ଆଜି ଲାଲକିଲ୍ଲାରୁ ରାଷ୍ଟ୍ରକୁ ସମ୍ବୋଧନ କରିବେ ମୋଦି
ନୂଆଦିଲ୍ଲୀ : ଆଜି ଶିଖ ଗୁରୁ ତେଗ ବାହାଦୂରଙ୍କ ୪୦୦ତମ ପ୍ରକାଶ ପର୍ବ । ଏହି ଅବସରରେ ଐତିହାସିକ ଲାଲକିଲ୍ଲା ଠାରୁ ଦେଶବାସୀଙ୍କୁ ସମ୍ବୋଧିତ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏନେଇ କେନ୍ଦ୍ର ସଂସ୍କୃତି ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି । ମନ୍ତ୍ରୀ ଜି. କିଶାନ ରେଡ୍ଡୀ କହିଛନ୍ତି ଯେ, ଶିଖ ଗୁରୁ ତେଗ ବାହାଦୂରଙ୍କ ୪୦୦ତମ ପ୍ରକାଶ ପର୍ବ ଅବସରରେ ପ୍ରଧାନମନ୍ତ୍ରୀ ଏକ ଡାକ ଟିକଟର ଉନ୍ମୋଚନ କରିବା ସହ ମୁଦ୍ରାର ମଧ୍ୟ ଲୋକାର୍ପଣ କରିବେ । ସମୟ ୯ଟା ୧୫ ସୁଦ୍ଧା ଏହି କାର୍ଯ୍ୟକ୍ରମ ହେବାର ନେଇ ସୂଚନା ମିିଳିଛି ।
କେନ୍ଦ୍ର ସଂସ୍କୃତି ମନ୍ତ୍ରଣାଳୟ ପକ୍ଷରୁ ଆୟୋଜିତ ହେବାକୁ ଥିବା ଏହି କାର୍ଯ୍ୟକ୍ରମ ୨ ଦିନ ଧରି ଚାଲିବ । ଏହା ଲାଲ୍କିଲ୍ଲାରେ ହେବାକୁ ଥିବା ବେଳେ କାର୍ଯ୍ୟକ୍ରମର ଉଦଯାପନୀ ଉତ୍ସବରେ ପ୍ରଧାନମନ୍ତ୍ରୀ ଯୋଗ ଦେଇ ଦେଶକୁ ସମ୍ବୋଧିତ କରିବେ । ଏହାବ୍ୟତୀତ କାର୍ଯ୍ୟକ୍ରମରେ ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀ ମଧ୍ୟ ସାମିଲ ହେବେ । ଦେଶ ବିଦେଶରୁ ଅନେକ ଅତିଥି ମଧ୍ୟ ସାମିଲ ହେବେ । ୪୦୦ ଜଣ ଶିଖ ସଙ୍ଗୀତ ପରିବେଷଣ କରିବେ । ଆଜାଦୀ କା ଅମୃତ ମହୋତ୍ସବ ଅବସରରେ ଏହି କାର୍ଯ୍ୟକ୍ରମକୁ ଭବ୍ୟ ରୂପେ ପାଳନ କରୁଛନ୍ତି କେନ୍ଦ୍ର ସରକାର ।
