ପୋଲିସକୁ ଖୋଲା ଚ୍ୟାଲେଞ୍ଜ : ଇନଫର୍ମର ସନ୍ଦେହରେ ଠିକାଦାରଙ୍କୁ ହତ୍ୟାକଲେ ମାଓବାଦୀ

କନ୍ଧମାଳ : ବିଗତ ଦିନରେ ପୋଲିସ ମାଓବାଦୀଙ୍କୁ ମାରିବା ଏବଂ ଦୁଇ ଜଣ ଆତ୍ମସମର୍ପିତ ମାଓବାଦୀଙ୍କୁ ବିବାହ ବନ୍ଧନରେ ବାନ୍ଧିବା ଘଟଣାକୁ ସହଜରେ ଗ୍ରହଣ କରିପାରି ନାହାନ୍ତି ମାଓବାଦୀ । ରବିବାର ସ୍ପଷ୍ଟ ଦିବା ଲୋକରେ ଜଣେ ଠିକାଦାର/ବଢ଼େଇଙ୍କୁ ସର୍ବ ସମ୍ମୁଖରେ ସେମାନେ ହତ୍ୟା କରି ପୋଲିସକୁ ଖୋଲା ଚ୍ୟାଲେଂଜ ଦେଇଛନ୍ତି । ମୃତ ଠିକାଦାର/ବଢ଼େଇ ହେଲେ କଳାହାଣ୍ଡି ଜିଲା ଆଣ୍ଡ୍ରିଂ ଗ୍ରାମର ରମେଶ ନାୟକ । ଏଥିସହ ଆଉ ୫ ଜଣଙ୍କୁ ପୋଲିସ ଇନଫର୍ମର ଲାଗି ହତ୍ୟା କରିବାକୁ ଘଟଣାସ୍ଥଳରେ ପୋଷ୍ଟର ମାରିଛନ୍ତି । ଏହି ଘଟଣାକୁ ନେଇ ସ୍ଥାନୀୟ ଅଂଚଳରେ ଭୟର ବାତାବରଣ ଖେଳି ଯାଇଛି । ଏ ପର୍ଯ୍ୟନ୍ତ ପୋଲିସ ଘଟଣାସ୍ଥଳରେ ପହଂଚି ନାହିଁ । ମିଳିଥିବା ସୁଚନା ଅନୁସାରେ, କୋଟଗଡ ବ୍ଲକ ଦୁର୍ଗାପାଂଗା ପଂଚାୟତ ବଣ୍ଡାପିପିଲି ଗ୍ରାମରେ ରବିବାର ଜନଜାତି ସାପ୍ତାହିକୀ ହାଟ ବସିଥିଲା । ପ୍ରାୟ ମଧ୍ୟାହ୍ନ ସାଢ଼େ ୧୨ଟାରେ ଦୁଇ ବନ୍ଧୁକ ଧାରୀ ସେଠାରେ ଆସି ପହଂଚି ରମେଶଙ୍କୁ ଖୋଜିଥିଲେ । ରମେଶଙ୍କ ଘର ହାଟ ହେଉଥିବା ଜାଗା ସମ୍ମୁଖରେ । ମାଓବାଦୀଙ୍କୁ ଦେଖି ରମେଶ ଦୌଡି ପଳାଉଥିଲେ । ଏହି ସମୟରେ ସେମାନେ ପିଛା କରି ମାତ୍ର ୩୦ ମିଟର ଦୂରରେ ରମେଶଙ୍କୁ ଗୁଳି କରି ହତ୍ୟା କରିଥିଲେ । ହତ୍ୟାକାଣ୍ଡ ସ୍ଥାନରେ ମାଓବାଦୀ ମାନେ ଏକ ପୋଷ୍ଟର ଛାଡି ଯାଇଛନ୍ତି । ଏହି ପୋଷ୍ଟରରେ ଉଲ୍ଲେଖ ରହିଛି ଯେ, ଆଉ ୫ ଜଣ କ୍ୱାକ୍ ବିଭୂତି ମଣ୍ଡଳ, ଚୌକିଦାର ଟିକି, କପିଳ, ପଙ୍କଜ ମୁଣ୍ଡା, ଯୁଗେନ୍ଦ୍ର ମୁଣ୍ଡା ପୋଲିସ ଇନଫର୍ମର ସାଜିଥିବାରୁ ସେମାନଙ୍କୁ ମଧ୍ୟ ହତ୍ୟା କରାଯିବ । କାରଣ ସେମାନେ ସାଧାରଣ କୁଟିଆ ଆଦିବାସୀଙ୍କୁ କିଛି ଟଂକା, ମୋବାଇଲ ଲୋଭ ଦେଖାଇ ପୋଲିସକୁ ଖବର ଦେଉଛନ୍ତି । ଏମାନଙ୍କୁ ରମେଶ ଭଳି ମୃତ୍ୟୁଦଣ୍ଡ ଦିଆଯିବ ବୋଲି ଚେତାବନୀ ଦେଇଛନ୍ତି । ଭାରତୀୟ କମ୍ୟୁନିଷ୍ଟ ପାର୍ଟି ବାଂଶଧାରା ଡିଭିଜନ ପୋଷ୍ଟର ତଳେ ଉଲ୍ଲେଖ ରହିଛି । ଅପରପକ୍ଷେ ରମେଶଙ୍କ ଦୁଇ ଜଣ ସ୍ତ୍ରୀ ଅଛନ୍ତି । ପ୍ରଥମ ସ୍ତ୍ରୀଙ୍କର ଦୁଇଟି ପୁଅ ଥିବା ବେଳେ ଦ୍ୱିତୀୟ ସ୍ତ୍ରୀଙ୍କ ଗୋଟିଏ ପୁଅ ରହିଛନ୍ତି । ରମେଶ ଗତ ୧୦ ବର୍ଷ ହେବ କଳାହାଣ୍ଡିରୁ ଏଠାକୁ ଆସି ଠିକାଦାରୀ କରିବା ସହ ବଢ଼େଇ କାମ କରୁଥିଲେ । ସୂଚନାଯୋଗ୍ୟ, ମାଓବାଦୀମାନେ ଗତ କିଛି ଦିନ ହେବ କନ୍ଧମାଳ ଜିଲାର ପରିବେଶକୁ ଅଶାନ୍ତ କରି ରଖିଛନ୍ତି । ସେମାନେ ପ୍ରତିଶୋଧ ପରାୟଣ ହୋଇ ଗୋଟିଏ ପରେ ଗୋଟିଏ କାଣ୍ଡ ଭିଆଉଛନ୍ତି । ଗତ ଫେବୃୟାରୀ ୧୫ରେ ତୁମୁଡିବନ୍ଧ ବ୍ଲକ ଅନ୍ତର୍ଗତ ବେଲଘର ଥାନା ଭଣ୍ଡରଙ୍ଗି ପଂଚାୟତ ଗୁମି ଗ୍ରାମରେ ପୋଲିସ ଇନର୍ଫମର ସନ୍ଦେହରେ କପିଳ ମାଝି(୩୨)ଙ୍କୁ ହତ୍ୟା କରିଥିଲେ ।