ରାଜ୍ୟରେ ଆଜିଠୁ କମିବ ବର୍ଷାର ପରିମାଣ, ୧୮ରୁ ପୁଣି ବଢ଼ିପାରେ ବର୍ଷା
ଭୁବନେଶ୍ୱର : ରାଜ୍ୟରେ ଶୁକ୍ରବାର ଠାରୁ କମିବ ବର୍ଷାର ପରିମାଣ । ସେହିପରି ଆସନ୍ତା ଶନିବାର ଓ ରବିବାର ବର୍ଷା ବିଶେଷ ନାହିଁ । ତେବେ ୧୮/୧୯ ତାରିଖରୁ ପୁଣି ବଢ଼ିପାରେ ବର୍ଷା । ଏକ ଘୂର୍ଣ୍ଣିବଳୟ ସମ୍ଭାବନା ଥିବାରୁ ବର୍ଷା ବଢ଼ିବ ବୋଲି ଅନୁମାନ କରାଯାଉଛି ।
ଗତ ୨୪ ଘଣ୍ଟାରେ ରାଜ୍ୟରେ ପ୍ରବଳ ବର୍ଷା ହୋଇଛି । ଆଜି ସକାଳ ସାଢ଼େ ୮ଟା ସୁଦ୍ଧା ୨୩ଟି ବ୍ଲକରେ ୧୦୦ ମିଲିମିଟରରୁ ଅଧିକ ବର୍ଷା ରେକର୍ଡ ହୋଇଛି । ଦକ୍ଷିଣ ଓ ପଶ୍ଚିମ ଓଡ଼ିଶାରେ ସ୍ଥିତି ବେହାଲ୍ କରିଦେଇଛି । ଲଗାଣ ବର୍ଷା ଯୋଗୁ କାନ୍ଥ ପଡ଼ିବାରୁ ୩ଜଣ ପ୍ରାଣ ହରାଇଛନ୍ତି । ସେହିପରି ମାଛ ଧରିବାକୁ ଯାଇ ପାଣିରେ ଭାସିଯିବାରୁ ଜଣକର ମୃତ୍ୟୁ ହୋଇଥିବାବେଳେ ଜଣେ ଉଦ୍ଧାର ଓ ଜଣେ ନିଖୋଜ ଅଛନ୍ତି । ୫ ଜିଲାର ୨୧ଟି ବ୍ଲକ ଅନ୍ତର୍ଗତ ୩୯ଟି ପଞ୍ଚାୟତ ୧୫୫ ଗାଁର ୧୧,୨୬୬ ଲୋକେ ପ୍ରଭାବିତ ହୋଇଛନ୍ତି ।
ବର୍ଷା ମାଡ଼ରେ ୧୫୨ଟି ଘର ନଷ୍ଟ ହୋଇଛି । ପ୍ରବଳ ବର୍ଷା ଯୋଗୁ ବଂଶଧାରା ଫୁଲି ବିପଦ ସଙ୍କେତ ଟପିଛି । ମହାନଦୀ ଉପର ମୁଣ୍ଡରେ ବି ପ୍ରବଳ ବର୍ଷା ଲାଗି ରହିଛି । ହେଲେ ଜଳ ସମ୍ପଦ ବିଭାଗ ପକ୍ଷରୁ ସ୍ପଷ୍ଟ କରାଯାଇଛି- ରାଜ୍ୟରେ ବନ୍ୟା ଆସିଲା ଭଳି ସ୍ଥିତି ନାହିଁ । ଉପରମୁଣ୍ଡରେ ବର୍ଷା ବଢ଼ିଥିଲେ ବି ତଳମୁଣ୍ଡ ଶୁଖିଲା ପଡ଼ିଛି । ଯେତିକି ପାଣି ଆସୁଛି, ସେଥିରେ ବି ବନ୍ୟା ସମ୍ଭାବନା କମ୍ ।
