କର୍ଣ୍ଣାଟକ ବିଧାନସଭା ନିର୍ବାଚନ : ରାଜନୀତିର ୧୦ ମୁଖ୍ୟ ପ୍ରସଙ୍ଗ
ବେଙ୍ଗାଲୁରୁ : ଆସନ୍ତା ମେ’ ୧୦ରେ ହେବାକୁ ଥିବା କର୍ଣ୍ଣାଟକ ବିଧାନସଭା ନିର୍ବାଚନ ପାଇଁ ପ୍ରମୁଖ ରାଜନୈତିକ ଦଳ ବିଜେପି, କଂଗ୍ରେସ ଏବଂ ଜନତା ଦଳ (ଧର୍ମନିରପେକ୍ଷ) ରଣନୀତି ପ୍ରସ୍ତୁତ କରିସାରିଛନ୍ତି । ଲାଞ୍ଚ, ସଂରକ୍ଷଣ, ବିକାଶ ପ୍ରଭୃତି୧୦ଟି ମୁଖ୍ୟ ପ୍ରସଙ୍ଗକୁ ସବୁ ରାଜନୈତିକ ଦଳ ମୁଦ୍ଦା କରିଛନ୍ତି । ଲାଞ୍ଚ ମାମଲାରେ ବିଜେପି ବିଧାୟକ ମଦଲ ବିରୁପାକ୍ଷପ୍ପା ଏବଂ ତାଙ୍କ ପୁଅ ଗିରଫ ଘଟଣାରେ ଶାସକ ବିଜେପି ବ୍ୟାକଫୁଟରେ ରହିଛି । କଂଗ୍ରେସ ଦୁର୍ନୀତିକୁ ମୁଖ୍ୟ ପ୍ରସଙ୍ଗ କରିଛି । ରାଜ୍ୟ ସରକାରଙ୍କ ବିଭିନ୍ନ “ସ୍କାମ” ଏବଂ କଣ୍ଟ୍ରାକ୍ଟର ସଂସ୍ଥା ଦ୍ୱାରା ୪୦ ପ୍ରତିଶତ କମିଶନକୁ କଂଗ୍ରେସ ଭୋଟ ପ୍ରଚାରରେ କରିବ ମୁଖ୍ୟ ପ୍ରସଙ୍ଗ । ପୂର୍ବରୁ କେନ୍ଦ୍ର ତଥା ରାଜ୍ୟରେ ଥିବା କଂଗ୍ରେସ ଶାସନ କାଳରେ ହୋଇଥିବା ଲାଞ୍ଚ କାରବାର ବିଶେଷ କରି ସିଦ୍ଧରମେୟା ସରକାର ସମୟରେ ହୋଇଥିବା ଦୁର୍ନୀତିକୁ ବିଜେପି ଇସୁ୍ୟ କରିଛି ।
ଓବିସି କୋଟାରେ ମୁସଲମାନମାନଙ୍କ ପାଇଁ ୪ ପ୍ରତିଶତ ସଂରକ୍ଷଣ ଏବଂ ଏହାକୁ ଭୋକାଲିଗା ଏବଂ ଲିଙ୍ଗାୟତ ସମ୍ପ୍ରଦାୟ ମଧ୍ୟରେ ସମାନ ଭାବରେ ବଣ୍ଟନ କରିବା ନିଷ୍ପତ୍ତି ସରକାରଙ୍କ ପାଇଁ ଅଡୁଆ ସୃଷ୍ଟି କରିଛି । ମୁସଲମାନମାନଙ୍କୁ ଅର୍ଥନୈତିକ ଦୁର୍ବଳ ବର୍ଗରେ ସ୍ଥାନିତ ଏବଂ ଏସସି ବର୍ଗ ଅନ୍ତର୍ଗତ ବିଭିନ୍ନ ଦଳିତ ସମ୍ପ୍ରଦାୟ ପାଇଁ ଆଭ୍ୟନ୍ତରୀଣ ସଂରକ୍ଷଣ ସାଧାରଣ ଲୋକଙ୍କ ମଧ୍ୟରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି କରିବାରେ ଲାଗିଛି । ମୋଦି ସରକାର ନେଇଥିବା ବିଭିନ୍ନ ବିକାଶମୂଳକ ପଦକ୍ଷେପକୁ ବିଜେପି ମୁଖ୍ୟ ଅସ୍ତ୍ର କରିଛି । ତେଣେ କଂଗ୍ରେସ ଏବଂ ଜେଡି (ଏସ୍) କ୍ଷମତାରେ ଥିବାବେଳେ ସେମାନଙ୍କର ଟ୍ରାକ୍ ରେକର୍ଡ ଧରି ଷଳାକଙ୍କ ପାଖକୁ ଯିବା ପାଇଁ ପ୍ରସ୍ତୁତ ହୋଇସାରିଛି । ପେଟ୍ରୋଲ, ଡିଜେଲ, ଇନ୍ଧନ ଗ୍ୟାସ ଓ ଅତ୍ୟାବଶ୍ୟକ ସାମଗ୍ରୀର ଅହେତୁକ ଦରବୃଦ୍ଧିକୁ କଂଗ୍ରେସ ଓ ଜେଡି (ଏସ୍) ପ୍ରମୁଖ ପ୍ରସଙ୍ଗ କରିବ ।
କୋଭିଡ ପରିଚାଳନାରେ ରାଜ୍ୟ ସରକାରଙ୍କ ବିଫଳତା ଓ ଭାରତର ଅର୍ଥନୀତି କିପରି ବିଶ୍ୱର ପଞ୍ଚମ ବୃହତ୍ତମ ହେଲା ସେନେଇ ବିଜେପି ବିରୋଧୀଙ୍କୁ ପ୍ରଶ୍ନ କରିବା ସହ ଲୋକଙ୍କୁ ଅବଗତ କରାଇବ । ଶାସକ ବିଜେପି, କଂଗ୍ରେସ ଏବଂ ଜେଡି (ଏସ୍) ଦ୍ୱାରା ଦିଆଯାଇଥିବା ନିର୍ବାଚନ ପ୍ରତିଶ୍ରୁତିକୁ ନେଇ ସାଧାରଣ ଭୋଟର ପ୍ରଶ୍ନ କରିପାରନ୍ତି । ବିଜେପି ପୂର୍ବରୁ ଅଭିଯୋଗ କରିଛି ଯେ କଂଗ୍ରେସ ତା’ର ପ୍ରତିଶ୍ରୁତିକୁ ସମ୍ମାନ ଦେଉନାହିଁ । କିନ୍ତୁ ଦେଶରେ ପର୍ୟ୍ୟାପ୍ତ ନିଯୁକ୍ତି ସୁଯୋଗ ନଥିବା ଅଭିଯୋଗ କରି ବିଜେପି ଉପରେ କଂଗ୍ରେସ ଆକ୍ରମଣ କରିବାର ସମ୍ଭାବନା ରହିଛି। ଗତ ବିଧାନସଭା ଓ ଲୋକସଭା ନିର୍ବାଚନରେ ହୋଇଥିବା ଦଳୀୟ ବିଶୃଙ୍ଖଳାକୁ ସଜାଡିରେ ପ୍ରମୁଖ ତିନି ରାଜନୈତିକ ଦଳ ବିଜେପି, କଂଗ୍ରେସ ଏବଂ ଜେଡି (ଏସ୍) ଅଧିକ ଗୁରୁତ୍ୱ ଦେବେ । ଜାତି ରାଜନୀତି କର୍ଣ୍ଣାଟକରେ ଅଧିକ । ରାଜନୈତିକ ଦଳଗୁଡିକ ବିଭିନ୍ନ ଜାତିର ଲୋକଙ୍କୁ ନିଜ ସପକ୍ଷରେ ଟାଣିବା ଉପରେ ଅଧିକ ଗୁରୁତ୍ୱ ଦେବେ ।
ପୁରୁଣା ମହିଶୂର ଅଞ୍ଚଳର ଭୋକାଲିଗା ସମର୍ଥନ ପାଇବାକୁ ବିଜେପି ଗୁରୁତ୍ୱ ଦେଉଥିବାବେଳେ ଲିଙ୍ଗାୟତ ପ୍ରାଧାନ୍ୟ ନିର୍ବାଚନମଣ୍ଡଳୀରୁ କଂଗ୍ରେସ ଫାଇଦା ଉଠାଇବା ପାଇଁ ଉଦ୍ୟମ କରିବ । ସାମ୍ପ୍ରଦାୟିକତା ଏବଂ ସଂଖ୍ୟାଲଘୁ ରାଜନୀତି ବିଜେପି କରୁଛି ବୋଲି କଂଗ୍ରେସ ଅଭିଯୋଗ କରିଆସୁଛି । ହିଜାବ, ହାଲ, ଆଜାନ ଏବଂ ଟିପୁ ସୁଲତାନ ପ୍ରସଙ୍ଗ ଉଠାଇ ବିଜେପି ହୀନ ରାଜନୀତି କରୁଥିବା ଅଭିଯୋଗ କରିଛି। ନିର୍ବାଚନ ପ୍ରଚାର ସମୟରେ ଦୁଇ ଦଳ ମଧ୍ୟରେ ସାମ୍ପ୍ରଦାୟିକତା ଏବଂ ସଂଖ୍ୟାଲଘୁ ପ୍ରସଙ୍ଗ ତୀବ୍ର ହେବାର ସମ୍ଭାବନା ରହିଛି। ନରେନ୍ଦ୍ର ମୋଦୀ ଏବଂ ରାହୁଲ ଗାନ୍ଧୀ କାରଣ: ଆଦାନୀ, ଗଣତନ୍ତ୍ର, ମୁକ୍ତ ଭାଷଣ ଏବଂ କ୍ଷମତାସୀନତା ଭଳି ବିଭିନ୍ନ ପ୍ରସଙ୍ଗରେ କଂଗ୍ରେସ ପ୍ରଧାନମନ୍ତ୍ରୀଙ୍କୁ ଟାର୍ଗେଟ କରିବ। ରାହୁଲ ଗାନ୍ଧୀଙ୍କ ବିଦେଶ ମାଟିରେ ଭାରତ ବିରୋଧୀ ମନ୍ତବ୍ୟ, ହିନ୍ଦୁତ୍ୱ ଭି.ଡି ସଭରକରଙ୍କ ବିରୋଧରେ ମନ୍ତବ୍ୟକୁ ନେଇ ବିଜେପି କଂଗ୍ରେସ ଉପରେ ଆକ୍ରମଣ କରିବ।ବଂଶଗତ ରାଜନୀତିକୁ ନେଇ ବିଜେପି କଂଗ୍ରେସ ଏବଂ ଜେଡି (ଏସ)କୁ ଟାର୍ଗେଟ କରିବ ବୋଲି ଆଶା କରାଯାଉଛି।
