତ ଦୁଇ ନାମଲେଖା ପାଇଁ ଆବେଦନ କରିଥିଲେ। ତେବେ ଚଳିତବର୍ଷ ଆବେଦନ ସରି ନଥିଲେ ମଧ୍ୟ ସୋମବାର ସୁଦ୍ଧା ୩ ଲକ୍ଷ ୮୪ ହଜାର ୮୯୧ ଛାତ୍ରଛାତ୍ରୀ ଆବେଦନ କରିସାରିଛନ୍ତି। ଗତବର୍ଷ ରାଜ୍ୟରେ ମୋଟ ୪ ଲକ୍ଷ ୪୩ ହଜାର ଆସନ ଥିବାବେଳେ ଚଳିତ ବର୍ଷ ୫୫ ହଜାର ବଢି ଏହା ୫ ଲକ୍ଷରେ ପହଞ୍ଚିଛି। ଛାତ୍ରଛାତ୍ରୀ ନାମଲେଖା ପାଇଁ ସାମ୍ସ ୱେବ୍ସାଇଟ୍ରେ ଆସନ୍ତା ୫ ତାରିଖ ରାତି ୧୧ଟା ୪୫ ପର୍ଯ୍ୟନ୍ତ ଆବେଦନ କରିପାରିବେ। ଆସନ୍ତା ୧୩ରେ ପ୍ରଥମ ପର୍ଯ୍ୟାୟ ମେଧା ତାଲିକା ପ୍ରକାଶ ପାଇବ। ୧୪ରୁ୨୧ ମଧ୍ୟରେ ପ୍ରଥମ ପର୍ଯ୍ୟାୟ ନାମଲେଖା ଅନୁଷ୍ଠିତ ହେବ। ୨୭ରେ ଦ୍ବିତୀୟ ପର୍ଯ୍ୟାୟ ମେଧା ତାଲିକା ପ୍ରକାଶ ପାଇବ। ୨୯ରୁ ଅକ୍ଟୋବର ପହିଲା ମଧ୍ୟରେ ଦ୍ବିତୀୟ ପର୍ଯ୍ୟାୟ ନାମଲେଖା ଅନୁଷ୍ଠିତ ହେବ।
