କର୍ଣ୍ଣାଟକ ବିଧାନସଭା ନିର୍ବାଚନ : ବିଜେପି ପାଇଁ ଅଗ୍ନି ପରୀକ୍ଷା, ଜାଣନ୍ତୁ କଣ ରହିଛି ରଣନୀତି ଏବଂ ଚ୍ୟାଲେଞ୍ଜ
ବେଙ୍ଗାଲୁରୁ : ଆଗକୁ କର୍ଣ୍ଣାଟକ ନିର୍ବାଚନ । ବିଧାନସଭା ନିର୍ବାଚନ ପାଇଁ ଜୋରଦାର ଚାଲିଛି ପ୍ରଚାର । ଆଉ ଏଠାରେ ବିଜୟ ବାନା ଉଡାଇବା ପାଇଁ ସବୁ ଦଳ ତାର ପ୍ରସ୍ତୁତି ଆରମ୍ଭ କରି ଦେଇଛନ୍ତି ।
କର୍ଣ୍ଣାଟକ ନିର୍ବାଚନ ପୂର୍ବରୁ ଆସିଥିବା ସମସ୍ତ ସର୍ଭେରେ ବିଜେପିକୁ ପରାଜୟର ସମ୍ମୁଖୀନ ହେବାକୁ ପଡ଼ିବ ବୋଲି କୁହାଯାଇଛି । କିନ୍ତୁ, କ୍ଷମତାକୁ ଫେରିବା ନେଇ ବିଜେପି ଦାବି କରିଆସୁଛି । ରାଜ୍ୟରେ ବିରୋଧୀ କଂଗ୍ରେସ ବିଜେପିକୁ ହରାଇବାକୁ ସମସ୍ତ ବଳ କଷିବା ସହ ବିଜେପି ସରକାର ଉପରେ ଭ୍ରଷ୍ଟାଚାର ଭଳି ସଙ୍ଗୀନ ଅଭିଯୋଗ ଆଣିଛି । ଏଭଳି ସ୍ଥିତିରେ ପ୍ରଶ୍ନ ଉଠୁଛି ବିଜେପି ନେତାଙ୍କ ନିକଟରେ ନିର୍ବାଚନ ଜିତିବାକୁ କୌଣସି ଠୋସ୍ ଆଧାର ଅଛି ନା କେବଳ ନିଜର ଦୁର୍ବଳତା ଲୁଚାଇବା ପାଇଁ ନିଜକୁ ଦୃଢ ଥିବା ଦେଖାଉଛନ୍ତି ।
ଏହାର ଉତ୍ତର ଖୋଦ୍ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଦେଇଛନ୍ତି । ୧୯୮୫ ମସିହାରୁ କର୍ଣ୍ଣାଟକରେ ଏପରି ଧାରା ରହି ଆସିଛି ଯେ କୌଣସି ସରକାର କ୍ରମାଗତ ଭାବରେ କ୍ଷମତାରେ ରହି ନାହାଁନ୍ତି । କିନ୍ତୁ, ଏଥର ଶାସକ ବିଜେପି ୩୮ ବର୍ଷର ଏହି ଇତିହାସକୁ ପରିବର୍ତ୍ତନ କରିବାକୁ ଚେଷ୍ଟା କରୁଛି । ଦଳର ବରିଷ୍ଠ ନେତା ତଥା କେନ୍ଦ୍ର ଗୃହମନ୍ତ୍ରୀ ଅମିତ ଶାହା ସଂଖ୍ୟାଗରିଷ୍ଠତା ଅପେକ୍ଷା ୧୫-୨୦ ଅଧିକ ଆସନ ଜିତିବା ନେଇ ଦାବି କରୁଛନ୍ତି ।
ଏକ ସାକ୍ଷାତକାରରେ ଯେତେବେଳେ ବିଜେପି ରାଷ୍ଟ୍ରୀୟ ସଭାପତି ଜେପି ନଡ୍ଡାଙ୍କୁ ଏ ବିଷୟରେ ପଚରାଯାଇଥିଲା, ସେ କହିଥିଲେ, ‘ତ୍ରିପୁରା ଏବଂ ନାଗାଲାଣ୍ଡରେ ଆମେ ପ୍ରଥମ ଥର ପାଇଁ ସରକାରକୁ ଫେରିଛୁ । ଆମେ ଗୋଆରେ ତୃତୀୟ ଥର ପାଇଁ ସରକାରରେ ରହିଛୁ । ଉତ୍ତରାଖଣ୍ଡରେ ଆମେ ଲଗାତାର ଦ୍ୱିତୀୟ ଥର କ୍ଷମତାକୁ ଆସିଛୁ । ନଡ୍ଡା କହିଛନ୍ତି ଯେ ‘ୟୁପିରେ ଆମେ ଲଗାତାର ଚାରିଟି ନିର୍ବାଚନରେ ଜିତିଛୁ । ଆମ ପାଇଁ ସବୁଠାରୁ ଲାଭଦାୟକ ହେଉଛି ମୋଦୀଜୀଙ୍କ ବ୍ୟକ୍ତିତ୍ୱ । ଏହା ଆମକୁ ଲୋକଙ୍କ ସମ୍ମାନ ହାସଲ କରିବାରେ ସାହାଯ୍ୟ କରିଛି ଏବଂ ଆମକୁ ସାହସ ଦେଇଛି । ଲୋକମାନେ ମୋଦୀଙ୍କୁ ସେମାନଙ୍କର ଆକାଂକ୍ଷାର ବାହକ ଭାବରେ ଦେଖନ୍ତି ।
କର୍ଣ୍ଣାଟକ ନିର୍ବାଚନ ବିଜେପି ପାଇଁ ଏକ ବଡ଼ ଚ୍ୟାଲେଞ୍ଜ । ବିରୋଧୀମାନେ ରାଜ୍ୟ ସରକାର ଉପରେ ଦୁର୍ନୀତି ଅଭିଯୋଗ ଆଣିଛନ୍ତି । ୪୦% ସରକାର କହି ବିରୋଧୀ ଶାସକ ବିଜେପିକୁ ଟାର୍ଗେଟ୍ କରୁଛନ୍ତି । କିନ୍ତୁ, ଦଳର ସଭାପତି କହିଛନ୍ତି ଯେ ଏଗୁଡ଼ିକ ତାଙ୍କ ଦଳ ବିରୋଧରେ ମିଥ୍ୟା ଅଭିଯୋଗ । ତାଙ୍କ କହିବାନୁସାରେ, ଗୋଟିଏ ବି ମାମଲା ରୁଜୁ ହୋଇନାହିଁ । ସେ କହିଛନ୍ତି ଯେ ଦୁର୍ନୀତି ପ୍ରକୃତରେ କେବଳ କଂଗ୍ରେସ ସହ ଜଡିତ ।
କେବଳ ଦୁର୍ନୀତି ନୁହେଁ, ବିଜେପି ଛାଡୁଥିବା କେତେକ ଲିଙ୍ଗାୟତ ନେତାଙ୍କ ପାଇଁ କଂଗ୍ରେସ ମଧ୍ୟ ଏହା ଉପରେ ଆକ୍ରମଣ କରୁଛି । କିନ୍ତୁ, ବିଜେପି ନେତୃତ୍ୱ ନିଶ୍ଚିତ ଯେ ‘ସେମାନଙ୍କ କଥା (କଂଗ୍ରେସ) କିଏ ଶୁଣିବ ? ଏମାନେ ସମସ୍ତେ କୁମ୍ଭୀର କାନ୍ଦଣା କାନ୍ଦୁଛନ୍ତି । ଆମେ କାହାକୁ (ଦଳ ଛାଡିଥିବା ଲିଙ୍ଗାୟତ ନେତା) ଅପମାନିତ କରି ନାହୁଁ ବୋଲି କହିଛନ୍ତି ବିଜେପି ଅଧ୍ୟକ୍ଷ । ତୁମେ (କଂଗ୍ରେସ) ଜଣେ ମୁଖ୍ୟମନ୍ତ୍ରୀଙ୍କୁ ଅପମାନିତ କରିଛ …. ୟେଦୁରୁପ୍ପା ଫେରି ଆସିଛନ୍ତି ନା ନାହିଁ ?’ ବୋଲି କହିଛନ୍ତି ନଡ୍ଡା । ଏଥର କର୍ଣ୍ଣାଟକରେ ଲିଙ୍ଗାୟତ ବ୍ୟତୀତ ବିଜେପି ମଧ୍ୟ ଭୋକାଲିଗା ସମ୍ପ୍ରଦାୟ ଉପରେ ମଧ୍ୟ ନଜର ଦେଉନାହିଁ । ସେ ଦୁହେଁ ଜାତିଗତ ଭାବରେ ଅତ୍ୟଧିକ ପ୍ରାଧାନ୍ୟ ବିସ୍ତାର କରନ୍ତି । କିନ୍ତୁ, ଉଭୟଙ୍କ ମଧ୍ୟରେ ବିବାଦ ପରିସ୍ଥିତି ମଧ୍ୟ ରହିଛି । କିନ୍ତୁ, ନଡ୍ଡା କହିଛନ୍ତି ଯେ ‘ସବକା ସାଥ, ସବକା ବିକାଶ, ସବକା ବିଶ୍ୱାସ’ ଏପରି ଏକ ପ୍ଲାଟଫର୍ମ ଯେଉଁଠାରେ ସମସ୍ତଙ୍କ ସ୍ୱାର୍ଥ ରକ୍ଷା କରାଯାଇଥାଏ ।
ସୂଚନା ଯେ, କର୍ଣ୍ଣାଟକର ୨୨୪ ସଦସ୍ୟ ବିଶିଷ୍ଟ ବିଧାନସଭା ପାଇଁ ମଇ ୧୦ରେ ଗୋଟିଏ ପର୍ଯ୍ୟାୟରେ ନିର୍ବାଚନ ହେବ । ଅନ୍ୟପଟେ ମଇ ୧୩ରେ ନିର୍ବାଚନ ପରିଣାମ ଘୋଷଣା କରାଯିବ । ବର୍ତ୍ତମାନ ସୁଦ୍ଧା ହୋଇଥିବା ସ୍କୁଟିନିଂ ପ୍ରକ୍ରିୟାରେ ଆଗାମୀ ନିର୍ବାଚନରେ ୩ ହଜାରରୁ ଅଧିକ ପ୍ରାର୍ଥୀ ମୈଦାନରେ ରହିବେ ।
