ରୁଷ ରାଷ୍ଟ୍ରପତିଙ୍କ ସହ ଟେଲିଫୋନ୍ରେ କଥାବାର୍ତା କଲେ ପ୍ରଧାନମନ୍ତ୍ରୀ
ଆଲୋଚନା ମାଧ୍ୟମରେ ୟୁକ୍ରେନ ବିବାଦର ସମାଧାନ ବାହାର କର
ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାର ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଟେଲିଫୋନରେ କଥାବାର୍ତା କରିଛନ୍ତି । ଦ୍ୱିପାକ୍ଷିକ ସଂପର୍କ, ୟୁକ୍ରେନ ଯୁଦ୍ଧ ଆଦି ପ୍ରସଙ୍ଗରେ ଦୁଇ ନେତା କଥାବାର୍ତା କରିଛନ୍ତି ।
ଗଣମାଧ୍ୟମ ସୂତ୍ରରୁ ମିଳିଥିବା ସୂଚନା ଅନୁସାରେ ଏହି ଟେଲିଫୋନ ଆଲୋଚନା ବେଳେ ମୋଦୀ ୟୁକ୍ରେନ ଯୁଦ୍ଧ ପ୍ରସଙ୍ଗ ଉଠାଇବା ସହ ଏହି ସମସ୍ୟାର ସମାଧାନ ପାଇଁ କୂଟନୈତିକ ସ୍ତରରେ ଆଲୋଚନା ହିଁ ସର୍ବୋତମ ପନ୍ଥା ଓ ଏହା ସପକ୍ଷରେ ଭାରତ ରହିଛି ବୋଲି ଜଣାଇଥିଲେ । ଅନ୍ୟପକ୍ଷରେ ପୁଟିନଙ୍କ ଗତ ଭାରତ ଗସ୍ତ କାଳରେ ନିଆଯାଇଥିବା ବିଭିନ୍ନ ଦ୍ୱିପାକ୍ଷିକ ନିଷ୍ପତିକୁ କାର୍ଯ୍ୟକାରୀ କରିବା ଉପରେ ଉଭୟ ନେତା ଆଲୋଚନା କରିଥିଲେ । କୃଷି ସାମଗ୍ରୀ, ସାର ଓ ଫାର୍ମା ଉତ୍ପାଦର ଦ୍ୱିପାକ୍ଷିକ ବାଣିଜ୍ୟ କାରବାରକୁ ବୃଦ୍ଧି କରିବା ପ୍ରସଙ୍ଗରେ ଉଭୟ ରାଜି ହୋଇଥିଲେ । ଏହା ଛଡ଼ା ଶକ୍ତି ଓ ଓ ଖାଦ୍ୟ କ୍ଷେତ୍ର ଉପରେ ସହଯୋଗ ବଢ଼ାଇବା ଉପରେ ମଧ୍ୟ ଉଭୟ ନେତା ଆଲୋଚନା କରିଥିଲେ । ୟୁକ୍ରେନ ଯୁଦ୍ଧ ଆରମ୍ଭ ହେବା ପରେ ୟୁରୋପୀୟ ଦେଶମାନେ ରୁଷଠାରୁ ତୈଳକ୍ରୟ କମ କରିଦେଇଛନ୍ତି । ଏହା ଫଳରେ ରୁଷ ଭାରତକୁ ରିହାତି ଦରରେ ତୈଳ ଯୋଗାଉଛି । ଏହାର ସୁଯୋଗ ନେଇ ଭାରତ ରୁଷଠାରୁ ପ୍ରଚୁର ପରିମାଣରେ ତେଲ କିଣି ଚାଲିଛି । ଏପରିକି ରୁଷ ଏବେ ଇରାକକୁ ଟପି ଭାରତର ନଂ୧ ତୈଳ ରପ୍ତାନିକାରୀରେ ପରିଣତ ହୋଇଛି ।
