ଏଣିକି ହସ୍ପିଟାଲରେ ଭର୍ତ୍ତି ହେବା ପାଇଁ କୋଭିଡ୍ ଟେଷ୍ଟର ଆବଶ୍ୟକତା ନାହିଁ : ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ
ଭୁବନେଶ୍ୱର : ରାଜ୍ୟରେ ମହାମାରୀ କରୋନା ସଂକ୍ରମଣ କମିବାରେ ଲାଗିଛି । ଫଳରେ ଲାଗୁ ହୋଇଥିବା ବିଭିନ୍ନ ପ୍ରକାରର ନିୟମ ଏବେ କୋହଳ କରାଯାଉଛି । ଏହି ପରିପ୍ରେକ୍ଷୀରେ ଏଣିକି ରାଜ୍ୟରେ ହସ୍ପିଟାଲରେ ଭର୍ତ୍ତି ହେବା ପୂର୍ବରୁ କୋଭିଡ୍ ଟେଷ୍ଟର ଆବଶ୍ୟକତା ନାହିଁ। ଏ ନେଇ ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ସମସ୍ତ ହସ୍ପିଟାଲକୁ ନିର୍ଦ୍ଦେଶ ଦେଇଛନ୍ତି।
କୌଣସି ରୋଗୀ ଡାକ୍ତରଖାନାରେ ଭର୍ତ୍ତି ହେବା ସମୟରେ ଆଉ କରୋନା ଟେଷ୍ଟ୍ ବାଧ୍ୟତାମୂଳକ ନ କରିବାକୁ କୁହାଯାଇଛି। ଏହା ସମସ୍ତ ମାଇନର/ମେଜର ସର୍ଜରି ସମେତ ଓପିଡି, ଜରୁରିକାଳୀନ ରୋଗୀଙ୍କ ପାଇଁ ଉପଲବ୍ଧ। ସେହିଭଳି ଯଦି କୌଣସି ପ୍ରସୂତି ପ୍ରସବ ପାଇଁ ହସ୍ପିଟାଲରେ ଭର୍ତ୍ତି ହୋଇଥାନ୍ତୁ କିମ୍ବା ଆଡ୍ମିଶନ ପାଇଁ ଆସୁଛନ୍ତି, ତେବେ ସେମାନଙ୍କର ମଧ୍ୟ କରୋନା ପରୀକ୍ଷା କରାଯିବ ନାହିଁ। ଏହା କେବଳ ଲକ୍ଷଣବିହୀନ ରୋଗୀଙ୍କ ପାଇଁ ପ୍ରଯୁଜ୍ୟ। ହେଲେ ଯଦି କାହାର କରୋନା ଲକ୍ଷଣ ଥିବ, ତେବେ ସେମାନଙ୍କର କରୋନା ଟେଷ୍ଟ କରାଯିବ ବୋଲି ସ୍ବାସ୍ଥ୍ୟ ବିଭାଗ ସ୍ପଷ୍ଟ କରିଛି। କରୋନା ସଂକ୍ରମଣ ହ୍ରାସ ପାଉଥିବା ଦୃଷ୍ଟିରେ ରଖି ସରକାର ଏଭଳି ନିଷ୍ପତ୍ତି ନେଇଛନ୍ତି। ସୂଚନା ଯେ, କରୋନା ଟେଷ୍ଟ ଭୟରେ ଅଧିକାଂଶ ରୋଗୀ ହସ୍ପିଟାଲ ଯାଉ ନ ଥିଲେ। ପୁଣି ଏଥିପାଇଁ ଦୁଇଦିନ ଅପେକ୍ଷା କରିବାକୁ ପଡ଼ୁଥିବାରୁ ଅନେକ ଗୁରୁତର ରୋଗୀ ସମସ୍ୟାର ସମ୍ମୁଖୀନ ହେଉଥିଲେ। ରୋଗ ମଧ୍ୟ ବଢ଼ିଯାଉଥିଲା। ଏ ନେଇ ବିଭିନ୍ନ ସ୍ଥାନରୁ ଅଭିଯୋଗ ମଧ୍ୟ ଆସିଥିଲା।
