ରିଲାଏନ୍ସ କର୍ମଚାରୀ ମନୋଜ ମୋଦୀଙ୍କୁ ବିଳାଶମୟ ଘର ଉପହାର କଲେ ମୁକେଶ ଅମ୍ୱାନୀ
ନୂଆଦିଲ୍ଲୀ: ଦେଶର ସବୁଠୁ ଧନୀ ବ୍ୟକ୍ତି ମୁକେଶ ଅମ୍ୱାନୀ ବଡ଼ ହୃଦୟ ଦେଖାଇଛନ୍ତି । ଦୀର୍ଘ ଦିନରୁ ରିଲାଏନ୍ସ ଉଦ୍ୟୋଗର କର୍ମଚାରୀ ଏବଂ ନିଜର ଘନିଷ୍ଠ ମଧ୍ୟରେ ସାମିଲ ଥିବା ମନୋଜ ମୋଦୀଙ୍କୁ ବିଳାଶମୟ ଘର ଉପହାର ଦେଇଛନ୍ତି । ଏହି ଘର ଭବ୍ୟତା ଏହାର ମୂଲ୍ୟରୁ ଅନୁମାନ କରାଯାଇପାରିବ । ଘରର ମୂଲ୍ୟ ୧୫୦୦ କୋଟି ଟଙ୍କା । ମନୋଜ ମୋଦୀ ରିଲାଏନ୍ସ ଇଣ୍ଡଷ୍ଟ୍ରିଜର ସବୁଠୁ ଭରଷାଯୋଗ୍ୟ କର୍ମଚାରୀଙ୍କ ମଧ୍ୟରୁ ଜଣେ ଏବଂ ତାଙ୍କୁ ମୁକେଶ ଅମ୍ୱାନୀଙ୍କ ରାଇଟ୍ ହ୍ୟାଣ୍ଡ ବୋଲି ମଧ୍ୟ କୁହାଯାଏ । ପ୍ରୋପେର୍ଟି ୱେବସାଇଟ୍ ମ୍ୟାଜିକ୍ ବ୍ରିକର ରିପୋର୍ଟ ଅନୁସାରେ ମନୋଜ ମୋଦୀ ଉପହାରରେ ଯେଉଁ ଘର ପାଇଛନ୍ତି, ତାହା ୨୨ ମହଲା ବିଶିଷ୍ଟ । କେବଳ ଏତିକି ନୁହେଁ ଏହା ମୁମ୍ୱାଇର ପ୍ରାଇମ୍ ଲୋକେସନ ନେପିନ ସି ରୋଡରେ ରହିଛି ।
ରିପୋର୍ଟ ଅନୁସାରେ କିଛି ମାସ ପୂର୍ବେ ମନୋଜ ମୋଦୀଙ୍କୁ ମୁକେଶ ଅମ୍ୱାନୀ ଏହି ଘର ଉପହାରରେ ଦେଇଥିଲେ । ଅନେକ ଦଶନ୍ଧିରୁ ରାଲାଏନ୍ସର ସଦସ୍ୟ ଥିବା ମନୋଜ ମୋଦୀ ବର୍ତ୍ତମାନ ରିଲାଏନ୍ସ ଜିଓ ଏବଂ ରିଟେଲର ନିର୍ଦ୍ଦେଶକ ଅଛନ୍ତି । ମୁକେଶ ଅମ୍ୱାନୀ ଗିଫ୍ଟ କରିଥିବା ଏହି ଘରର ନାଁ ବୃନ୍ଦାବନ ରଖାଯାଇଛି । ଏହି ବିଲ୍ଡିଂ ଯେଉଁ ସ୍ଥାନରେ ରହିଛି, ସେଠାରେ ଜିନ୍ଦଲ ଗ୍ରୁପର ପରିଚାଳକ ନିର୍ଦ୍ଦେଶକ ସଜ୍ଜନ ଜିନ୍ଦଲଙ୍କ ଘର ରହିଛି । ତାଙ୍କ ଘରର ନାଁ ମହେଶ୍ୱର ହାଉସ୍ ।
ମନୋଜଙ୍କୁ ଉପହାରରେ ମିଳିଥିବା ବିଲ୍ଡିଂର ପ୍ରତିଟି ଫ୍ଲୋର ୮,୦୦୦ ବର୍ଗ ଫୁଟର । ଏହି ବିଲ୍ଡିଂ ମୋଟ ୧.୭ ଲକ୍ଷ ବର୍ଗ ଫୁଟ ଅଞ୍ଚଳରେ ବ୍ୟାପ୍ତ । ଏହି ବିଲ୍ଡିଂର ପ୍ରଥମ ସାତ ମହଲାକୁ କାର ପାର୍କିଂ ପାଇଁ ରଖାଯାଇଛି । ଏହାରି ଭିତରେ ମନୋଦ ମୋଦୀ ମୁମ୍ୱାଇରେ ନିଜର ଦୁଇଟି ଆପର୍ଟମେଣ୍ଟକୁ ବିକ୍ରି କରିଛନ୍ତି । ଯାହାର ମୂଲ୍ୟ ପ୍ରାୟ ୪୧.୫ କୋଟି ଟଙ୍କା ଥିଲା ।
