ଆଜି ଉତ୍ତରାଖଣ୍ଡ ଗସ୍ତ କରିବେ ପ୍ରଧାନମନ୍ତ୍ରୀ : ରାଜ୍ୟକୁ ମିଳିବ ୧୮ ହଜାର କୋଟି ମୂଲ୍ୟର ପ୍ରକଳ୍ପ
ନୂଆଦିଲ୍ଲୀ : ଆଜି ଉତ୍ତରାଖଣ୍ଡ ଗସ୍ତ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଶନିବାର ମଧ୍ୟାହ୍ନ ୧ଟା ବେଳେ ପ୍ରାୟ ୧୮ ହଜାର କୋଟି ଟଙ୍କାର ଅନେକ ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରିବେ । ଗସ୍ତ ଅବସରରେ ସଡକ ଭିତ୍ତିଭୂମି ଉନ୍ନତିକରଣ ପ୍ରକଳ୍ପ ଗୁଡିକୁ ଅଧିକ ଗୁରୁତ୍ବ ପ୍ରଦାନ କରାଯିବ । ଯାହା ଯାତ୍ରାକୁ ସୁଗମ ଓ ସୁରକ୍ଷିତ କରିବା ସହ ଅଞ୍ଚଳରେ ପର୍ଯ୍ୟଟନକୁ ସମୃଦ୍ଧ କରିବ । ପ୍ରଧାନମନ୍ତ୍ରୀଙ୍କ ପରିକଳ୍ପନା ଅନୁରୂପ ଏହି ପ୍ରକଳ୍ପଗୁଡିକ ଦୁର୍ଗମ ଅଞ୍ଚଳଗୁଡିକୁ ସଂଯୁକ୍ତ କରିବା ସହ ସୁଗମ କରିବ ।
ପ୍ରଧାନମନ୍ତ୍ରୀ ୧୧ଟି ବିକାଶମୂଳକ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିବେ । ଏଥିରେ ଦିଲ୍ଲୀ-ଡେରାଡୁନ ଅର୍ଥନୈତିକ କରିଡର (ଇଷ୍ଟର୍ଣ୍ଣ ପେରିଫେରାଲ ଏକ୍ସପ୍ରେସୱେ ଜଙ୍କସନରୁ ଡେରାଡୁନ) ସାମିଲ ରହିଛି । ଯାହା ୮ ହଜାର ୩ ଶହ କୋଟି ଟଙ୍କା ବ୍ୟୟ ଅଟକଳରେ ନିର୍ମିତ ହେବ । ଏହା ଦିଲ୍ଲୀ ଠାରୁ ଡେରାଡୁନ ପର୍ଯ୍ୟନ୍ତ 6ଘ ଣ୍ଟାର ରାସ୍ତାକୁ ୨.୫ ଘଣ୍ଟାକୁ ହ୍ରାସ କରିବ । ଏଥିରେ ହରିଦ୍ବାର, ମୁଜାଫରନଗର, ଶାମଲି, ଯମୁନାନଗର, ବାଗପତ, ମିରଟ ଓ ବରୌତ ଆଦି ସ୍ଥାନକୁ ସଂଯୁକ୍ତ କରିବା ପାଇଁ ସାତଟି ପ୍ରମୁଖ ଇଣ୍ଟରଚେଞ୍ଜ ରହିବ । ଏଥିରେ ବନ୍ୟଜନ୍ତୁଙ୍କ ଅବାଧ ଚଳପ୍ରଚଳ ପାଇଁ ଏସିଆର ସବୁଠାରୁ ବଡ ବନ୍ୟଜୀବ ଏଲିଭେଟେଡ କରିଡର ୧୨ କିଲୋମିଟର ରହିବ । ଏହାସହିତ ଡେରାଡୁନର ଦତ କାଳୀ ମନ୍ଦିର ନିକଟରେ ୩୪୦ ମିଟର ଲମ୍ବ ସୁଡଙ୍ଗ ବନ୍ୟଜୀବଙ୍କ ଉପରେ ପଡିବାକୁ ଥିବା ପ୍ରଭାବ କମାଇବାରେ ସହାୟକ ହେବ ।
ଏହାବ୍ୟତୀତ ଗଣେଶପୁର- ଡେରାଡୁନ ଖଣ୍ଡରେ ଗାଡିମୋଟର ଓ ବନ୍ୟ ଜୀବଜନ୍ତୁଙ୍କ ମଧ୍ୟରେ ଦୁର୍ଘଟଣା ଏଡାଇବା ପାଇଁ ବନ୍ୟଜନ୍ତୁଙ୍କ ପାଇଁ ଅନେକ ରାସ୍ତା ନିର୍ମାଣ ହୋଇଛି । ଦିଲ୍ଲୀ- ଡେରାଡୁନ ଅର୍ଥନୈତିକ କରିଡରରେ ୫୦୦ ମିଟର ଅନ୍ତରରେ ବର୍ଷାଜଳ ସଞ୍ଚୟ ବ୍ୟବସ୍ଥା ଓ ୪୦୦ ରୁ ଅଧିକ ଜଳ ରିଚାର୍ଜ ପଏଣ୍ଟ ବ୍ୟବସ୍ଥା ରହିବ ।
ଦିଲ୍ଲୀ-ଡେରାଡୁନ ଅର୍ଥନୈତିକ କରିଡରରୁ ଗ୍ରୀନଫିଲ୍ଡ ଶ୍ରେଣୀବଦ୍ଧ ପ୍ରକଳ୍ପ, ସାହାରନପୁରର ହଲଗୋଆରୁ ହରିଦ୍ବାରର ଭଦ୍ରାବାଦକୁ ସଂଯୋଗ କରୁଥିବା ପ୍ରକଳ୍ପ 2 ହଜାର କୋଟି ଟଙ୍କାରୁ ଅଧିକ ବିନିଯୋଗରେ ନିର୍ମିତ ହେବ । ଏହି ପ୍ରକଳ୍ପ ଦିଲ୍ଲୀରୁ ହରିଦ୍ବାର ପର୍ଯ୍ୟନ୍ତ ଯାତାୟତକୁ ସୁଗମ କରିବା ସହ ଯାତ୍ରା ସମୟ ହ୍ରାସ କରିବ । ୧ ହଜାର ୬ କୋଟି ଟଙ୍କାରୁ ଅଧିକ ବିନିଯୋଗରେ ନିର୍ମିତ ହେବାକୁ ଥିବା ମନୋହରପୁରରୁ କାଙ୍ଗଡି ପର୍ଯ୍ୟନ୍ତ ହରିଦ୍ବାର ରିଙ୍ଗ ରୋଡ ପ୍ରକଳ୍ପ, ହରିଦ୍ବାର ସହର ବାସିନ୍ଦା, ବିଶେଷ କରି ପର୍ଯ୍ୟଟନ ଋତୁରେ ଯିବା ଆସିବା ବେଳେ ଲାଗୁଥିବା ଜାମ ସମସ୍ୟାରୁ ମୁକ୍ତି ଦେବ ଓ କୁମାଉନ କ୍ଷେତ୍ର ସହିତ ଯୋଗାଯୋଗ ଉନ୍ନତ ହେବ ।
ପ୍ରାୟ ୧ହଜାର ୭ଶହ କୋଟି ଟଙ୍କା ବିନିଯୋଗରେ ନିର୍ମିତ ହେବାକୁ ଥିବା ଡେରାଡୁନ- ପାଓଁତା ସାହିବ (ହିମାଚଳ ପ୍ରଦେଶ) ସଡକ ପ୍ରକଳ୍ପ ଯାତ୍ରା ସମୟ ହ୍ରାସ କରିବ ଓ ଦୁଇ ସ୍ଥାନ ମଧ୍ୟରେ ଯୋଗାଯୋଗକୁ ସୁଗମ କରିବ । ଏହା ଆନ୍ତଃରାଜ୍ୟ ପର୍ଯ୍ୟଟନକୁ ମଧ୍ୟ ସମୃଦ୍ଧ କରିବ । ନଜିମାବାଦ- କୋଟଦ୍ବାର ସଡକ ପ୍ରଶସ୍ତିକରଣ ପ୍ରକଳ୍ପ ଦ୍ବାରା ଯାତ୍ରା ସମୟ ହ୍ରାସ ପାଇବା ସହ ଲାନ୍ସଡାଉନ ସହ ଯୋଗାଯୋଗ ଉନ୍ନତ କରିବ ।
ସେହିପରି ଲକ୍ଷ୍ମଣଝୁଲା ନିକଟସ୍ଥ ଗଙ୍ଗା ନଦୀରେ ଏକ ସେତୁ ନିର୍ମିତ ହେବ । ବିଶ୍ବପ୍ରସିଦ୍ଧ ଲକ୍ଷ୍ମଣଝୁଲା ୧୯୨୯ରେ ନିର୍ମିତ ହୋଇଥିଲା । ହେଲେ ଭାର ବହନ କ୍ଷମତା ହ୍ରାସ ପାଇବାରୁ ଏହାକୁ ଏବେ ବନ୍ଦ କରାଯାଇଛି । ନିର୍ମିତ ହେବାକୁ ଥିବା ସେତୁରେ ଚାଲି ଚାଲି ଯାଉଥିବା ଲୋକଙ୍କ ପାଇଁ କାଚର ଡେକ ବ୍ୟବସ୍ଥା ରହିବା ସହ ହାଲକା ଯାନବାହାନ ଯିବା ପାଇଁ ଅନୁମତି ମିଳିବ ।
ଏହି ଗସ୍ତ ଅବସରରେ ପ୍ରଧାନମନ୍ତ୍ରୀ ଡେରାଡୁନର ପିଲାମାନଙ୍କ ଯିବାଆସିବା ପାଇଁ ରାସ୍ତାକୁ ସୁରକ୍ଷିତ କରି ସହରକୁ ବାଲହିତୈଷୀ କରିବା ପାଇଁ ଚାଇଲ୍ଡ ଫ୍ରେଣ୍ଡଲି ସିଟି ପ୍ରୋଜେକ୍ଟ, ଡେରାଡୁନରେ ଭିତ୍ତିପ୍ରସ୍ତର ସ୍ଥାପନ କରିବେ । ଡେରାଡୁନରେ ୭୦୦ କୋଟି ଟଙ୍କାରୁ ଅଧିକ ବିନିଯୋଗରେ ଜଳ ଯୋଗାଣ, ରାସ୍ତା ଓ ଡ୍ରେନେଜ ବ୍ୟବସ୍ଥାର ବିକାଶ ସମ୍ପର୍କିତ ପ୍ରକଳ୍ପଗୁଡିକର ଶିଳାନ୍ୟାସ ମଧ୍ୟ କରିବେ ।
ଏତତ ବ୍ୟତୀତ ପ୍ରଧାନମନ୍ତ୍ରୀଙ୍କ ପରିକଳ୍ପନା ସ୍ମାର୍ଟ ଆଧ୍ୟାତ୍ମିକ ସହରର ବିକାଶ ଓ ପର୍ଯ୍ୟଟନ ସମ୍ପର୍କିତ ଭିତ୍ତିଭୂମି ଉନ୍ନତୀକରଣ ପାଇଁ ଶ୍ରୀବଦ୍ରିନାଥ ଧାମ ଓ ଗଙ୍ଗୋତ୍ରୀ- ଯମୁନୋତ୍ରୀ ଧାମରେ ଭିତ୍ତିଭୂମି ବିକାଶ କାର୍ଯ୍ୟର ଶିଳାନ୍ୟାସ ହେବ । ଏହାସହିତ ହରିଦ୍ବାରରେ ୫ ଶହରୁ ଅଧିକ କୋଟି ଟଙ୍କା ବିନିଯୋଗରେ ନୂଆ ମେଡିକାଲ କଲେଜ ମଧ୍ୟ ନିର୍ମାଣ କରାଯିବ ।
ପ୍ରଧାନମନ୍ତ୍ରୀ ବାରମ୍ବାର ଭୂସ୍ଖଳନ ଜନିତ ସମସ୍ୟାର ମୁକାବିଲା ପାଇଁ ସାତଟି ପ୍ରକଳ୍ପ ମଧ୍ୟ ଉଦଘାଟନ କରିବାର କାର୍ଯ୍ୟକ୍ରମ ରହିଛି । ଏହି ପ୍ରକଳ୍ପ ମଧ୍ୟରେ ଭୂସ୍ଖଳନ ମୁକାବିଲା ପ୍ରକଳ୍ପ, ଲାମବଗଡ ଭୂସ୍ଫଳଖ ମୁକାବିଲା ପ୍ରକଳ୍ପ ଓ ଏନଏଚ- ୫୮ ରେ ଶକନିଧର, ଶ୍ରୀନଗର ଓ ଦେବପ୍ରୟାଗରେ ଗଭୀର ଭୂସ୍ଫଳନ ସମସ୍ୟାର ସମାଧାନ ସାମିଲ ରହିଛି । ଅଧିକ ଭୂସ୍ଖଳନ ଅଞ୍ଚଳରେ ଲାମବଗଡ ଭୂସ୍ଖଳନ ମୁକାବିଲା ପ୍ରକଳ୍ପରେ ବର୍ଷାରେ ସୁରକ୍ଷିତ ରଖିବା ପାଇଁ ପାଚେରୀ ଓ ପଥରବନ୍ଧ ନିର୍ମାଣ କରାଯିବ ।
ଅନ୍ୟପଟେ ୧୭ ଶହ କୋଟି ଟଙ୍କାରୁ ଅଧିକ ବିନିଯୋଗରେ ଯମୁନୀ ନଦୀରେ ନିର୍ମିତ ୧୨୦ ମେଗାୱାଟର ବ୍ୟାସି ଜଳ ବିଦ୍ୟୁତ ପ୍ରକଳ୍ପର ଉଦଘାଟନ ହିମାଳୟ ସଂସ୍କୃତି କେନ୍ଦ୍ର ସହିତ କରାଯିବ । ହିମାଲୟାନ ସଂସ୍କୃତି କେନ୍ଦ୍ରରେ ଏକ ରାଜ୍ୟସ୍ତରୀୟ ସଂଗ୍ରହାଳୟ ହେବ, 800 ସିଟ ବିଶିଷ୍ଟ କଳା ଅଡିଟୋରିୟମ, ଲାଇବ୍ରେରୀ, କନଫରେନ୍ସ ହଲ ଆଦି ରହିବ । ଯାହା ଲୋକଙ୍କୁ ସାଂସ୍କୃତିକ କାର୍ଯ୍ୟକ୍ରମରେ ସାମିଲ କରିବା ସହ ରାଜ୍ୟର ସାଂସ୍କୃତିକ ଐତିହ୍ୟକୁ ତୋଳି ଧରିବାରେ ସହାୟକ ହେବ ।
