ଜୁନିୟର ମହିଳା ହକି ବିଶ୍ବକପ : ଜର୍ମାନୀକୁ ୨-୧ରେ ହରାଇ କ୍ବାର୍ଟର-ଫାଇନାଲରେ ଭାରତ
ପୋଟ୍ଚେଫଷ୍ଟ୍ରୋମ : ଜୁନିୟର ମହିଳା ହକି ବିଶ୍ବକପରେ ଜର୍ମାନୀକୁ ୨-୧ରେ ହରାଇ କ୍ବାର୍ଟର-ଫାଇନାଲରେ ପ୍ରବେଶ କଲା ଟିମ ଇଣ୍ଡିଆ । ଭାରତ ପ୍ରଥମ ମ୍ୟାଚ୍ରେ ୱେଲ୍ସକୁ ୫-୧ ବଡ ବ୍ୟବଧାନରେ ହରାଇବା ପରେ ରବିବାର ଖେଳାଯାଇଥିବା ପୁଲ୍ ଡ଼ି ଦ୍ବିତୀୟ ମ୍ୟାଚ୍ରେ ଜର୍ମାନୀକୁ ମଧ୍ୟ ପରାସ୍ତ କରିଛି । ଫଳରେ ଏହି ବିଜୟ ସହିତ ସମ୍ମାନଜନକ ବିଶ୍ବକପ ଟୁର୍ଣ୍ଣାମେଣ୍ଟର କ୍ବାର୍ଟର-ଫାଇନାଲରେ ଟିକେଟ ହାତେଇଛି ।
ଭାରତୀୟ ଗୋଲକିପର ବିଚୁଦେବୀ ଗୋଲପୋଷ୍ଟ ସାମ୍ନାରେ ଚମତ୍କାର ପ୍ରଦର୍ଶନ ସହ ବିଜୟରେ ପ୍ରମୁଖ ଭୁମିକା ନିଭାଇଛନ୍ତି । ଲାଲ୍ରେସିଆମି ଓ ମୁମତାଜ ଖାନ ଭାରତ ପକ୍ଷରୁ ଗୋଲ୍ ସ୍କୋର କରିଛନ୍ତି । ମ୍ୟାଚ୍ ଆରମ୍ଭରୁ ଭାରତୀୟ ଟିମ ଆକ୍ରମଣାତ୍ମକ ରଣନୀତି ନେଇ ଖେଳିଥିଲା । ମ୍ୟାଚ୍ର ଦ୍ବିତୀୟ ମିନିଟ୍ରେ ଲାଲ୍ରେସିଆମି ଆକର୍ଷଣୀୟ ଗୋଲ୍ କରିବା ସହ ଭାରତକୁ ୧-୦ରେ ଆଗୁଆ କରାଇଥିଲେ ।ପରେ ଜର୍ମାନୀର ଏକ ପେନାଲିଟି ସୁଟ୍ ଗୋଲ୍ ପ୍ରୟାସକୁ ବିଫଳ କରିଦେଥିଲେ ଗୋଲ୍କିପର ବିଚୁଦେବୀ । ଏହାର ସୁଯୋଗ ନେଇ ଭାରତୀୟ ଟିମ ଜର୍ମାନ ଖେଳାଳିଙ୍କ ଉପରେ ଅଧିକ ଚାପ ପକାଇଥିଲା ଓ ପରେ ମୁମତାଜ ଆଉ ଏକ ପେନାଲିଟି କର୍ଣ୍ଣରରେ ଗୋଲ୍ କରିବା ପରେ ଭାରତ ୨-୦ରେ ଆଗୁଆ ହୋଇଥିଲା । ତେବେ ମ୍ୟାଚ୍ର ଶେଷ କ୍ବାର୍ଟରରେ ୫୭ତମ ମିନିଟ୍ରେ ଜର୍ମାନୀ ଏକମାତ୍ର ଗୋଲ୍ କରିଥିଲେ ମଧ୍ୟ ପରାଜୟ ଏଡାଇ ପାରିନଥିଲା । ମଙ୍ଗଳବାର ଭାରତୀୟ ଜୁନିୟର ମହିଳା ହକି ଟିମ ମାଲେସିୟାକୁ ଭେଟିବ ।
