ଆଜି ସରଦାରଧାମ ଭବନର ଲୋକାର୍ପଣ କରିବେ ପ୍ରଧାନମନ୍ତ୍ରୀ
ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭିଡିଓ କନ୍ଫରେନ୍ସିଂ ମାଧ୍ୟମରେ ଶନିବାର ଦିନ ସରଦାରଧାମ ଭବନର ଲୋକାର୍ପଣ କରିବେ ଏବଂ ସରଦାରଧାମ-ଦ୍ୱିତୀୟ ଚରଣର ଛାତ୍ରୀନିବାସର ନିର୍ମାଣ ପାଇଁ ଭୂମିପୂଜା କରିବେ । ପ୍ରଧାନମନ୍ତ୍ରୀ କାର୍ଯ୍ୟାଳୟ ଅନୁସାରେ ସରଦାରଧାମ ସମାଜର ଦୁର୍ବଳ ବର୍ଗର ଶୈକ୍ଷିକ ଏବଂ ସାମାଜିକ ବିକାଶ ଓ ତା’ର ପ୍ରଗତି ଦିଗରେ କାମ କରୁଛି । ଏହାସହ ଯୁବବର୍ଗର ରୋଜଗାର ପାଇଁ ଅବସର ମଧ୍ୟ ପ୍ରଦାନ କରୁଛି ।
ସରଦାରଧାମ, ଅହମଦାବାଦରେ ଅବସ୍ଥିତ । ଯେଉଁଠାରେ ଛାତ୍ରଙ୍କୁ ଆଧୁନିକ ଏବଂ ଉତ୍କୃଷ୍ଟ ସୁବିଧା ପ୍ରଦାନ କରାଯାଉଛି । ଛାତ୍ରୀନିବାସରେ ଦୁଇହଜାର ବାଳିକାଙ୍କ ହଷ୍ଟେଲ ସୁବିଧା ମିଳିବ । ଏହି ସୁବିଧା ଆର୍ଥିକ ମାନଦଣ୍ଡ ତଳେ ଥିବା ସମସ୍ତ ବାଳିକାଙ୍କୁ ମିଳିବ। ଏହି ଅବସରରେ ଗୁଜୁରାଟର ମୁଖ୍ୟମନ୍ତ୍ରୀ ଏବଂ ଉପ-ମୁଖ୍ୟମନ୍ତ୍ରୀ ମଧ୍ୟ ଉପସ୍ଥିତ ରହିବେ।
