ହକି ମହାସମର :୩-୨ ଗୋଲ୍ରେ ଚିଲିକୁ ହରାଇଲା ମାଲେସିଆ
ରାଉରକେଲା : ଆଜି ହକି ବିଶ୍ବକପର ଚତୁର୍ଥ ଦିନ । ସୋମବାର ବିର୍ସା ମୁଣ୍ଡା ଷ୍ଟାଡିୟମରେ ଖେଳାଯାଇଥିବା ପୁଲ ‘ସି’ ର ମ୍ୟାଚରେ ଚିଲି ବିପକ୍ଷରେ ସଂଘର୍ଷପୂର୍ଣ୍ଣ ବିଜୟ ହାସଲ କରିଛି ମାଲେସିଆ ।
ନିଜର ପ୍ରଥମ ବିଶ୍ୱକପ ଖେଳୁଥିବା ଚିଲି ପ୍ରଥମେ ଗୋଲ ସ୍କୋର କରିଥିଲା । ମ୍ୟାଚର ୧୯ତମ ମିନିଟରେ ମିଳିଥିବା ପେନାଲଟି କର୍ଣ୍ଣରରୁ ଗୋଲରେ ପରିଣତ କରି ଚିଲିକୁ ଆଗୁଆ କରିଥିଲେ ଆମୋରସ ଜୁଆନ । କିନ୍ତୁ ୨୫ ତମ ମିନିଟରେ ଏକ ପେନାଲଟି ଷ୍ଟ୍ରୋକରୁ ଗୋଲ ଦେଇ ମ୍ୟାଚକୁ ସମାନ ସ୍ଥିତିକୁ ଆଣିଥିଲେ ମାଲେସିଆର ରହିମ ରାଜି। ୨୮ ତମ ମିନିଟରେ ରୋଡ୍ରିଗଜ ମାର୍ଟିନ ଗୋଲ ଦେଇ ଚିଲିକୁ ଆଗୁଆ କରିଥିଲେ। କିନ୍ତୁ ମାଲେସିଆ ପକ୍ଷରୁ ଖେଳର ୪୦ ତମ ମିନିଟରେ ହମସାନି ଆସ୍ରନ ଓ ୪୧ ତମ ମିନିଟରେ ସୁମାନ୍ତ୍ରି ନୋରସିଆଫିକ ଗୋଲ ଦେଇଥିଲେ । ୩-୨ରେ ବିଜୟୀ ହୋଇଥିଲା ମାଲେସିଆ। ଉଭୟ ନିଜ ନିଜର ପ୍ରଥମ ଗ୍ରୁପ ମ୍ୟାଚରେ ଚିଲି ନ୍ୟୁଜିଲାଣ୍ଡ ଠାରୁ ଓ ମାଲେସିଆ ନେଦରଲ୍ୟାଣ୍ଡସ ଠାରୁ ପରାସ୍ତ ହୋଇଥିଲେ।
